ខេត្តសៀមរាប៖ ថ្លែងកិច្ចប្រជុំកាលពីព្រឹកថ្ងៃទី២៤ខែមិថុនា កន្លងទៅថ្មីៗនេះលោក ឃឹម ប៊ុនសុង អភិបាលនៃគណអភិបាលខេត្តសៀមរាបបានមានប្រសាសន៍រិះគន់ មន្ត្រីអនុវត្តច្បាប់មួយចំនួន ថាបានបណ្តែត បណ្តោយឲ្យមានបទល្មើសគ្រប់ប្រភេទដូចជា៖បទល្មើសនេសាទ,ព្រៃឈើ,គ្រឿងញៀន,ចោរកម្ម,អសន្តិសុខសណ្តាប់ធ្នាប់,ចរាចរណ៍ នៅតែបន្តកើតមានយ៉ាងច្រើននៅលើទឹកដីសៀមរាប ហើយលោកស្នើឲ្យមន្ត្រីពាក់ព័ន្ធទាំងអស់បង្កើនការយកចិត្តទុកដាក់អនុវត្តលើការងាររបស់ខ្លួនឲ្យកាន់តែមានប្រសិទ្ធិភាពបន្ថែមទៀត។
ថ្លែងចំពោះមុខមន្ត្រីរាជការ កងកម្លាំងប្រដាប់អាវុធនិងស្ថាប័នតុលាការលោក ឃឹម ប៊ុនសុងបានមានប្រសាសន៍ថា រាជរដ្ឋាភិបាលកម្ពុជាក្រោមការដឹកនាំផ្ទាល់របស់សម្តេចអគ្គមហាសេនាបតី តេជោហ៊ុនសែន បានប្រឹងប្រែងយកចិត្តទុកដាក់នឹងជំរុញឲ្យមានការអភិវឌ្ឍន៍គ្រប់វិស័យ ក្នុងនោះបង្ហាញប្រព័ន្ធយុត្តិធម៌ក៏ត្រូវផ្តោតការយកចិត្តទុកដាក់អនុវត្តឲ្យកាន់តែស៊ីជំរៅថែមទៀត។លោក ឃឹម ប៊ុនសុងបន្តថា នៅក្នុងភូមិសាស្ត្រខេត្តសៀមរាបនៅមានបទល្មើសនិងបញ្ហាប្រឈមជាច្រើនទៀត ដែលចេះតែបន្តកើតមានដូចជាៈបទល្មើសនេសាទ,ព្រៃឈើ,គ្រឿងញៀន,ចោរកម្ម,អសន្តិសុខសណ្តាប់ធ្នាប់,ចរាចរណ៍ ជាដើម។លោកគួរបញ្ជាក់ទៀតថា ដើម្បីដោះស្រាយបញ្ហាទាំងនេះ ទាមទារឲ្យមន្ត្រីជំនាញទទួលខុសត្រូវនិងអនុវត្តច្បាប់ឲ្យមានប្រសិទ្ធិភាពខ្ពស់បន្ថែមទៀត ។លោកគូសបញ្ជាក់ទៀតថា <<ទន្ទឹមនឹងកិច្ចប្រឹងប្រែងពីថ្នាក់ដឹកនាំនិងមន្ត្រីរាជការជាច្រើនក៏គេនៅសង្កេតឃើញថា មានសកម្មភាពបទល្មើសនេសាទនៅផ្ទៃបឹងទន្លេសាបក្នុងភូមិសាស្ត្រខេត្តសៀមរាប ដែលសមត្ថកិច្ចជំនាញហាក់មិនទាន់សកម្មនៅឡើយ ក្នុងការអនុវត្តតួរនាទីឬអាចមានការត្រូវរ៉ូវគ្នានិងឆ្លៀតឱកាសទាញយកផលប្រយោជន៍ផ្ទាល់ខ្លួន>>។មិនត្រឹមតែលោកដាស់តឿនមន្ត្រីជលផលប៉ុណ្ណោះទេ សូម្បីតែជំនាញរដ្ឋបាលព្រៃឈើក៏លោកថា ហាក់មិនសូវមានការអនុវត្តច្បាប់ឲ្យមានប្រសិទ្ធិភាពនៅឡើយទេ។ ជាកិច្ចបញ្ចប់ លោក ឃឹម ប៊ុនសុង បានជំនុញឲ្យស្ថាប័នតុលាការ ជលផល រដ្ឋបាលព្រៃឈើ បរិស្ថាន នគរបាល និងអាវុធហត្ថ ដែលជាមន្ត្រីពាក់ព័ន្ធទាំងអស់ ត្រូវបន្តអនុវត្តច្បាប់ឲ្យបានម៉ឺងម៉ាត់បន្ថែមទៀត។ការលើកឡើងក្នុងកិច្ចប្រជុំយ៉ាងដូច្នេះ របស់លោក អភិបាលខេត្ត គឺបន្ទាប់ពីមានប្រព័ន្ធផ្សព្វផ្សាយក្នុងស្រុកមួយចំនួនបានចុះផ្សាយពីភាពមិនប្រក្រតីនិងការព្រងើយកន្តើយរបស់ជំនាញជលផលនិងជំនាញរដ្ឋបាលព្រៃឈើដែលធ្វើឲ្យបទល្មើសចេះតែកើនឡើងឥតឈប់ឈរក្នុងខេត្តសៀមរាប។យ៉ាងនេះក្តីលោក ឃឹម ប៊ុនសុង គ្រាន់តែជំរុញឲ្យមន្ត្រីក្រោមឱវាទរបស់លោកប្រឹងប្រែងធ្វើការបន្ថែមទៀត ប៉ុន្តែលោកមិនបានបញ្ជាក់ពីទោសទន្តរបស់មន្ត្រីរាជការណាមួយប្រព្រឹត្តអំពើពុករលួយដែលធ្វើឲ្យប៉ះពាល់ដល់ប្រទេសជាតិនោះឡើយ៕