ខេត្តកំពង់ធំ ៖ ការ៉ាស់សាំងអត់ច្បាប់មួយកន្លែង បានសាងសង់ទាំងបំពាន ទោះជាត្រូវបានហាមឃាត់ និង ជំទាស់ពីក្រសួងរៀបចំដែនដី និងមន្ទីរសូរិយោដីនគររូបណីយកម្ម និងសំណង់ខេត្តកំពង់ធំ យ៉ាងណាក្តី ក៏ ការ៉ាស់សាំងនេះ នៅតែសាងសង់ជាបន្តបន្ទាប់ ដោយឥតខ្លាចញញើតសូមម្បីតែបន្តិចឡើយ ។
ការ៉ាស់សាំងដែលកំពុងតែដំណើរការ យ៉ាងរលូននេះ ត្រូវបានសាងសង់បាន ៩០ភាគរយ ស្ថិតនៅភូមិ វាំង ឃុំ តាំងក្រសាំង ស្រុកសន្ទុក ខេត្តកំពង់ធំ យោងតាមការ ឆ្លើយបំភ្លឺរបស់លោក សុង ស៊ាំង ភេទ ប្រុស ជាម្ចាស់ការ៉ាស់សាំង បានឲ្យដឹងថា លោកសាងសង់ការ៉ាស់សាំងនេះ គឺស្រេចតែលោក ពេជ្រ សុធា អភិបាល ស្រុកសន្ទុក ព្រោះការងាររត់ការ បានប្រគល់អភិបាលស្រុកជាអ្នករត់ការ ទាំងអស់ទោះជាមានហេតុការ ផ្អាកឬមិនផ្អាកក្តី លោក អភិបាលជាអ្នកទទួលខុសត្រូវ ចំណែកឯកសារដែលបានសុំពីភូមិ ឃុំ ស្រុកនោះ គឺបានប្រគល់ឲ្យលោក ពេជ្រ សុធា អភិបាលស្រុកជាអ្នករក្សាទុក ។
លោក ពេជ្រ សុធា អភិបាលស្រុកសន្ទុក បានឲ្យដឹងតាមទូរស័ព្ទថា លោកបានបញ្ជូនឯកសារទៅមន្ទីរសូរិយោដី ខេត្ត តែត្រូវបានមន្ទីរបដិសេធមិនបានអនុញ្ញាតិការ៉ាស់សាំងនោះទេ លោកបានបន្តថាបើហាមឃាត់សូមឲ្យហាមឃាត់ទាំងអស់ទៅ ព្រោះកន្លែងលក់សាំងនៅទីប្រជុំជននេះ សុទ្ធតែមិនមានច្បាប់ ទាំងអស់ តែបើឲ្យផ្អាកធ្វើម្តេចនិងកើត ព្រោះអង្ករក្លាយជាបាយទៅហើយ ក្នុងនាមខ្ញុំជាអាជ្ញាធរ ត្រូវតែយោគ យល់ចំពោះប្រជាពលរដ្ឋ ។
លោក ឌិត ធន ប្រធានមន្ទីរសូរិយោដី ខេត្តកំពង់ធំ បានឲ្យដឹងថា ការ៉ាស់សាំង របស់លោក សុង ស៊ាំង មូលហេតុដែលមិនបានទទួលបានច្បាប់ អនុញ្ញាតិឲ្យសាង់សង់ ដោយសារតែ ការ៉ាស់សាំងជាប់និងវត្តអារាម ពាកព័ន្ឋនឹងរបងវត្ត ទីធ្លាដីតូចចង្អៀត នៅកន្លែងទីប្រជុំជន ជាប់ផ្ទះរបស់ប្រជាពលរដ្ឋ អាចបង្ករមហានិភ័យ បានគ្រប់ពេលវេលា ទីតាំងមិនអំណោយផលក្នុងការសាងសង់ ការ៉ាស់សាំង ទើបក្រសួង និងមន្ទីរមិនចេញ ច្បាប់អនុញ្ញាតិឲ្យចំណែកលោក អភិបាលស្រុកអ្នកអនុញ្ញាតិ គឺលោក ជាអ្នកទទួលខុសត្រូវចំពោះមុខច្បាប់។ 
