ខេត្តព្រះវិហារ តាមសេចក្ដីរាយការណ៍បានអោយដឹងថាកំលាំងសន្តិសុខក្រុមហ៊ុនសម្បទានសេដ្ឋកិច្ចសិលាដាមិចនិងអេបភលហ្វ័រខាស់បានចូលទន្ទ្រានដីចំការប្រជាពលរដ្ឋដែលនៅផុតពីព្រំប្រទល់ដីវិនិយោគរបស់ក្រុមហ៊ុនក្នុងការឃាត់គ្រឿងចក្ររបស់ប្រជាកសិករមិនអោយភ្ជួររាស់ធ្វើចំការនិងបានយកគ្រឿងចក្រសាហ្ស័រទៅដឹកគ្រឿងឈើសំរាប់ធ្វើផ្ទះរបស់ពលរដ្ឋថែមទៀត។ភ្នាក់ងារបានរាយការណ៍អោយដឹងថានៅវេលាម៉ោង៩ព្រឹកថ្ងៃទី២៥កក្កដា២០១៥ស្ថិតនៅឃុំស្តៅស្រុកសង្គមថ្មីមានកំលាំងសន្ដិសុខក្រុមហ៊ុនដាំកៅស៊ូសិលាដាមិចរាប់សិបនាក់បានចូលទន្ទ្រាននិងឈ្លានពានដីចំការរបស់ប្រជាកសិករក្នុងការឃាត់គ្រឿងចក្រភ្ជួរដីធ្វើចំការវិលជុំនិងដើប្រមូលគ្រឿងឈើអារសំរាប់សង់លំនៅដ្ឋានថែមទៀតផង។ការចូលទៅបង្ករឿងជាមួយកសិករមិនឃើញខាងក្រុមហ៊ុនសិលាដាមិចសហការជាមួយមន្ដ្រីអាជ្ញាធរមូលដ្ឋាននោះទេ។
ប្រភពព័ត៌មានបន្តថាដោយឃើញសកម្មភាពរំលោភសិទ្ធរស់នៅរបស់ប្រជាពលរដ្ឋបានបង្កការភ្ញាក់ផ្អើលដល់ប្រជាកសិករក្នុងមូលដ្ឋានប្រមាណ១០០នាក់បាននាំគ្នាទៅហ៊ុមព័ទ្ធនិងរារាំងកំលាំងសន្តិសុខខាងលើមិនអោយចាកចេញពីកន្លែងបង្កហេតុនោះទ្បើយ។កំលាំងសន្ដិសុខក្រុមហ៊ុនសិលាដាមិចបានចុះទៅបង្កហេតុដល់ដីចំការប្រជាកសិករដោយតាំងខ្លួនឯងជាកំលាំងអាជ្ញាធរដែនដីតែម្ដង។
ប្រជាពលរដ្ឋនិយាយថាក្រុមហ៊ុនអេបភលហ្វ័រខាស់បំបែកខ្លួនចេញពីក្រុមហ៊ុនសិលាដាមិចព្រោះផ្ទៃដីព្រៃនៅទីនោះមានទំហំជិត២ម៉ឺនហិកតាដោយនាយកក្រុមហ៊ុនសិលាដាមិចជាមន្ដ្រីយោធាពាក់ផ្កាយ៣ឈ្មោះសំណាង។កម្មវិធីវិនិយោគហាក់ដូចជាមិនរីកចំរើនទៅមុខសោះពិសេសឧស្សាហ៍មានវិវាទដីធ្លីជាមួយប្រជាពលរដ្ឋដែលរស់នៅក្បែរៗទីតាំងដីក្រុមហ៊ុនខ័ណ្ឌចែកដោយបង្គោលព្រំដី។
ប្រភពព័ត៌មានពីមន្ដ្រីរដ្ឋបាលព្រៃឈើខេត្តព្រះវិហារបានបង្ហើបអោយដឹងថាក្រុមហ៊ុនអេបភលហ្វ័រខាស់១នេះមិនសូវឮឈ្មោះលេចមុខនោះទេហើយបានបង្កកផ្ទៃដីវិនិយោគទុកចោលមិនអនុវត្តកម្មវិធីវិនិយោគជិត១០ឆ្នាំមកហើយបើតាមផ្លូវច្បាប់រដ្ឋត្រូវដកហូតអាជ្ញាប័ណ្ណមកវិញ។អ្នកសារព័ត៌មានបានព្យាយាមទំនាក់ទំនងសុំការបំភ្លឺពីប្រធានក្រុមហ៊ុនសិលាដាមិចខាងលើប៉ុន្តែមិនអាចទាក់ទងបានដោយសារស្រាវជ្រាវរកលេខទូរស័ព្ទពីអាជ្ញាធរមូលដ្ឋានមិនបាន។អ្នកសារព័ត៌មានរង់ចាំការបំភ្លឺពីប្រធានក្រុមហ៊ុនសិលាដាមិចជានិច្ច៕
