ខេត្តសៀមរាប៖ប្រជាពលរដ្ឋនៅក្នុងស្រុកពួក ខេត្តសៀមរាប ទទួលបាននូវភាពសប្បាយរីរាយ ជាមួយនឹងការចម្លែកក្នុងចិត្ត ដែលស្រុកមួយនេះ ពុំធ្លាប់មានប្រារព្ធពិធីអុំប្រណាំងទូកនោះទេ បើទោះជាស្ថិតក្នុងប្រភេទទូកខ្នាតណាក៏ដោយ។អ្នកស្រុកពួក នៅក្នុងឱកាសព្រះរាជពិធី
បុណ្យអុំទូក អកអំបុក បណ្តែតប្រទីប សំពះព្រះខែ គឺមិនដែលអាក់ខានទេ កម្មវិធីអកអំបុក បណ្តែតប្រទីព សំពះព្រះខែ ហើយបានធ្វើឡើងដោយប្រសើរបំផុតតាមទំនៀមទម្លាប់ប្រពៃណី គួបផ្សំជាមួយនឹងជំនឿផ្សេងៗផងដែរ ដោយប្រជាពលរដ្ឋបានប្រារព្ធឡើងនៅតាមបណ្តាទីអារាមនានា ហើយពិធីបណ្តែតប្រទីប នឹងត្រូវបានធ្វើឡើង នៅក្នុងបណ្តាស្រះនានាក្នុងទីអារាមទាំងនោះ ។
លោក ឈឹម ធា អភិបាលរងស្រុកពួក បានឲ្យដឹងយ៉ាងដូច្នេះ នារសៀលថ្ងៃទី១៥ ខែវិច្ឆិកានេះ នៅក្នុងពិធីអុំប្រណាំងទូកស្មាច់ ចំណុះកីឡាករ៤នាក់ ដែលបានរៀបចំឡើងនៅទំនប់កិល សម្តេចតេជោ ហ៊ុន សែន ភូមិប្រយុទ្ធ ឃុំពួក ស្រុកពួក ខេត្តសៀមរាប ។ កម្មវិធីនេះរៀបចំឡើងដោយអាជ្ញាធរស្រុក ឃុំ សហការជាមជ្ឈមណ្ឌលគ្រីស្ទបរិស័ទខ្មែរ ព្រមជាមួយនឹងការឧបត្តម្ភដោយសប្បុរសជន ។ លោកអភិបាលរងស្រុកពួក បានឲ្យដឹងបន្ថែមថា ៖ កម្មវិធីប្រណាំងទូកស្មាច់នេះ បានធ្វើឡើងរយៈពេល៣ថ្ងៃ ហើយថ្ងៃទី១៥ វិច្ឆិកានេះ គឺជាថ្ងៃផ្តាច់ព្រ័ត្រ ដោយមានកីឡាករអុំទូកចូលរួមចំនួន ៣២ក្រុម ១៦គូប្រកួត ស្មើនឹង១២៨នាក់ ទីព្រ័ត្រនៃចម្ងាយអុំប្រណាំង ២០០ ម៉ែត្រ ។ ក្រុមកីឡាករទាំងអស់នេះ រួមមានក្រុមយុវជន ប្រជាពលរដ្ឋ កម្លាំងកងរាជអាវុធហត្ថស្រុក អធិការដ្ឋាននគរបាលស្រុក វិស័យឯកជន បណ្តាសមាគម អង្គការក្រៅរដ្ឋាភិបាលផងដែរ ។
លោក ឈឹម ធា និយាយថា ៖ វាពិតជាត្រូវបានប្រើប្រាស់លទ្ធភាពដ៏ចម្លែក ក្នុងកិច្ចដំណើរការបើកកម្មវិធីប្រណាំងអុំទូកនេះ ។ លោកឲ្យដឹងថា ក្រុមកីឡាករទាំង៣២ក្រុម គឺត្រូវបានប្រើប្រាស់ទូកអុំប្រណាំង តែ៤គ្រឿងប៉ុណ្ណោះ ពួកគេអត់មានទូកប្រចាំក្រុមទេ ក៏ប៉ុន្តែក្រុមកីឡាករទាំងនេះ គេមានឈ្មោះក្រុមរបស់គេ ដូចឈ្មោះទូក ង ដែរ ដូចជា បារមីស្ត្រីកណ្ឌៀវ នារីស្រីស្រស់ ជាដើម ។ ទូក៤គ្រឿងនោះ ត្រូវបានក្រុមកីឡាករទាំង៣២ក្រុម ប្រើប្រាស់អុំប្រណាំង ដោយផ្លាស់ប្តូរគ្នា ។
លោកអភិបាលរងស្រុកពួករូបនេះ បានប្រាប់ឲ្យដឹងថា ក្រុមប្រណាំងទូកជ័យលាភីលេខ១ បានរង្វាន់១លានរៀល លេខ២ មានរង្វាន់ ៥០ ម៉ឺនរៀល លេខ៣ ទទួលបានរង្វាន់ ៣០ម៉ឺនរៀល និងលេខ៤ ទទួលបាន ២០ម៉ឺនរៀល ហើយក្រុមទូកដែលចាញ់ គឺបានរង្វាន់លួងចិត្ត មី ១កេះតូច ។ ក៏ប៉ុន្តែទោះជាយ៉ាងណា ក្រុមកីឡាករ ក៏ទទួលបានរង្វាន់បន្ថែម ពីទស្សនិកជនផងដែរ។លោកបញ្ជាក់ថា ឆ្នាំនេះ គឺជាឆ្នាំទី២ហើយ ដែលស្រុកពួក ខេត្តសៀមរាប បានរៀបចំកម្មវិធី ប្រណាំងទូក បើទោះជាមានលក្ខណៈតូចតាច តែវាមានទំហំធេង សម្រាប់ការសប្បាយរីករាយរបស់ប្រជាពលរដ្ឋ៕
វេហាស៍
