ខេត្តបន្ទាយមានជ័យ៖ល្ងាចថ្ងៃទី៥ខែកញ្ញាឆ្នាំ២០១៥នៅសាលប្រជុំសាលាខេត្តបន្ទាយមានជ័យលោកគោស៊ុំសារឿតប្រធានគណៈបញ្ជាការឯកភាពខេត្តបន្ទាយមានជ័យបានដាក់ចេញវិធានការឲ្យធ្វើការបង្ក្រាបល្បែងស៊ីសងជាបន្ទាន់ ក្រោយមានបាតុភាពជាច្រើន ដូចជា ចោរលួច ចោរប្លន់ ការរឹបអូសផ្ទះសម្បែង ដីធ្លីជាដើម។លោក គោស៊ុំ សារឿតបានធ្វើការបង្ហាញក្នុងលិខិតលេខ០៤២គបជខចុះថ្ងៃទី៤កញ្ញាឆ្នាំ២០១៥ របស់សាលាខេត្ត និងគណៈបញ្ជាការឯកភាពខេត្ត ផ្ញើជូនអភិបាល និងជាប្រធានគណៈបញ្ជាការឯកភាពស្រុកក្រុង ឲ្យដឹងថា ខេត្តស្នើឲ្យអភិបាលស្រុក ក្រុង ត្រូវចាត់ចែងអនុវត្តប្រកបដោយការទទួលខុសត្រូវ ប្រុងប្រយ័ត្នខ្ពស់ និងរាយការណ៍លទ្ធផល មកខេត្ត ក្នុងការបង្ក្រាបរាល់ល្បែងស៊ីសងខុសច្បាប់ទាំងឡាយណានៅក្នុងភូមិសាស្ត្រខ្លួន។លោកគោស៊ុំសារឿតបានបញ្ជាក់ទៀតថាបានជាចេញលិខិតនេះគណៈបញ្ជាការឯកភាពខេត្ត សំអាងថា យោងគោលនយោបាយភូមិឃុំមានសុវត្ថិភាព កិច្ចប្រជុំសាមញ្ញាលើកទី១៥ នៃក្រុមប្រឹក្សាខេត្ត ថ្ងៃទី១កញ្ញា និងដោយសារមានបាតុភាពដូចជា អំពើចោរឆក់ លួច ប្លន់ អំពើហិង្សាក្នុងគ្រួសារ ការរឹបអូសទ្រព្យសម្បត្តិ ផ្ទះសម្បែង ដីធ្លី ជាដើម ដែលត្រូវស្ថាប័នមីក្រូហិរញ្ញវត្ថុ រឹបអូស ព្រោះពលរដ្ឋលេងចាញ់ល្បែងស៊ីសងគ្រប់ប្រភេទ ដែលជះឥទ្ធិពលមិនល្អដល់សង្គមជាតិ ពិសេសក្នុងភូមិសាស្ត្រខេត្តតែម្តង។ល្បែងសីសង និងការចាក់ភ្នាល់លុយនានា ក្នុងខេត្ត ដែលកើតមានដូចជា ល្បែងតាមអ៊ីនធើណែត កន្ទុយលេខ បៀរ អាប៉ោង និងល្បែងភ្នាល់ចាក់លុយនានា។ នេះបើតាមលោកគោស៊ុំ សារឿត អភិបាលខេត្តបញ្ជាក់ក្នុងលិខិតនោះ៕