បាត់ដំបង៖ នៅព្រឹកថ្ងៃទី 12-6-15 ក្នុងសាលមហោស្រព7មករា នាក្រុងបាត់ដំបង មានការរៀបចំពិធីគោរពវិញ្ញាណក្ខន្ធ សម្តេចអគ្គមហាធម្មពោធិសាល ជា សុីម ប្រធានព្រឹទ្ធសភា និងជាប្រធានគណបក្សប្រជាជនកម្ពុជា ដែលសម្តេចបានទទួលមរណភាពកាលពីថ្ងៃទី8-6-15
វេលាម៉ោង3,45នាទីរសៀល ក្នុងជន្មាយុ83ឆ្នាំ ដោយរោគាពាធ។
នៅក្នុងពិធីនេះផងដែរ គេសង្គេតឃើញវត្តមានរបស់លោក ច័ន្ទ សុផល អភិបាលនៃគណអភិបាលខេត្តបាត់ដំបង លោក អ៊ុក វង្ស ប្រធានក្រុមប្រឹក្សាខេត្ត មន្ត្រីរាជការ កងកំលាំងប្រដាប់អាវុធប្រជាពលរដ្ឋ និង សិស្សានុសិស្ស សរុបប្រមាណជិតមួយពាន់នាក់។
ស្ថិតក្នុងភាពដ៏សែនសោកសង្រេងនេះលោក អ៊ុយ រី អភិបាលរងខេត្តបានឡើងអាន
នូវសាររំលែកទុក្ខរបស់ក្រុមប្រឹក្សាខេត្ត ដើម្បីឆ្លើយតបនូវការដឹងគុណយ៉ាងជ្រាលជ្រៅដល់សម្តេចអគ្គមហាធម្មពោធិសាល ជា សុីម ដែលសម្តេចបានលះបង់នូវកំលាំងកាយ កំលាំងចិត្ត ព្រមទាំងអាយុជីវិតដើម្បីបុព្វហេតុប្រទេសជាតិ និងមាតុភូមិកម្ពុជា ដោយសម្តេចបានបន្សល់ទុកនូវស្នាដៃយ៉ាងធំធេង សម្រាប់កូនចៅជំនាន់ក្រោយ។
នាឱកាសនោះដែរ លោកអ៊ុក វង្ស ប្រធានក្រុមប្រឹក្សាខេត្ត បានឡើងអាននូវជីវប្រវត្តរបស់
សម្តេច ជា ស៊ីម ប្រធានព្រឹទ្ធសភា និងជាប្រធានគណបក្សប្រជាជនកម្ពុជា ដែលសម្តេចបានចូលរួមក្នុងចលនាតស៊ូ ដើម្បីផ្តួលនូវរបបកម្ពុជាប្រជាធិបតេយ្យ ដែលជារបបវាលពិឃាតពោរពេញដោយភ្នំឆ្អឹង និងសមុទ្រឈាម និងធ្វើអោយប្រជារាស្ត្រខ្មែរស្លាប់អស់ជាង3លាននាក់។
ក្រោមការដឹកនាំចលនាតស៊ូរបស់សម្តេចទើបនៅថ្ងៃទី2 ខែធ្នូ ឆ្នាំ1978 រណសិរ្សសាមគ្គី
សង្គ្រោះជាតិ ត្រូវបានបង្កើតឡើង ព្រមទាំងបានវាយផ្តួលរំលំរបបនូវរបបវាលពិឃាតដោយទទួលបានជ័យជំនះយ៉ាងត្រចះត្រចង់នាថ្ងៃ7 ខែមករា ឆ្នាំ1979។ឆ្លងតាមរយ:នៃការតស៊ូនេះដែរ កម្ពុជាត្រូវបានប្រែមុខមាត់ទៅជាប្រទេសមួយដែលមានការអភិវឌ្ឍយ៉ាងជឿនលឿនជាទីបំផុត ក្រោមការដឹកនាំដ៏ឈ្លាសវៃរបស់សម្តេចទាំង3។ក្នុងរយ:ពេលជាង30ឆ្នាំនៃការខិតខំប្រឹងប្រែងរបស់សម្តេចជា ស៊ីម ទាំងវិស័យពុទ្ធចក្រ និងអាណាចក្រមានការរីកចំរើនគួរអោយកត់សំគាល់ នៅទីបំផុតសម្តេចក៏បានទទួលមរណភាព ក្រោមការគោរព និងដឹងគុណយ៉ាងជ្រាលជ្រៅពីសំណាក់ប្រជាពលរដ្ឋនៅទូទាំងព្រះរាជាណាចក្រកម្ពុជា ដែលមិនអាចបំភ្លេចបាន។
ជាចុងក្រោយទាំងអាជ្ញាធរខេត្ត ក៏ដូចជាមន្ត្រីរាជការ កងកំលាំងប្រដាប់អាវុធ និងប្រជាពលរដ្ឋ
ទាំងអស់បានបំពាក់កម្រងផ្កាដល់សម្តេច ទុកជាការ គោរពនិងដឹងគុណដោយចងចាំជានិច្ចនៅក្នុងក្រអៅបេះដូងជារៀងរហូតគ្មានថ្ងៃបំភ្លេចបានឡើយ៕
