ខេត្តកំពង់ឆ្នាំង ៖ឃាតកម្មដោយរិតកសម្លាប់ជនរងគ្រោះមិនស្គាល់អត្តសញ្ញាណ នៅចំណុចស្តុំ ស្ថិតក្នុង ភូមិ ក្រោលជី ឃុំពពេល ស្រុកបរិបូរណ៏ កាលពីព្រឹកថ្ងៃទី១៧ ខែសីហា ឆ្នាំ២០១៥ ពេលនេះបានស្គាល់អត្តសញ្ញាណ ហើយគឺជាមន្ត្រីមន្ទីធម្មការខេត្ត និងជាគ្រូបង្រៀន សាលាពុទ្ឋិកបថមសិក្សាម្នាក់ ឈ្លាតពេលទំនេររត់ម៉ូតូឌុប ត្រូវចោរសម្លាប់ប្លន់យកម៉ូតូ។
នៅព្រឹកថ្ងៃទី១៩ ខែ សីហា ឆ្នាំ២០១៥ ក្រុមគ្រួសារជនរងគ្រោះបានទៅទំនាក់ទំនងជាមួយសមត្ថកិច្ចនគរបាលស្រុកបរិបូរណ៌ ដើម្បីសុំធ្វើការគាស់សពជនរងគ្រោះពិនិត្យមើល ព្រោះតែសំអាងនៅលើខ្យែចង្កេះមានកថាធ្វើអំពីប្រាក់ និងជញ្ចៀនផ្លាកទីន ដាំត្បូងមួយវង់ដែលនៅជាប់ដៃនិងជនរងគ្រោះ។
ក្រុមគ្រួសារជនរងគ្រោះបានបញ្ជាក់ថា៖ ជនរងគ្រោះមានឈ្មោះ យ៉ាត សុជាតិ អាយុ២៨ឆ្នាំ មានស្រុកកំណើតនៅ ភូមិចំការឌៀប ឃុំអង្អតាសោម ស្រុកត្រាំកក់ ខេត្តតាកែវ តែបានមកស្នាក់នៅជាមួយម្តាយធំ ក្នុងភូមិត្រោកលិច ឃុំស្រែថ្មី ស្រុករលាប្អៀរ ធ្វើការនៅមន្ទីរធម្មការនិងសាសនាខេត្ត និងជាគ្រូបង្រៀន នៅសាលាពុទិ្ឋកបថមសិក្សា វត្តខ្សាម ក្នុងក្រុងកំពង់ឆ្នាំង មានប្រពន្ឋឈ្មោះ ឃឹម សុគន្ឋា អាយុ២១ឆ្នាំ ជនរងគ្រោះខាងលើ ពេលទំនេរ បានឈ្លាតរត់ម៉ូតូឌុប ដើម្បីសន្សំប្រាក់ ផ្ញើរទៅប្រពន្ឋកូន។
សមត្ថកិច្ចនគរបាលស្រុកបរិបូរណ៌អោយដឹងថា៖នៅថ្ងៃកើតហេតុ ថ្ងៃទី១៧ ខែសីហា ជនរងគ្រោះ ទៅបង្រៀនសិស្សមួយម៉ោង រួចមកនៅម៉ោង ៨ព្រឹក បានចេញទៅរត់ម៉ូតូឌុបរួច ក៏បាត់ខ្លួនតែម្តង។ក្រោយពីការផ្សាយរបស់សារព័ត៌មាន និងទូរទស្សន៏ ក៏បានដឹងដំណឹងនេះដល់គ្រួសារ ហើយដោយមានការសង្ស័យ ទើបក្រុមគ្រួសារមកសុំសមត្ថកិច្ចនគរបាល គាស់សពពិនិត្យមើល ហើយក្រោយពីបានគាស់សពពិនិត្យមើល ក្រុមគ្រួសារបានស្គាល់ច្បាស់ថាពិតជាឈ្មោះ យ៉ាត សុជាតិ ប្រាកដមែន។
ក្នុងរឿងនេះសមត្ថកិច្ចនគរបាលបានសន្និដ្ឋានបានថា៖ ករណីសម្លាប់ជនរងគ្រោះខាងលើ ជាអំពើប្លន់យកម៉ូតូមួយគ្រឿងម៉ាក ហុងដាសេ១២៥ សេរី២០១៥ ហើយជនដៃដល់ គឺអាចជាអ្នកស្គាល់គ្នាទៀតផង ទើបជនរងគ្រោះហ៊ានឌុបទៅកន្លែងស្ងាត់ក្នុងព្រៃ និងរិតសម្លាប់ប្លន់យកម៉ូតួបែបនេះ។
សមត្ថកិច្ចបានប្រគល់សពជនរងគ្រោះអោយក្រុមគ្រួសារចាត់ចែងបូជានៅនឹងកន្លែងកន្លែងកើតហេតុ ដើម្បីយកធាតុទៅធ្វើបុណ្យឧទ្ទិសកុសលតាមប្រពៃណីនៅលំនៅដ្ឋានរបស់សពនៅខេត្តតាកែវ៕
