ខេត្តកណ្តាល៖ សមត្ថកិច្ចនគរបាលជំនាញបច្ចេកទេសនិងវិទ្យាសាស្ត្រស្រុកកណ្តាលស្ទឹង សហការជាមួយនគរបាលប៉ុស្តិ៍រដ្ឋបាលទ្រា និងគ្រូពេទ្យជំនាញនៃមណ្ឌលសុខភាពឃុំទ្រា ចុះទៅត្រួតពិនិត្យសាកសពបុរសម្នាក់ដែលបានដេកស្លាប់នៅចំណុចកណ្តាលវាលស្រែប្រាំងស្ថិតក្នុងភូមិរោងគោ ឃុំទ្រា ស្រុកកណ្តាលស្ទឹង ខេត្តកណ្តាល ។
មន្ត្រីនគរបាលស្រុកកណ្តាលស្ទឹងបានឲ្យដឹងថា ជនរងគ្រោះឈ្មោះ ស្រ៊ុន សុខុម ភេទប្រុស អាយុ៤២ឆ្នាំមុខរបរជាកសិករ មានប្រពន្ធនិងកូន បច្ចុប្បន្នស្នាក់នៅក្នុងភូមិរោងគោ ឃុំទ្រា ស្រុកកណ្តាលស្ទឹង ត្រូវបានស្ត្រីជាប្រពន្ធ និងកូនប្រទះឃើញស្លាប់នៅកណ្តាលវាលស្រែប្រាំង កាលពីវេលាម៉ោង១៦ និង៣០នាទី ថ្ងៃទី២៣ ខែមេសា ឆ្នាំ២០១៤ ។
សមត្ថកិច្ចនគរបាលជំនាញបច្ចេកទេស និង វិទ្យាសាស្ត្រស្រុកកណ្តាលស្ទឹង និងគ្រូពេទ្យជំនាញនៃមណ្ឌលសុខភាពឃុំទ្រាបានបញ្ជាក់ថា នៅលើខ្លួនប្រាណសាកសពពុំមានស្លាកស្នាមរបួសអ្វី ដែលធ្វើឲ្យជនរងគ្រោះស្លាប់នោះទេ គឺជនរងគ្រោះស្លាប់ដោយសារខ្យល់គ ។
មន្ត្រីនគរបាលស្រុកកណ្តាលស្ទឹងបានបន្តថា នៅព្រឹកថ្ងៃទី២៣ ខែមេសា ឆ្នាំ២០១៤ ជនរងគ្រោះបានចេញពីផ្ទះទៅចូលរួមផឹកស៊ីជាមួយមិត្តភក្តិក្នុងភូមិ រហូតថ្ងៃរសៀលដោយពុំបានហូបបាយចូលពោះនោះទេ រហូតស្រវឹងជោកជាំ ។ ក្រោយមកជនរងគ្រោះក៍បានដើរតែម្នាក់ឯងទាំងសភាពផ្លូវមួយដើរតែឯងក្នុងគោលបំណងត្រឡប់ទៅផ្ទះវិញ ខណៈដើរដល់ចំណុចកើតហេតុខាងលើ ជនរងគ្រោះក៍បានកើតខ្យល់គស្លាប់ដោយពុំមាននណាម្នាក់បានដឹងនោះទេ រហូតដល់វេលាម៉ោង១៦ និង៣០នាទីថ្ងៃដដែលទើបស្ត្រីជាប្រពន្ធ និងកូនៗដើរតាមរកឃើញដេកស្លាប់បាត់ទៅហើយ ។
បច្ចុប្បន្នសាកសពជនរងគ្រោះត្រូវបានសមត្ថកិច្ចនគរបាលជំនាញ ប្រគល់ទៅឲ្យក្រុមគ្រួសារយកទៅធ្វើបុណ្យតាមប្រពៃណី ៕
