ខេត្តបន្ទាយមានជ័យ
លោកអៀតឈុនហៃអធិការរងនគរបាលស្រុកព្រះនេត្រព្រះ បានដឹកនាំកម្លាំងនគរបាលចំនួន១៥នាក់សហការជាមួយ កម្លាំងអាវុធហត្ថស្រុកចំនួន៥នាក់បានចុះទៅជួយជួសជុលនិងសាងសង់ផ្ទះជូនប្រជាពលរដ្ឋឡើងវិញក្រោយពីទទួលរងនូវខ្យល់កន្ត្រាក់ ស្ថិតនៅភូមិកក់ ឃុំជប់វារី ស្រុកព្រះនេត្រព្រះ។លោកអៀតឈុនហៃបានឲ្យដឹងថាផ្ទះប្រជាពលរដ្ឋនៅភូមិកក់បានជួបគ្រោះធម្មជាតិដោយខ្យល់កន្ត្រាក់យ៉ាងខ្លាំងកាលពីយប់ថ្ងៃទី៩ខែមិថុនា ឆ្នាំ២០១៥ បណ្តាលឲ្យរងការខូចខាតយ៉ាងខ្លាំងប៉ុន្តែមិនបណ្តាលឲ្យមានអ្នករងរបួសនោះទេ។ក្រោយទទួលព័ត៌មាននៃគ្រោះធម្មជាតិមួយនេះលោកឧត្តមសេនីយ៍ត្រីអាត់ខែមស្នងការនគបាលខេត្តបានចាត់ឲ្យកម្លាំងនគរបាលស្រុកសហការជាមួយកម្លាំងអាវុធហត្ថចុះទៅជួយជួសជុលភ្លាមដើម្បីឲ្យប្រជាពលរដ្ឋមានទីជំរកឡើងវិញ។សូមបញ្ជាក់ថានៅខេត្តបន្ទាយមានជ័យនៅពេលដែលមានគ្រោះធម្មជាត កើតឡើង ដែលនាំឲ្យផ្ទះប្រជាពលរដ្ឋរងការខូចខាតនោះកម្លាំងនគរបាល កម្លាំងអាវុធហត្ថកម្លាំងយោធានិងអាជ្ញាធរគ្រប់លំដាប់ថ្នាក់ បានរួមសហការគ្នាយ៉ាងជិតស្និតចុះទៅជួយសាងសង់ផ្ទះ ប្រជាពលរដ្ឋ ឡើងវិញភ្លាមៗផងដែរព្រមទាំងបាននាំយកអំណោយ ទៅចែកជូនដល់ពួកគេផងដែរ៕