បន្ទាយមានជ័យ៖ក្រុមស្ទាវមួយក្រុមបើករថយន្តបង្កគ្រោះថ្នាក់ចរាចរបណ្តាលអោយមនុស្សម្នាក់ស្លាប់និងបីនាក់រងរបួសធ្ងន់ បួននាកកាលពីម៉ោង ០៤ និង ៣៥នាទីទៀបភ្លឺ ថ្ងៃទី១៣ ខែសីហា ឆ្នាំ២០១៥នេះស្ថិតជាតិលេខ៥ នៅត្រង់ចំណុចខាងលិចផ្លូវចូលវត្តគោកស្បែង
ប្រហែល១០ម៉ែត្រ ស្ថិតក្នុងភូមិផ្សារកណ្តាល សង្កាត់ផ្សារកណ្តាល ក្រុងប៉ោយប៉ែតខេត្តបន្ទាយមានជ័យ។
តាមការអោយដឹងពី លោក បោន បឿន អធិការរងក្រុងប៉ោយប៉ែតបានអោយដឹងថា គ្រោះថ្នាក់ចរាចរខាងលើកើតឡើងបណ្តាលមកពី រថយន្តមួយគ្រឿងម៉ាកតូយូតាស៊ីលីកា ពណ៌ទឹកប្រាក់គ្មានស្លាកលេខ បើកបរដោយឈ្មោះ ជុន អាយុ២៤ឆ្នាំ មានទីលំនៅក្នុងភូមិជ្រោយស្តៅ ស្រុកថ្មគោល ខេត្តបាត់ដំបង ដែលមានអ្នករួមដំណើរជាមួយ៤នាក់ សុទ្ធតែជាប្រុស បានបើកបរក្នុងល្បឿនលឿន ពីលិចទៅកើតលុះដល់នុចកើតហេតុរថយន្តក៏រេចង្កូចបោកខ្ទប់បង្គោលគីឡូម៉ែត្រខាងត្បូងផ្លូវហើយក្រឡាប់ជាច្រើនត្រឡប់ ទៅបុកនិងសំយ៉ាបផ្ទះប្រជាពលរដ្ឋបណ្តាលអៅយស្លាប់ អ្នករួមដំណើរក្នុងរថយន្តម្នាក់ និង៤នាក់ទៀតរងរបួសធ្ងន់ ត្រូវបាននាំយកទៅសង្គ្រោះនៅមន្ទីរពេទ្យបង្អែកក្រុងប៉ោយប៉ែត ។
តាមការសន្និដ្ឋានរបស់ប៉ូលីស គ្រោះថ្នាក់ខាងលើកើតឡើងបណ្តាលមកពីអ្នកបើកបររថយន្តខ្វះការប្រុងប្រយ័ត្ន និងមិនគោរពច្បាប់ចរាចរ បើកលឿនក្នុងទីប្រជុំជន ។
ក្រោយកើតហេតុរថយន្តត្រូវបាននាំយកមករក្សាទុកនៅអធិការនគរបាលក្រុងប៉ោយប៉ែត៕
