បន្ទាយមានជ័យៈ បើយើងធ្វើដំណើរតាមផ្លូវជាតិលេខ៥ ពីទីរួមខេត្តបន្ទាយមានជ័យ ឆ្ពោះទៅក្រុងប៉ោយប៉ែតជាប់ព្រំដែនថៃ ឬត្រឡប់មកវិញលោកអ្នកប្រាកដជាមិនអាចរំលោងបាន នូវចំណីដែលជាទីពេញនិយម ដូចជា ចង្រិត កណ្តូប ដុកឌឿ កន្ទេះឡង់ នៅសងខាងផ្លូវជាតិលេខ៥ប្រមាណជា១០តូប ស្ថិតនៅចំនុចភូមិនិមិត្តថ្មី សង្កាត់និមិត្ត ក្រុងប៉ោយប៉ែត ។
សត្វទាំងនេះវាមិនគ្រាន់តែជាទីចាប់អារម្ម និងចង់ទទួលទាន មិនថាបុរស ឬស្ត្រីនោះទេ វាក៏ជាចំណូលដ៏សំខាន់ សម្រាប់ផ្គត់ផ្គង់ជីវភាពគ្រួសាររបស់អ្នកលក់ទាំងនោះផងដែរ ។
ជាក់ស្តែស្ត្រីម្នាក់ ឈ្មោះ ខា អាយុ៤១ឆ្នាំ ក្នុងចំណោមអ្នលក់ទាំងអស់និងជាស្ត្រីមេម៉ាយមានកូន៣នាក់ផងនោះ បានអោយដឹងថា រូបគាត់បានប្រកបរបរលក់ ចង្រិត កណ្តូប ដុកឌឿ កន្ទេះឡង់ នេះអស់រយៈពេល២ឆ្នាំមកហើយ ដោយដើមឡើយមានតែ២ទៅ៣តូបតែប៉ុណ្ណោះ ។ ការប្រកបមុខរបរនេះធ្វើអោយគាត់អាចមានចំណូលគួរសមសម្រាប់ចិញ្ចឹមខ្លួន និងកូនដោយពុំចាំបាច់ ធ្វើចំណាកស្រុកទៅប្រទេសថៃ ព្រោះថា មុខរបរនេះមិនហត់នឿយប៉ុន្មាននោះទេ ដោយគ្រាន់តែទទួលទិញកណ្តូប ឬកន្ទេះឡង់ មកបំពងខ្លាញ់ដាក់លក់នៅហ្នឹងមុខផ្ទះជាការស្រេច ។ សម្រាប់ការលក់ដូរនេះ ក្នុងមួយថ្ងៃលក់អស់ពី៣ទៅ៥គីឡូក្រាម បើប៉ះរដូវបុណ្យទាន ឬរដូវវស្សាដែលមានទឹកលេង អាចលក់អស់ពី៥ទៅ១០គីឡូក្រាម ដោយក្នុងមួយគីឡូចង្រិត ដែលចិញ្ចឹមតំលៃ៧ពាន់រៀល លក់វិញ១កំប៉ុង២៥០០រៀល ចំណែកចង្រិតធម្មជាតិទិញចូលក្នុង១គីឡូ២១០០០រៀល លក់វិញ១កំប៉ុង៣០០០រៀល ។ សម្រាប់ចង្រិត១គីឡូស្មើរនិង១០កំប៉ុងពេលចំអិនរួច ។ ជាមួយនិងមុខរបរនេះគាត់អាចចិញ្ចឹមកូនអោយទៅរៀន និងបានទិញសម្ភារៈដូវជាទូទឹកកក និងសម្ភារៈដទៃទៀតបានជាច្រើន ។ប៊ុន វាសនា