ខេត្តប៉ៃលិន៖ ជនសង្ស័យប្រុសស្រី៧នាក់ ត្រួវបានកម្លាំងនគរបាលស្រុកសាលាក្រៅ សហការជាមួយកម្លាំងអន្តរាគមន៏ នៃស្នងការដ្ឋាននគរបាលខេត្តប៉ៃលិន ដឹកនាំដោយលោក អ៊ុយ សារ៉េត ស្នងការរងខេត្ត ,លោក អ៊ុំ សាឡន នាយរងការិយាល័យគ្រឿងញៀនខេត្ត ធ្វើការឃាត់ខ្លួនករណីប្រើប្រាស់គ្រឿងញៀនខុសច្បាប់ កាលពីវេលាម៉ោង១០ និង៣០នាទីព្រឹក ថ្ងៃទី២០ ខែសីហា ឆ្នាំ២០៥ ស្ថិតនៅចំណុចសំបុកចាប ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
ជនសង្ស័យទាំង៧នាក់ ដែលសមត្ថកិច្ចឃាត់ខ្លួនឈ្មោះ ទី១ ឈ្មោះ វ៉ារិន ឌួងស៊ី ភេទប្រុស អាយុ ៤០ឆ្នាំ មុខរបរជាងសំណង់ ,ទី២ ឈ្មោះ ខាត់ បូរិន ភេទប្រុស អាយុ ២០ឆ្នាំ មុខរបរមិនពិតប្រាកដ, ទី៣ ឈ្មោះ ទឹត តយ ភេទប្រុស អាយុ ២៦ឆ្នាំ មុខរបរកម្មករ, ទី៤ ឈ្មោះ ហ៊ា សុខា ភេទប្រុស អាយុ ២៥ឆ្នាំ មុខរបរកម្មករ ,ទី៥ ឈ្មោះ ឡៃ ដា ភេទស្រី អាយុ ៥១ឆ្នាំ មុខរបរអ៊ុតសក់, ទី៦ ឈ្មោះ ម៉ាង ឡាំ ភេទប្រុស អាយុ ៤១ឆ្នាំ មុខរបរកម្មករ និងទី៧ ឈ្មោះ អៀម សីហា ភេទប្រុស អាយុ ១៧ឆ្នាំ មុខរបរកម្មករ ដោយជនសង្ស័យទាំងអស់នេះរស់នៅភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
ប្រភពពីសមត្ថកិច្ចនគរបាលគ្រឿងញៀនខេត្ត បានឲ្យដឹងថា៖ មុនឈានដល់ការឃាត់ខ្លួន កម្លាំងសមត្ថកិច្ចបានធ្វើការចុះឃ្លាំមើលជាយូមកហើយ ព្រមទាំងមានសេចក្តីរាយការណ៏ពីប្រជាពលរដ្ឋផងនោះ ទើបខាងសមត្ថកិច្ច ចុះធ្វើការឃាត់ខ្លួនតែម្តង ដោយមានការដឹកនាំបញ្ជាពីលោក ជា ចាន់ឌិន ស្នងការនគរបាលខេត្តប៉ៃលិន ។ ប្រភពបន្តថា៖ ក្នុងចុះបង្ក្រាបនេះដែរ កម្លាំងសមត្ថកិច្ចឃាត់ខ្លួនបានមនុស្សប្រុសស្រី៧នាក់ រួមទាំងវត្ថុតាង មានថ្នាំញៀនយ៉ាម៉ាចំនួន០២គ្រាប់ និងសំភារៈសំរាប់ជក់គ្រឿងញៀនមួយចំនួន ។
បច្ចុប្បន្នជនសង្ស័យខាងលើ ត្រួវបានសមត្ថកិច្ចជំនាញកំពុងកសាងសំណុំរឿង បញ្ជូនទៅតាមតុលាការ ដើម្បីដោះស្រាយតមនីតិវិធីច្បាប់៕
