ខេត្តកំពង់ឆ្នាំង៖ « គ្រូពេទ្យត្រូវមាន គុណធម៌ សីសធម៌ វិជ្ជាជីវៈ និងសមត្ថភាពមាំទាំ ដើម្បីព្យាបាលអ្នក ជម្ងឺអោយបានជា » ឯកឧត្តម ធា គ្រុយ រដ្ឋលេខាធិការក្រសួងសុខាភិបាល និងជាប្រធានក្រុមប្រឹក្សា គណៈគ្រូពេទ្យជាតិ បានលើកឡើងបែបនេះ នៅក្នុងមហាសន្និបាតបោះឆ្នោត ជ្រើសរើសក្រុមប្រឹក្សា គណៈគ្រូពេទ្យខេត្តកំពង់ឆ្នាំង អណត្តិ៦ឆ្នាំលើកទី៣ នៅក្នុងមន្ទីរសុខាភិបាលខេត្តកំពង់ឆ្នាំង នាល្ងាចថ្ងៃទី៣០ ខែកក្កដា ឆ្នាំ២០១៥ ដោយមានការចូលរួមពី ឯកឧត្តម ឈួរ ច័ន្ទឧឿន អភិបាលខេត្ត នៃគណៈអភិ បាលខេត្តកំពង់ឆ្នាំង និងក្រុមប្រឹក្សា សមាជិកគណៈគ្រូពេទ្យខេត្ត ចំនួន៧០នាក់ចូលរួមបោះឆ្នោត។ ឯកឧត្តម ធា គ្រុយ រដ្ឋលេខាធិការក្រសួងសុខាភិបាល និងជាប្រធានក្រុមប្រឹក្សា គណៈគ្រូពេទ្យជាតិបានលើកឡើងទៀតថា៖ ក្រុមប្រឹក្សាគណៈគ្រូពេទ្យជាស្ថាប័នជាតិ ដែលបង្កើតឡើងដោយព្រះរាជក្រិត្យ ដើម្បីគ្រប់គ្រងចុះបញ្ជីការ គ្រូពេទ្យគ្រប់ទីកន្លែង និងចេញអាជ្ញាបណ្ណ័បញ្ជាក់ថា គ្រូពេទ្យទាំងអស់នោះជាគ្រូពេទ្យគុណាវុធមានសញ្ញាប័ត្រ និងមានវិជ្ជាជីវៈយ៉ាងពិតប្រាកដ មានសមត្ថភាពអាចព្យាបាលអ្នកជម្ងឺបានទៅតាមជំនាញនៃវិជ្ជាជីវៈ។គណៈគ្រូពេទ្យ ត្រូវលុបបំបាត់ចោលអោយអស់គ្រូពេទ្យ គ្មានស ញ្ញាប័ត្រ ដែលបង្កគ្រោះថ្នាក់ដល់សុខភាពប្រជាពលរដ្ឋ និងអាយុជីវិតអ្នកជម្ងឺ។ត្រូវប្រុងប្រយត្ន័កុំអោយដូចករណីគ្រូពេទ្យឃុំរកា ខេត្តបាត់ដំបង មកលងយើងទៀតបានអោយសោះ។
ឯកឧត្តមបានគូសបញ្ជាក់ទៀតថា៖គ្រូពេទ្យត្រូវតែគុណធម៌ កុំលោភលន់លុយអ្នកជម្ងឺ ត្រូវចាត់ទុកអ្នកជម្ងឺដូចជាប្អូនបង្កើត ឬម្តាយបង្កើតរបស់យើង បើយើងគ្មានសមត្ថភាព ឬគ្មានឧបរណ៍ទំនើបព្យាបាលទេនោះត្រូវបញ្ជូនអ្នកជម្ងឺ ទៅគ្រូពេទ្យឬមន្ទីរពេទ្យជំនាញដែលមានសមត្ថភាពកុំលោភលន់ទុកអ្នកជម្ងឺអោយមានគ្រោះថ្នាក់ និងត្រូវយកចិត្តទុកដាក់ព្យាបាល អោយក្រុមគ្រួសារអ្នកជម្ងឺអស់ចិត្ត ស្ងប់ចិត្ត និងអរគុណដល់គ្រូពេទ្យយើង ទោះបីប្រពន្ធកូនគាត់មានគ្រោះថ្នាក់ដល់ជីវិតក៏ដោយ ក៏ពួកគាត់បានស្ងប់ចិត្តព្រោះតែបានឃើញយើងជាគ្រូពេទ្យបានប្រឹងប្រែងអស់សមត្ថភាពហើយនោះ។
