ខេត្តព្រះវិហារ សត្វដំរីចំនួន៣ក្បាលរួមជាមួយហ្មដំរីចំនួន៣នាក់និងម្ចាស់វាម្នាក់ទៀតមកពីភូមិភាគឥសាន្តខេត្តមណ្ឌលគិរីធ្វើដំណើរដោយថ្មើរជើងមកដល់ទឹកដីខេត្តព្រះវិហារត្រង់ចំណុចព្រំប្រទល់ស្រុកគូលែននិងស្រុកស្វាយលើខេត្តសៀមរាបកាលពីរសៀលថ្ងៃទី១៦សីហា២០១៥ដើម្បីទាក់ទាញអារម្មណ៍អតិថិជនតាមខេត្តនិមួយៗអោយជួយទិញថ្នាំបុរាណដែលមានឈ្មោះល្បីជាង២០ឆ្នាំ។ពួកវាធ្វើដំណើរតាមផ្លូវជាតិលេខ៩រហូតមក។
ប្រជាពលរដ្ឋចាស់ក្មេងរស់នៅតាមដងផ្លូវជាតិមានការចាប់អារម្មណ៍គយគន់មើលដំរីស្ទើរគ្រប់ៗគ្នាដោយសារសត្វដំរីជាប្រភេទសត្វមានមាឌធំហើយកម្របានឃើញផ្ទាល់ភ្នែកណាស់។ឆ្លៀតពេលមនុស្សជាច្រើនកំពុងចាប់អារម្មណ៍មើលដំរីគឺម្ចាស់របស់វាបានយកឱកាសល្អនេះលក់ឱសថខ្មែរបុរាណផ្សំពីឬសឈើដែលគាត់ធ្វើផ្ទាល់ដៃ។
លោកសុខសារិនអាយុ៤៥ឆ្នាំជាម្ចាស់សត្វដំរីបានអោយដឹងថានេះជាលើកទី២ហើយដែលគាត់នាំសត្វដំរីដើរត្រាច់ចរចេញពីខេត្តមណ្ឌលគិរីទៅកាន់ខេត្តផ្សេងទៀតដើម្បីពង្រីកមុខរបរលក់ឱសថបុរាណផ្សំពីឬសឈើច្រើនមុខជួយព្យាបាលជំងឺមានប្រសិទ្ធភាពដូចជាថ្នាំក្រពះ,ពោះវៀន,ធ្លាក់ស,ស្ពឹកដៃជើង,ចុករោយនិងថ្នាំឈឺស្បូន។លោកបន្តថាដំរីទាំង៣ក្បាលនេះជាកេរតំណែលបន្សល់ទុកអោយគាត់តាំងពីដូនតាគាត់មកម្លេះពួកវាមានប្រយោជន៍ខ្លាំងណាស់ជួយលើកស្ទួយដល់មុខរបររបស់គាត់អោយមានជីវភាពធូរធារ។សព្វថ្ងៃគាត់មានប្រពន្ធនិងកូនចំនួន៦នាក់។
លោកបានអោយដឹងថានៅព្រឹកថ្ងៃទី១៧សីហានេះគាត់កំពុងស្ថិតក្នុងទីរួមស្រុកស្វាយលើខេត្តសៀមរាបដោយលក់ថ្នាំបុរាណសរុបបានចំនួន២០០កញ្ចប់គឺតំលៃ២០០០រៀលក្នុង១កញ្ចប់។អតិថិជនខ្លះអោយរហូតដល់១ម៉ឺនរៀលក្នុង១កញ្ចប់។គាត់និយាយថាដំរីទាំង៣រួមមានទី១ឈ្មោះសាំស៊ុងឈ្មោលមានភ្លុកវែងទី២ឈ្មោះជីអ(ញី)និងទី៣ឈ្មោះទីនាន(ញី)។គាត់ថ្លែងថាគាត់អោយដំរីធ្វើដំណើរតែពេលព្រឹកនោះទេចាប់ពីម៉ោង១២ថ្ងៃត្រង់គាត់ត្រូវឈប់សំរាករហូតដល់ល្ងាច៕
