កំពង់ឆ្នាំង៖ ស្ត្រីវ័យកណ្តាលម្នាក់បានរងរបួសជាទម្ងន់ ខណៈគាត់ជិះកង់ដឹកផ្លែព្រីងទៅលក់នៅពេលទៀបភ្លឺ ត្រូវបានរថយន្តមួយគ្រឿងបុកចំក្រោយពេញទំហឹង ប៉ើងជាង១០ម៉ែត្រ។ហេតុការណ៍នេះបានកើតឡើងនៅវេលាម៉ោង៥និង០៥នាទី ចន្លោះគីឡូម៉ែត្រលេខ៩៦និង៩៧ លើបណ្តោយផ្លូវជាតិលេខ៥ ចំណុចភូមិត្រពាំងពោធិ ឃុំពង្រ ស្រុករលាប្អៀរ។
សមត្ថកិច្ចនគរបាលមូលដ្ឋាននៅកន្លែងកើតហេតុបានអោយដឹងថា៖ស្ត្រីរងគ្រោះមានឈ្មោះ ប្រាក់ លឿន អាយុ៥២ឆ្នាំ ជាកសិករ រស់នៅភូមិស្រាំងខ្ពស់ ឃុំពង្រ ស្រុករលាប្អៀរ។មុនពេលកើតហេតុ គាត់បានជិះកង់ដឹកផ្លែព្រីងមួយកញ្ជើរតូចយកមកលក់នៅផ្សារកំពង់ឆ្នាំង លុះមកដល់ចំណុចកើតហេតុ ស្រាប់តែមានរថយន្តមួយគ្រឿងមិនស្គាល់ម៉ាក បានបុកចំពីក្រោយពេញទំហឹង បណ្តាលអោយរូបគាត់ដួលត្រឡប់ត្រឡិនប៉ើងចម្ងាយប្រមាណជាង១០ម៉ែត្រ
សន្លប់ រងរបួសយ៉ាងធ្ងន់ធ្ងរ។ក្រោយពេលកើតហេតុជិត១ម៉ោង ទើបឃើញរថយន្តសង្គ្រោះទៅដឹកជនរងគ្រោះ បញ្ជូនមកកាន់មន្ទីរពេទ្យខេត្តកំពង់ឆ្នាំង ដើម្បីសង្គ្រោះព្យាបាលល។ នៅក្នុងបន្ទប់លាងរបួសនៃមន្ទីរពេទ្យខេត្តកំពង់ឆ្នាំង គេឃើញលោកគ្រូ អ្នកគ្រូពេទ្យកំពុងលាង និងដេររបួសជាច្រើនថ្នេរចំនួន៤កន្លែងអោយជនរងគ្រោះដែលសន្លប់មិនដឹងខ្លួនរហូតមកគឺ៖ រងរបួសធ្ងន់នៅលើថ្ងាស លើចង្កា លើថ្ពាល់ស្តាំយ៉ាងជ្រៅ និងរបួសដើមដៃខាងស្តាំ។
ករណីគ្រោះថ្នាក់ខាងលើនេះ ត្រូវបានសមត្ថកិច្ចសន្និដ្ឋានថា៖ទំនងរថយន្តបង្កបើកបរងោកងុយ ឬចាំងភ្លើងហ្វារថយន្តមកពីមុខ ទើបបង្កគ្រោះថ្នាក់ដល់ស្ត្រីរងគ្រោះខាងលើ ក្រោយពេលកើតហេតុរថយន្តបង្កបាន បើកគេចខ្លួនបាត់។ដើម្បីទប់ស្កាត់គ្រោះថ្នាក់ដូចខាងលើនេះ ប្រជាពលរដ្ឋដែលប្រើប្រាស់យាន្តយន្ត ឬកង់ម៉ូតូ គួរតែចាប់ចំណាំងផ្លាតនៅ
កន្ទុយខាងក្រោយ ដើម្បីអោយអ្នកបើកពីក្រោយអាចមើលឃើញ ទើបអាចជៀសវាងពីគ្រោះថ្នាក់ជាយថាហេតុបាន ម្យ៉ាងទៀតបើសិនមិនពាក់ចំណាំងផ្លាតនៅពេលយប់ ពេលមានគ្រោះថ្នាក់ គឺយើងដែលមានកង់ម៉ូតូ ឬយាន្តយន្តដែលគ្មានចំណាំងផ្លាតបំពាក់ពីក្រោយនោះ គឺជាអ្នកទទួលខុសត្រូវចំពោះមុខច្បាប់៕ប៊ុន វាសនា
