ខេត្តសៀមរាប នៅក្នុងឱកាសដែលបញ្ជាការដ្ឋានកងរាជអាវុធខេត្តសៀមរាប ប្រារព្ធបិទវគ្គហ្វឹកហ្វឺនបំប៉នវគ្គទី២ ប្រចាំឆមាសទី២ ឆ្នាំ២០១៥ នៅក្នុងចំណោមសិក្ខាកាមចំនួន ១៧១នាក់ គេឃើញមានការចូលរួមផងដែរ ពីសំណាក់ជនស៊ីវិលចំនួន៣៥នាក់ ដែលនោះគឺជាជនពិសេសជាងគេនៅក្នុងកម្មវិធីនោះ ។គណចាត់តាំងកម្មវិធី បានប្រកាសឲ្យដឹងនៅក្នុងពិធីនោះ នារសៀលថ្ងៃទី២៤ ខែកក្កដា ឆ្នាំ២០១៥ ដោយបញ្ជាក់ថា ស្របពេលបញ្ជាការដ្ឋានកងរាជអាវុធហត្ថខេត្តសៀមរាប បិទវគ្គហ្វឹកហ្វឺនប្រចាំឆមាសទី២នេះ គឺត្រូវបានភ្ជាប់ជាមួយនឹងការអបអរសាទរ ខួបអនុស្សាវរីយ៍លើកទី២២ ទិវាកងរាជអាវុធហត្ថ ( ១៤ កក្កដា ១៩៩៣ -១៤ កក្កដា ២០១៥ ) ដែលក្នុងនេះ អង្គពិធីមានកិក្តិយស ដោយបានជួបសំណេះសំណាលជាមួយ រៀមច្បងនិវត្តន៍ជន គ្រួសាររបស់កងរាជអាវុធហត្ថ ពលី មរណៈ ពិការ មានជម្ងឺ និងបាត់បង់សមត្ថភាពការងារ ដែលជាជនមានគុណបំណាច់ចំនួន ៣៥ នាក់ ។
ឧត្តមសេនីយ៍ត្រី ប៉ោ វណ្ណនិត បានបង្ហាញនូវការកោតសរសើរ និងដឹងគុណចំពោះនិវត្តន៍ជន ជនបាត់បង់សមត្ថភាពការងារ ដែលជាអតីតកងរាជអាវុធហត្ថ ព្រមជាមួយនឹងការគោរពដឹងគុណ ចំពោះវីរភាពរបស់កងរាជអាវុធហត្ថគ្រប់ជំនាន់ ដែលបានពលី មរណៈ ក្នុងបុព្វហេតុជាតិ មាតុភូមិ និងប្រជាជន
ជាមួយឱកាសនោះដែរ ឧត្តមសេនីយ៍ត្រីមេបញ្ជាការ បានថ្លែងនូវការកោតសរសើរផងដែរ ចំពោះនាយទាហាន នាយទាហានរង និង ពលទាហានកងរាជអាវុធហត្ថទាំងអស់ ដែលបានរួបរួមសាមគ្គីគ្នា បំពេញភារកិច្ចដោយជំហរទទួលខុសត្រូវខ្ពស់ សម្រេចបានស្នាដៃនិងសមិទ្ធផលជាច្រើន នាំមកនូវកិត្តិយស កេរឈ្មោះ និង សេចក្តីថ្លៃថ្នូរ ធ្វើឲ្យគ្រប់មជ្ឈដ្ឋាន មានការជឿជាក់ ទទួលស្គាល់ពីភាពចាំបាច់ និងមិនអាចខ្វះបាន នូវវត្តមានរបស់កងរាជអាវុធហត្ថ ។
ជាមួយនឹងការជួបសំណេះសំណាលសួរសុខទុក្ខនិវត្តន៍ជន ជនបាត់បង់សមត្ថភាពការងារ និងគ្រួសារកងរាជអាវុធហត្ថ ដែលមានគុណបំណាច់ចំពោះបុព្វហេតុជាតិ កម្មវិធីបាននាំយកទៅជាមួយនូវអំណោយមួយចំនួនផងដែរ ដែលជាសក្ខីកម្មបង្ហាញថា ជានិច្ចកាល រាជរដ្ឋាភិបាល ក៏ដូចជាអង្គភាពដែលធ្លាប់រស់នៅបំពេញភារកិច្ច មិនឃ្លាតឆ្ងាយពីបងប្អូននោះឡើយ ៕
ដោយគឿនវ៉េត