នៅក្នុងពិធីនេះដែរ ឯកឧត្តម ឈួរ ច័ន្ទឌឿន អភិបាលខេត្ត បានថ្លែងថា៖វិស័យសុខាភិបាលជាវិស័យអាទិភាព ដែលប្រមុខរាជរដ្ឋាភិបាលបានចាត់ទុក សុខភាពប្រជាពលរដ្ឋជាស្នូល នៃការអភិវឌ្ឍន៍ធន ធានមនុស្ស ដើម្បីសំរេចបានវឌ្ឍនភាព សេដ្ឋកិច្ចសង្គម ប្រកបដោយចេរភាព។ ស្របតាមន័យខាងលើនេះ វិស័យសុខាភិបាលខេត្តកំពង់ឆ្នាំងបានកែទំរង់ និងអភិវឌ្ឍន៍ការកសាងធមធានមនុស្ស និងបន្តស្តារហេដ្ឋារចនាសម្ពន្ធ័រូបវ័ន្ត រំលេចចេញជា ការិយាល័យស្រុកប្រតិប្តិចំនួន៣ មន្ទីរពេទ្យបង្អែកចំនួន៣ មណ្ឌ លសុខភាពចំនួន៥០ និងប៉ុស្តិសុខភាពចំនួន២ នៅពេលខាងមុខយើងនិងខិតខំពង្រីកបន្ថែមទៀត ដើម្បីអោយដល់ប្រជាពលរដ្ឋតាមជនបទមានភាពងាយស្រួលក្នុងការព្យាបាលជម្ងឺ។
នៅក្នុងមហាសន្និបាតនេះដែរគណៈកម្មការរៀបចំការបោះឆ្នោតដែលបានចាត់តាំងឡើង បានដំ ណើរការបោះឆ្នោតជ្រើសរើសក្រុមប្រឹក្សាគណៈគ្រូពេទ្យខេត្ត អណត្តិ៦ឆ្នាំ លើកទី៣តាមនិតិវិធី ដោយមា នការចូលរួមពិនិត្យនិងដឹកនាំបោះឆ្នោតពី ឯកឧត្តម ឡាំ អេងហួរ គណៈគ្រូពេទ្យជាតិ និងមានបេក្ខជនឈរឈ្មោះចំនួន២១រូប ដែលរើសយក៩រូបជាក្រុមប្រឹក្សាគណៈគ្រូពេទ្យខេត្ត និង៩រូបជាសមាជិកបំរុង។
ជាលទ្ធផលគឺ៖ ១លោក សូរិន្ទ ទីរ៉ាវុឌ្ឍី ជាប្រធាន , ២លោក មុំ ហៀងហេង , ៣លោក គង់ ច័ន្ទធា (ជាអនុប្រធានទាំង២រូប) . ៤លោក ងិន ចាន់សារ៉េត អគ្គលេខាធិការ , ៥លោក លឹម លៀងងួន , ៦លោក ផាន់ច័ន្ទតារា រងទទួលភូមិភាគ , ៧លោក ញូង ឃោសុខ , ៨លោក សុខគង់ និង៩លោក មាស ឌុតទី (ទាំង៣នាក់ជាហិរញ្ញឹក)។នៅក្នុងពិធីនោះដែរឯកឧត្តម ធា គ្រុយ បានប្រកាសទទួលស្គាល់និងប្រគល់ត្រាជូនគណៈគ្រូពេទ្យខេត្តថ្មី និងក៏បានជូនបណ្ណ័សរសើរដល់គណៈគ្រូពេទ្យខេត្តចាស់ទាំង៩រូបផងដែរ៕