កំពង់ឆ្នាំង៖ ផ្លូវលំមួយខ្សែប្រវែងប្រមាណ២០០ម៉ែត្រ ដែលកសាងឡើងដោយប្រាក់បដិភាគរបស់ឃុំ ត្រូវបានទឹកភ្លៀងហូរច្រោះអស់មួយចំនួន និងអាចប្រឈមនឹងការខូចខាតទាំងស្រុងនៅពេលមានភ្លៀងធ្លាក់ជោគជាំក្នុងពេលខាងមុខនេះ ដោយសាតែម្ចាស់ដី និងជាម្ចាស់គ្រឿងចក្រម្នាក់ បានជីកកកាយយ៉ាងជ្រៅ យកដីលក់ជាប់នឹងផ្លូវលំខាងលើ ទោះបីប្រជាពលរដ្ឋក្នុងភូមិបានរាយការណ៍ជូនអាជ្ញាធរឃុំអោយជួយទប់ស្កាត់ តែមិនត្រូវបានអាជ្ញាធរមូលដ្ឋានមានចាត់ការឡើយ។ផ្លូវលំខាងលើនេះស្ថិតនៅចំណុចខ្ទមលោកតាស្អាង ភូមិអន្លុងជ្រៃ ឃុំអណ្តូងស្នាយ ស្រុករលាប្អៀរ ខេត្តកំពង់ឆ្នាំង។ នៅល្ងាចថ្ងៃទី២៦ ខែកក្កដា ឆ្នាំ២០១៥ ប្រជាពលរដ្ឋនៅក្នុងភូមិអណ្តូងជ្រៃបាននាំក្រុមអ្នកសារព័ត៌មានយើងទៅចង្អុលបង្ហាញនៅចំណុចខាងលើ និងបាននិយាយអោយដឹងថា៖ផ្លូវលំមួយខ្សែនេះជាផ្លូវចាស់តាំងពីសង្គម សំរាប់ដូនជីតាជី
ដើរទៅកាន់វត្តភ្នំតានាន់ធ្វើបុណ្យទាន។ ត្រូវបានអាជ្ញាធរឃុំកសាងដោយប្រាក់បដិភាគឃុំ ប្រមាណ៤ឆ្នាំមកហើយ រីឯម្ចាស់ដីនិងជាម្ចាស់គ្រឿងចក្រដែលបានបំផ្លិចបំផ្លាញផ្លូវលំខាងលើនេះមានឈ្មោះ ធៀប រស់នៅក្នុងភូមិអណ្តូងជ្រៃ នេះដែរ។កន្លងមកថ្មីៗនេះ គេបានទិញដីពីប្រជាពលរដ្ឋដែលជាប់និងដីចំណីផ្លូវខាងលើនេះ ហើយបានយកគ្រឿងចក្រមកជីកកកាយយកអាចម៍ដីដឹកលក់ ដោយបានជីកយកទាំងដីចំណីផ្លូវលំនេះទាំងសងខាង ដែលមានជម្រៅពី៣មទៅ៥ម ដោយបានធ្វើអោយផ្លូវកន្លែងខ្លះ ត្រូវទឹកភ្លៀងហូរច្រោះខូចជាបណ្តើរៗទៅហើយ។ប្រជាពលរដ្ឋយល់ថាបើមានភ្លៀងធ្លាក់ជោគជាំមកនោះ ផ្លូវនោះពិតជាត្រូវរងការខូចខាតទាំងស្រុងមិនខានឡើយ។ ទន្ទឹមនោះដែរក៍មានការប៉ះពាល់ជាមួយព្រំដីប្រជាពលរដ្ឋជាច្រើនគ្រួសារទៀតផងដែរ ដោយគេបានជីកកកាយដីយ៉ាងជ្រៅជាប់ព្រំប្រទល់ជាមួយគ្នាតែម្តង។ ប្រជាពលរដ្ឋបានអោយដឹងទៀតថា៖ថ្មីៗនេះ ពួកគាត់ក៍ធ្លាប់បានរាយការណ៍ទៅសមត្ថកិច្ច និងអាជ្ញាធរមូលដ្ឋានផងដែរ ដើម្បីអោយជួយទប់ស្កាត់ករណីខាងលើនេះ ប៉ុន្តែមិនបានអ្នកណាឈឺឆ្អាល និងទប់ស្កាត់អោយឡើយ។ពួកគាត់គិតថា បើសិនជាសមត្ថកិច្ច និងអាជ្ញាធរមូលដ្ឋាននៅតែបណ្តែតបណ្តោយគ្មានវិធានការណ៍ទប់ស្កាត់ទេនោះ ផ្លូវលំមួយខ្សែនេះពិតជារលាយខូចក្លាយទៅជាអូរជាមិនខាន។ ប្រជាពលរដ្ឋសំណូមពរដល់មន្ទីរសាធារណៈការខេត្ត មន្ទីររ៉ែនិងថាមពលខេត្ត លោកអភិបាលស្រុករលាប្អៀរ និងលោកអភិបាលខេត្ត មេត្តាជួយបញ្ជូនក្រុមការងារចុះមកត្រួតពិនិត្យ និងចាត់វិធានការណ៍ជាបន្ទាន់ និងអោយបានម៉ឺងម៉ាត់ចំពោះអ្នកបានបំផ្លាញផ្លូវលំខាងលើនេះ ដែលជាសម្បត្តិសាធារណៈ ដើម្បីបំរើផលប្រយោជន៍របស់ប្រជាពលរដ្ឋផង ព្រោះពួកគាត់មានក្តីកង្វល់ខ្លាំងណាស់។
លោក សុខ យ៉ាន មេឃុំអណ្តូងស្នាយ នៅល្ងាចដែរបានអោយដឹងថា៖ ការជីកកាយយកអាចម៍ដីនេះប៉ះពាល់ដល់ដីចំណីផ្លូវលំដី សនេះ គឺលោកបានដឹងនិងបានធ្វើការឃាត់ឃាំងដែរតែគេមិនស្តាប់។រឿងនេះ លោកមិនមានវិធានការណ៍អ្វីទេ ព្រោះតែគេបានជីករួចទៅហើយ។ចំណែកការជីកកកាយប៉ះចំព្រំដីប្រជាពលរដ្ឋមួយចំនួនទៀតនោះ លោកក៍មិនដឹងជាធ្វើយ៉ាងម៉េចដែរ។ លោក សោម វឺន អភិបាលស្រុករលាប្អៀរបានប្រាប់អោយដឹងថា៖ករណីនេះ លោកមិនបានដឹងទេ ប៉ុន្មានថ្ងៃនេះលោករវល់ណាស់ ប៉ុន្តែលោកនឹងចុះទៅមើលដោយផ្ទាល់ ថាតើមានផលប៉ះពាល់ប៉ុណ្ណា និងត្រូវមានវិធានការណ៍បែបណាទៀត លោកនឹងប្រាប់អោយដឹងនៅពេលក្រោយ។ នៅក្នុងច្បាប់ស្តីពីផលប៉ះពាល់ដីចំណីផ្លូវថ្នល់ នៅក្នុងមាត្រាទី៧០នៃច្បាប់ស្តីពីផ្លូវថ្នល់ចែងថា៖ ជនណាធ្វើអោយប៉ះពាល់ខូចខាតដល់ផ្លូវថ្នល់ តម្រូវអោយធ្វើការជួសជុលសងឡើងវិញអោយដូចស្ថានភាពដើម និងត្រូវផ្តន្ទាទោសតាមបញ្ញត្តិមាត្រាទី៤១៩នៃក្រមព្រហ្មទណ្ឌ័៕
