ភ្នំពេញ៖ ដោយមានកិច្ចខិតខំប្រឹងប្រែងរួមគ្នាកម្ពុជា-ឥណ្ឌា ជម្រុញឱ្យមានការ ហោះហើរដោយផ្ទាល់ពីឥណ្ឌាមកកម្ពុជានឹងពីកម្ពុជាទៅកាន់ប្រទេសឥណ្ឌា ខណៈបច្ចុប្បន្នគេមើលឃើញថាចំនួនអ្នកទេសចរណ៍នៃប្រទេសទាំងពីរ។
លោកទិត្យ ចន្ថារដ្ឋលេខធិការក្រសួងទេសចរណ៍បានបញ្ចាក់ក្រោយជំ នួបសវនាការនិងសម្តែងការគួរសមរបស់ លោក ណាវីន ស្រ៊ីវ៉ាស្តាវ៉ា (Mr Naveen Srivastava ឯកអគ្គរដ្ឋទូតឥណ្ឌាថ្មីប្រចាំកម្ពុជា ជាមួយលោកថោង ខុន រដ្ឋមន្ត្រីក្រសួងទេសចរណ៍ កាល ពីរសៀលថ្ងៃទី២ខែកញ្ញានៅទីស្តីការក្រសួងទេសចរណ៍។ លោកបញ្ចាក់ថា ក្នុងដំណើរបំពេញបេសកកម្មការទូតនៅកម្ពុជាបានកត់សម្គាល់ឃើញថា កម្ពុជាជាប្រទេសមួយមានការរីកចំរើន មានសុខសន្តិភាព ស្ថេរភាពនយោបាយ ក្រោមការដឹកនាំរបស់រាជរដ្ឋាភិបាលមានការអភិវឌ្ឍន៍លើគ្រប់វស័យ ។ លោកក៏បានបង្ហាញអំពីទំនាក់ទំនងរបស់ប្រទេសទាំងពីកម្ពុជា-ឥណ្ឌាដែលមានតាំងពីយូរយារមកហើយ មានវប្បធម៌ សាសនា ប្រពៃណីនិងការរស់នៅរបស់ប្រជាជនទាំងពីរប្រហាក់ប្រហែលគ្នា ដែលនេះបង្ហាញឱ្យឃើញពីសក្កដានុពល ដែលអាចទាក់ទាញអ្នកទេសចរណ៍ឥណ្ឌាឱ្យមកទស្សនាកម្ពុជាបានយ៉ាងច្រើននៅពេលខាងមុខ។
លោកថោង ខុនរដ្ឋមន្ត្រីក្រសួងទេសចរណ៍បានមានប្រសាសន៏ថា ពលរដ្ឋកម្ពុជាបានទៅទេសចរណ៍នៅឥណ្ឌាមានចំនួនច្រើន ជាពិសេសទេសចរណ៍ដែលទាក់ទងទៅនិងសាសនា (ពុទ្ធសាសនា) ហើយក៏មានអ្នកទេសចរណ៍ឥណ្ឌាមកទស្សនាកម្ពុជា បើទោះបីមិនទាន់មានចំនួនច្រើនក៏ដោយ តែក៏មានកំណើនគួរឱ្យកត់សម្គាល់ផងដែរ។ លោកបន្តថាឥណ្ឌាមានប្រជាជនជាង១ពាន់២រយលាននាក់ ក្នុងនោះមានអ្នកមានសេដ្ឋកិច្ចខ្ពង់ខ្ពស់ជាច្រើន ដែលជាសក្កដានុពលដែលអាចធ្វើឱ្យកំណើនទេសចរណ៍កម្ពុជាមានការកើនឡើងខ្លាំង ក៏ប៉ុន្តែបច្ចុប្បន្ននេះប្រទេសទាំងពីរមិនទាន់មានការហោះហើរត្រង់ទៅកាន់គ្នានៅឡើយ គឺមានតែជើងហោះហើរតាមរយៈប្រទេសជិតខាងកម្ពុជាតែប៉ុណ្ណោះ ។ ដូច្នេះសង្ឃឹមថាតាមរយៈឯកអគ្គរដ្ឋទូតនិងរដ្ឋមន្ត្រីក្រសួងទេសចរណ៍នាពេលនេះ នឹងខិតខំទាំងអស់គ្នាក្នុងការជម្រុញឱ្យមានការហោះហើរ ផ្ទាល់មកកាន់កម្ពុជាក្នុងពេលខាងមុខនេះ។
ជាការឆ្លើយតបលោកឯកអគ្គររដ្ឋទូតសន្យាថា ខិតខំប្រឹងប្រែងរួមគ្នាជាមួយក្រសួងទេសចរណ៍កម្ពុជាដើម្បីជម្រុញឱ្យមានការហោះហើរផ្ទាល់នេះ ដើម្បីពង្រីកកិច្ចសហការលើវិស័យទេសចរណ៍រវាងប្រទេសទាំងពីរ។ទន្ទឹមគ្នានេះដែរ កម្ពុជា-ឥណ្ឌា ក៏បានពិភាក្សាគ្នា អំពីការត្រៀមលក្ខណៈសម្បត្តិសំខាន់មួយក្នុងខែកញ្ញានេះដែលនឹងមានដំណើរទស្សន កិច្ចរបស់អនុប្រធានាធិបតីឥណ្ឌាមកកាន់កម្ពុជាហើយស្របគ្នានឹងដំណើរទស្សន កិច្ចនេះ ភាគីទាំងពីរបានខិតខំជម្រុញថា ឱ្យមានការចុះអនុស្សារណៈយោគយល់គ្នា លើវិស័យ ទេសចរណ៍រវាងកម្ពុជា-ឥណ្ឌាផងដេរ៕
