(ខេត្តព្រៃវែង) ល្បែងភ្នាល់បាល់ និងចាក់កន្ទុយលេខបច្ចុប្បន្នកំពុងពេញនិយមពីសំណាក់ក្រុមអ្នកញាណល្បែង ហើយក៏កំពុងមានប្រជាប្រិយ៍ភាពយ៉ាងខ្លាំងពីសំណាក់អ្នកដែលបើកកន្លែងភ្នាល់បាល់ និងចាក់ កន្ទុយលេខនេះផងដែរ។ ដូច្នេះហើយបានជាល្បែងទាំងពីរប្រភេទនេះ កើតមានជាច្រើនកន្លែងរីកដូចផ្សិត នៅក្នុងទឹកដីឃុំព្រែកខ្សាយ “ខ” ស្រុកពាមរក៍ ខេត្តព្រៃវែង ។ ចំណែកសមត្ថកិច្ចប៉ូលីស និងប៉េអឹមមិនដែលខ្វល់ខ្វាយ គ្មានចេតនាក្នុងការបង្ក្រាប ព្រោះទទួលបានលាភសក្ការៈពីល្បែងស៊ីសងទាំងអស់នោះ ។
ប្រជាពលរដ្ឋបានធ្វើការរិះគន់យ៉ាងខ្លាំងទៅនិងសមត្ថកិច្ចប៉ូលីស និងប៉េអឹមស្រុកពាមរក៍ថា បានជាប់ពាក់ព័ន្ធនិងអំពើពុករលួយទទួលលុយប្រចាំខែពីម្ចាស់ផ្ទះដែលបើកល្បែងស៊ីសងទាំងអស់នោះ ហើយបានជាស្រវាំងផ្នែកមើលមិនឃើញផ្ទះបើកល្បែងស៊ីសងធំៗ ហើយនៅល្បែរប៉ុស្តិ៍រដ្ឋបាលដូច្នេះទៅវិញ ។ ប្រជាពលរដ្ឋ បានលើកឡើងទៀតថា ដោយសារល្បែងស៊ីសងរីកដូចផ្សិតហើយ មានភ្លើងខៀវពីសមត្ថកិច្ចប៉ូលីស និងប៉េអឹម ស្រុកពាមរក៍ បច្ចុប្បន្ននេះកើតមានអំពើចោរកម្មគ្រប់រូបភាព មានចោលួច ចោឆក់ ចោប្លន់ និងកើតមានអំពើ ហឹង្សាក្នុងគ្រួសារ ដោយសារល្បែងស៊ីសងទាំងអស់នេះ ស្ទើរាល់ថ្ងៃ ។ ពិសេសជាងនេះទៅទៀត កំពុងធ្វើអោយប៉ះពាល់យ៉ាងខ្លាំងនូវគោលនយោបាយភូមិឃុំមានសុវត្ថិភាពរបស់រាជរដ្ឋាភិបាល ។ ពាក់ព័ន្ធនិងល្បែងស៊ីសងរីកដូចផ្សិតនៅក្នុងស្រុកពាមរក៍នាពេលបច្ចុប្បន្ននេះ តើលោក ស្រេង ជា ស្នងការនគរបាលខេត្តព្រៃវែង មានបានដឹងដែរឬទេ? បើមិនទាន់បានជ្រាប សូមបញ្ចេញកណ្តាប់ដៃដែកបង្ក្រាបអោយខានតែបាន កុំទុកអោយជះឥទ្ធិពលអាក្រក់ដល់សង្គមជាតិ ។
