បុរសម្នាក់បានរងរបួសធ្ងន់ធ្ងរ និងម្នាក់ទៀតរបួសស្រាល ត្រូវបានរថយន្តសង្គ្រោះ ដឹកទៅសង្គ្រោះដឹកទៅមន្ទីរពេទ្យភ្លាមៗ ដោយសារបុរសជនជាតិចិនម្នាក់ បើករថយន្តឡិចស៊ីសមួយគ្រឿង បត់ឆ្លងផ្លូវដោយមិនបានបើកភ្លើងស៊ីញ៉ូ ក៏ជ្រុលបុកចំពីជំហៀងពេញទំហឹង ។
ហេតុការណ៍នេះបានកើតឡើង កាលពីវេលាម៉ោង១២និង១០នាទីរំលងអាធ្រាត ឈានចូលថ្ងៃទី៩ ខែមិថុនា ឆ្នាំ២០១៥ នៅចំណុចមុខច្រកចូលសណ្ឋាគារ តារាអ៊ែរផត តាមបណ្តោយផ្លូវសហព័ន្ធរុស្ស៊ី ស្ថិតក្នុងសង្កាត់ទឹកថ្លា ខណ្ឌសែនសុខ ។តាមសាក្សីនៅកន្លែងកើតហេតុ បានឲ្យដឹងថា មុនពេលកើតហេតុ គេបានឃើញបុរស២នាក់ ជិះម៉ូតូមួយគ្រឿងម៉ាកSL ពណ៌ទឹកប្រាក់ ពាក់ស្លាកលេខ ភ្នំពេញ1BA-4440 ធ្វើដំណើរតាមបណ្តោយផ្លូវសហព័ន្ធរុស្ស៊ី ក្នុងទិសដៅពីលិចទៅកើត ល្បឿនលឿន ខណៈមកដល់ចំណុចកើតហេតុ ស្រាប់តែមានរថយន្តមួយគ្រឿង ម៉ាកឡិចស៊ីស RX300 ពណ៌ខ្មៅ ពាក់ស្លាកលេខ ភ្នំពេញ2J-6645 បើកបរដោយបុរសជនជាតិចិនម្នាក់ ធ្វើដំណើរបញ្ច្រាស់ទិសគ្នា ហើយបត់ឆ្លងផ្លូវ ដោយមិនបើកភ្លើងស៊ីញ៉ូ ក៏ត្រូវបានម៉ូតូបុកចំពីជុំហៀងពេញទំហឹង បណ្តាលឲ្យនាក់ជិះម៉ូតូ បោកខ្ទប់និងកញ្ចក់រថយន្ត រងរបួសធ្ងន់ធ្ងរម្នាក់ និងស្រាលម្នាក់ ។បន្ទាប់ពីកើតហេតុ ជនរងគ្រោះត្រូវបានរថយន្តសង្គ្រោះ ដឹកទៅមន្ទីរពេទ្យភ្លាមៗ ចំណែកតៃកុងរថយន្តសមត្ថកិច្ចមិនបានឃាត់ បែរជាបណ្តោយឲ្យឡើងរថយន្តមួយគ្រឿងទៀតទៅបាត់ និងទុករថយន្តបង្កនៅកន្លែងកើតហេតុ ។ ក្រោយមកសមត្ថកិច្ចបានធ្វើការវាស់វែង យករថយន្តនិងម៉ូតូ ទៅរក្សាទុកនៅអធិការដ្ឋាននគរបាលខណ្ឌសែនសុខ ដើម្បីរងចាំដោះស្រាយពេលក្រោយ ៕