កំពង់ធំៈ សកម្មភាពដឹកឈើតាមបណ្តោយផ្លូវ ភូមិក្រវ៉ា បាក់ស្នាឆ្ពោះមកកំពង់ថ្ម បានធ្វើសកម្មភាពដោយរលូន ដោយ ពុំត្រូវបានសមត្ថកិច្ចចាត់វិធានការបង្ក្រាបនោះឡើយ ជាហេតុធ្វើឲ្យមានការសង្ស័យថា សមត្ថកិច្ចនៅតាមដងផ្លូវ បាន ទទួលលាភស្ការៈខ្លះហើយ ទើបបានជាកើតជំងឺ ស្ពឺកជាប់ត្រគៀគ មិនអាចប្រតិបត្តិតួនាទីជាអ្នកបង្ក្រាបបទល្មើសឈើ ដោយខុសច្បាប់។
ជាស្តែងកាឡេថង មួយគ្រឿង ដែលត្រូវបានគេស្គាល់ឈ្មោះ រី មានមុខរបរជាឈ្មួញឈើ រកស៊ីដឹកឈើគ្មានច្បាប់ ប្រចាំឆ្នាំប្រចាំផ្លូវ ពុំត្រូវបានសង្កាត់រដ្ឋបាលព្រៃឈើ បារាយណ៍ មានវិធានការក្នុងការបង្ក្រាបនោះឡើយ ទោះជាដឹក ចង់រូងផ្លូវក៏ដោយ ទើបតែនៅវេលាម៉ោង ៨.៣០នាទីយប់ថ្ងៃទី ២៦ ខែ សីហា ឆ្នាំ ២០១៥ លោក អ៊ិត សុធា ព្រះរាជអាជ្ញាអមសាលាដំបូង បញ្ជាឲ្យ លោក សុទ្ធ ម៉ារី នាយផ្នែករដ្ឋបាលព្រៃឈើ ដឹកនាំកម្លាំងចុះបង្ក្រាប កាឡេថងមួយគ្រឿងមានម្ចាស់ឈ្មោះ រី ដឹកឈើគ្មានច្បាប់អនុញ្ញាតិ តាមការប៉ាន់ស្មានចំនួន៦ ម៉ែត្រគូប នៅចំនុច ជិតស្នាក់ការសន្តិសុខ ១០២ ភូមិយាយទៀង ឃុំបាល្ល័ង ស្រុកបារាយណ៍ ខេត្តកំពង់ធំ ។
សមត្ថកិច្ចដែលបានចុះឃាត់កាឡេថង គេសង្កេតឃើញមានមន្ត្រីផ្នែករដ្ឋបាលព្រៃឈើកំពង់ថ្ម និងមន្ត្រីសង្កាត់រដ្ឋបាល ព្រៃឈើបារាយណ៍ រួមទាំងកម្លាំងប្រតិបត្តិការសឹករងកំពង់ធំ បានចុះបង្ក្រាបបទល្មើសដឹកឈើដោយខុសច្បាប់ ហើយបាមនាំទាំងកាឡេថង និង ឈើជា៦ម៉ែត្រគូប យកទៅរក្សាទុកនៅផ្នែករដ្ឋបាលព្រៃឈើ កំពង់ថ្ម ដើម្បីចាត់ការតាម ច្បាប់។
លោក សុទ្ធ ម៉ារី ធ្លាប់បានផ្តល់នូវបទសម្ភាសថា នាពេលបច្ចុប្បន្ន ត្រូវបានរឹតបន្តឹងការដឹកជញ្ជូនឈើ ដោយខុសច្បាប់ រួមទាំងការដឹកសិប្បកម្មដែលមិនទាន់បានកែច្នៃ រួមទាំងជន្លង់ម្រិច និងការដឹកអុស ដែលមានទំហំធំ កាត់ចេញពីព្រៃ ដែលត្រូវបានហាមឃាត់ ដោយសារតែ មានជនខិសខូចបានលួច អាឈើ កាត់ដើមឈើ ក្នុងព្រៃរក្សាទុកជាអចិន្ត្រៃ លោកបានបញ្ជាក់ថា បើសិនជាមិនទប់ស្កាត់ខ្លះ កាឡេថងដឹកឈើកំណាត់ៗរាប់រយគ្រឿងដង្ហែរគ្នា ចំណែកព្រៃឈើ វាកាន់តែរលាយហិនហោចមិនខានឡើយ ទើបមានការណែនាំពីថ្នាក់ដឹកនាំ របស់ក្រសួងឲ្យទប់ស្កាត់ និងរឹតបន្តឹងកាដឹក ឈើដោយគ្មានច្បាប់ ក៏ដូចជាការថែរក្សាព្រៃឈើផងដែរ។
ដោយ ប៊ុន រដ្ឋា
