ខេត្តប៉ៃលិន៖ នៅព្រឹកថ្ងៃទី ១២ ខែមិថុនា ឆ្នាំ២០១៥ ស្ថិតក្នុងស្នាក់ការគណបក្សប្រជាជនកម្ពុជាខេត្ត មានរៀបចំធ្វើពិធីរាប់បាត្របង្សុកូលដើម្បីឧទ្ទិសកុសល ជូនដួងវិញ្ញាណក្ខន្ធ សម្តេចអគ្គមហាធម្មពោធិសាលជា ស៊ីម អតីតប្រធានព្រឹទ្ធសភាជាតិ និងជាប្រធានគណៈបក្ស
ប្រជាជនកម្ពុជា ក្រោមការដឹកនាំរបស់ឯកឧត្តម ឡី ចាន់ឆាយ ប្រធានក្រុមប្រឹក្សាខេត្តប៉ៃលិន ឯកឧត្តម កើត សុធា ជាអភិបាល នៃគណៈអភិបាលខេត្តប៉ៃលិន ព្រមទាំងមានការចូលរួមពីសំណាក់មន្ត្រីរាជការតាមមន្ទីរសា្ថប័នរដ្ឋ អង្គភាពជុំវិញខេត្ត និងឥស្សរជនសំខាន់ៗយ៉ាងច្រើនកុះករ ។
សូមបញ្ជាក់ថា៖ សម្តេចអគ្គមហាពោធិសាលជា ស៊ីម ប្រធានគណបក្សប្រជាជន កម្ពុជា និងជាអតីតប្រធានព្រឹទ្ធសភា បានទទួលមរណភាព កាលពីថ្ងៃច័ន្ទ ៧រោច ខែជេស្ឋ ឆ្នាំមមែ សប្តស័ក ព.ស. ២៥៥៩ ត្រូវនឹងថ្ងៃទី៨ ខែមិថុនា ឆ្នាំ២០១៥ វេលាម៉ោង ១៥ និង ៤៥ នាទី ក្នុងជន្មាយុ ៨៣ ឆ្នាំ ដោយរោគាពាធ ។ សម្តេចអគ្គមហាធម្មពោធិសាល ជា ស៊ីម អតីតប្រធានព្រឹទ្ធសភា និងជាប្រធានគណបក្សប្រជាជនកម្ពុជា ក្នុងមួយជីវិតរបស់សម្តេច បានលះបង់កម្លាំងកាយ និងកម្លាំងចិត្តក្នុងការតស៊ូរំដោះជាតិ មាតុភូមិ ពិសេសការតស៊ូរំដោះប្រទេសជាតិឲ្យរួចចាកផុតពីរបបប្រល័យពូជសាសន៍ ខ្មែរក្រហម នាឆ្នាំ១៩៧៩ និងបន្តចូលរួមដឹកនាំ កសាង និងអភិវឌ្ឍន៍ប្រទេសជាតិ ឲ្យមានការរីកចម្រើនរុងរឿងដូចបច្ចុប្បន្ននេះ។
ប្រជាពលរដ្ឋ និងមន្ត្រីរាជការទូទាំង ខេត្តប៉ៃលិន មានការសោកស្តាយ អាឡោះអាល័យជាអនេក ចំពោះការបាត់បង់វីរជនតស៊ូរំដោះទឹកដីកម្ពុជាចេញពីរបបសង្គ្រាម កសាងប្រទេសជាតិពីបាតដៃទទេ រហូតទទួលបានភាពរីកចម្រើន និងអភិវឌ្ឍន៍ដូចបច្ចុប្បន្ន។ ចំពោះការលាចាកលោក របស់សម្តេចអគ្គមហាធម្មពោធិសាលជា ស៊ីម គឺជាទុក្ខដ៏ក្រៀមក្រំរបស់ប្រជាពលរដ្ឋខ្មែរគ្រប់រួប ព្រោះសម្តេចមានគុណបំណាក់ដ៏មហាធំធេងបំផុត ក្នុងការរំដោះទឹកដី ជួយសង្គ្រោះអាយុជីវិតប្រជាជនរាប់លាននាក់ ចេញពីរបបបនប្រល័យពូជសាសន៍ប៉ុល ពត។
ដោយសារវីរភាពដ៏ខ្ពង់ខ្ពស់របស់សម្តេចមហាធម្មពោធិសាលជា ស៊ីម ទើបរាជរដ្ឋាភិបាលកម្ពុជា បានចេញសារាចរណែនាំ ចុះថ្ងៃទី៨ ខែមិថុនា ឆ្នាំ២០១៥ កន្លងមក ថា៖ ប្រកាសយកថ្ងៃទី១៩ ខែមិថុនា ឆ្នាំ២០១៥ ជាថ្ងៃកាន់ទុក្ខជាផ្លូវការ ហើយគ្រប់ក្រសួង ស្ថាប័ន សាលារៀន មន្ទីរពេទ្យរបស់រដ្ឋ ឯកជនទាំងអស់ និងមន្ត្រីរាជការ កងកម្លាំងប្រដាប់អាវុធគ្រប់ប្រភេទ គ្រប់ទីវត្តអារាម ព្រមទាំងប្រជាជនទូទាំងប្រទេស ត្រូវបង្ហូតទង់ជាតិត្រឹមមួយភាគបីនៃដងទង់ជាតិ នៅថ្ងៃទី១៩ ខែមិថុនា ឆ្នាំ២០១៥ ,ចំពោះគ្រប់ស្ថានីយវិទ្យុ ទូរទស្សន៍ជាតិ និងឯកជនទាំងអស់ ត្រូវផ្អាកការសំដែង និងការចាក់ផ្សាយនូវទស្សនីយភាពផ្សេងៗ ដែលមានលក្ខណៈសប្បាយគគ្រឹកគគ្រេង នៅថ្ងៃទី១៩ ខែមិថុនា ឆ្នាំ២០១៥ នេះ ៕
