កំពង់ធំៈ ហេតុការបង្ករឲ្យមានការភ្ញាក់ផ្អើលមួយ ដោយសារតែ ព្រះអគ្គីបានលេបត្របាក់ផ្ទះមួយខ្នង ថ្មក្រោមឈើលើ បណ្តាលឲ្យឆេះខ្ទេចខ្ទីអស់គ្មានសល់ កាលពីព្រឹកម៉ោង ៧.៣០នាទីព្រឹកថ្ងៃទី ១៨ ខែ សីហា ឆ្នាំ២០១៥ ស្ថិតនៅភូមិ រន្ទះ ឃុំទំរីង ស្រុកសណ្តាន់ ខេត្តកំពង់ធំ ។
តាមប្រភពព័ត៌មាននៅកន្លែងកើតហេតុបានឲ្យដឹងថា ម្ចាស់ផ្ទះត្រូវបានគេស្គាល់ ឈ្មោះ ម៉ៃ ហំ ភេទប្រុស អាយុ ៤៣ឆ្នាំ ប្រពន្ឋឈ្មោះ ទុំ អែម អាយុ ៣៥ មានកូន៣នាក់ ប្រុស២ ស្រី១ រស់នៅភូមិឃុំកើតហេតុ ត្រូវបានអគ្គីភ័យឆេះផ្ទះមានទំហំ៨ម គុណ ២២.៥០ម មានមុខរបរ កាប់គោ កាប់ជ្រូក រកមូលហេតុ តែជំហ៊ានដំបូង សមត្ថកិច្ចបានសណ្ឋានថា ប្រហែលជាបណ្តាលមក ពីភ្លើងចង្ក្រានដែល ដុតស្រុះកោលជ្រូក ដោយពុំបានពន្លត់ហើយក៏បណ្តាលឲ្យឆាបឆេះតែ ម្តង ។ខណៈពេលដែលភ្លើងបានឆាបឆេះ ប្រជាពលរដ្ឋ និងអ្នកភូមិជិតខាង រួមទាំងសមត្ថកិច្ច បាននាំគ្នាជួយពន្លត់ដែរតែពុំអាចយកឈ្នះបាន ចំណែកសមត្ថកិច្ចពន្លត់អគ្គីភ័យនៃស្នងការដ្ឋាននគរបាល ខេត្តកំពង់ធំ ពុំអាចធ្វើដំណើរទៅពន្លត់ បានទេ ដោយសារតែ ឃុំទំរីង ស្ថិតនៅចម្ងាយពីទីរួមខេត្តកំពង់ធំ ប្រមាណ១៥០គីឡូម៉ែត្រ ហើយផ្លូវសែនពិបាក ទើប ពុំអាចនាំយករថយន្តទៅពន្លត់បាន ។
ក្រោយពីកើតហេតុភ្លើងឆេះផ្ទះ ម្ចាស់ផ្ទះបានយំសោកបោកប្រាណ សន្លប់ជាច្រើនដង ដោយសារតែស្តាយទ្រព្យសម្បត្តិដែលខំសន្សំ រួមទាំងប្រាក់មួយចំនួនពុំទាន់សងលុយថ្លៃទិញគោ ទិញជ្រូកយកមកកាប់ លោកស្រី ទុំ អែម ជាម្ចាស់ផ្ទះ បានរៀបរាប់ប្រាប់សមត្ថកិច្ចថា ចំនួនទ្រព្យសម្បត្តិ ដែលបានខូចខាតមាន លុយខ្មែរ ៤០០លានរៀល លុយដុល្លា ២ម៉ឺនដុល្លា មាស ២តំឡឹង គ្រឿងសង្ហារឹម ៩៤៩០ដុល្លា រួមទាំងសំលៀកបំពាក់គិតជាលុយមាន ៦៥០០ដុល្លា ។
សម្រាប់អគ្គីភ័យនេះ សមត្ថកិច្ចកំពុងតែប្រឹងប្រែងរកភាពពិត និងមូលហេតុ ដែលបណ្តាលឲ្យមានការឆេះផ្ទះ ដោយកន្លងមកឲ្យតែមានករណីភ្លើងឆេះផ្ទះ ទម្លាក់ទៅលើតែ ( ឆ្លងចរន្តអគ្គីសនី ) តែករណីនេះប្រភពទូទៅមានការសង្ស័យ ថាប្រហែលជា មានសារហេតុអ្វីមួយ ព្រោះភ្លើងចង្ក្រាននៅឆ្ងាយពីកន្លែងឆាបឆេះ និងមានសុវត្តិភាពក្នុងការដុតភ្លើង ចង្ក្រាន។
ដោយ ប៊ុន រដ្ឋា