សៀមរាប៖ថ្នាក់ដឹកនាំគណបក្សសង្គ្រោះជាតិ នៅព្រឹកថ្ងៃព្រហស្បត្ដិ៍នេះ អំពាវដល់ពលករចំណាកស្រុកក្រៅប្រទេសឲ្យវិលត្រឡប់មកប្រទេសរបស់ខ្លួនវិញដើម្បីចូលរួមរៀបចំប្រទេសឲ្យជឿនលឿន បំបាត់អំពើពុករលួយ នឹងឲ្យសម្បូរការងារធ្វើ។
ការអំពាវនាវនេះ ធ្វើឡើងបន្ទាប់ពីបញ្ចប់ ការហែក្បួនឃោសនាបោះឆ្នោត ក្រុមប្រឹក្សា រាជធានី ខេត្ដ ក្រុង ស្រុក ខ័ណ្ឌ នៅខេត្ដសៀមរាប វេលាម៉ោងជាង១១ ថ្ងៃនេះ។ ប្រធានគណបក្សសង្គ្រោះជាតិ លោក សម រង្ស៊ី ថ្លែងទៅកាន់អ្នកគាំទ្រជិត១ម៉ឺននាក់ នៅខាងមុខព្រះអង្គចេក ព្រះអង្គចមថា ប្រទេសកម្ពុជា មានការងារធ្វើច្រើន ពលរដ្ឋខ្មែរមិនចំបាច់ទៅធ្វើការនៅក្រៅប្រទេសនោះទេ ហើយលោកអំពាវនាដល់ពលករចំណាកស្រុកនៅក្រៅប្រទេស ជាពិសេសនៅប្រទេសថៃ វិលត្រឡប់មកជួបក្រុមគ្រួសារ នៅលើទឹកដីរបស់ខ្លួនវិញ នឹងចូលរួមរៀបចំប្រទេសឲ្យបានជឿនលឿន និងដើម្បី មានការងារធ្វើច្រើន។
លោកបន្ដែមថា គណបក្សសង្គ្រោះជាតិ កំពុងឈានទៅរកការដឹកនាំប្រទេស ព្រោះមានពលរដ្ឋខ្មែរ ពិសេសយុវជន បានគាំទ្រច្រើនដូចព្យុះស៊ូណាមិក ដែលអាចធ្វើការផ្លាស់ប្ដូរថ្នាក់ដឹកនាំប្រទេសបាន។ ដោយឡែក អនុប្រធាន គណបក្សសង្គ្រោះជាតិ លោក កឹម សុខា មានប្រសាសន៍ ដោយប្រកាន់ជំហ៊រថា គណបក្សនេះ នៅតែជាអ្នកមានជ័យឈ្នះ លើគណបក្សប្រជាជនកម្ពុជា។ 
លោក កឹម សុខាសច្ចារ្យនៅមុខព្រះអង្គចេក ព្រះអង្គចមថា លោកនឹងការពារឆន្ទះប្រជាពលរដ្ឋ មិនក្បត់ប្រជាជន បើទោះបីលោកនាយករដ្ឋមន្ដ្រី ហ៊ុន សែន យកលុយរាប់កោដ្ឋមកទិញក៍ដោយ ។ លោកបានប្ដេជ្ញាថានឹងយកអំណាចពិតប្រាកដមកជួនប្រជារាស្ដ្រខ្មែរនិងសន្យាបញ្ចប់អំណាចផ្ដាច់ការនៅកម្ពុជាឲ្យទាល់តែបានដាច់ខាត។ មន្ដ្រីជាន់ខ្ពស់ គណបក្សប្រជាជនកម្ពុជា លោក ជៀម យៀប មានប្រសាសន៍ថា ការអំពាវនេះ ជាសិទ្ធិរបស់ថ្នាក់ដឹកនាំគណសង្គ្រោះជាតិ ឲ្យតែលោក សម រង្ស៊ី និង លោកកឹម សុខា មានថវិការផ្ដល់ឲ្យពួកគាត់។
លោកថា ចំណែកគណបក្សកាន់អំណាច មិនចង់ឲ្យពលរដ្ឋខ្មែរធ្វើចំណាកស្រុកទេ ប៉ុន្ដែមិនមានថវិការចិញ្ចឹមពួកគេ។ អ្នកវិភាគស្រាវជ្រាវសង្គម លោក កែម ឡី មានប្រសាសន៍ថា ប្រទេសកម្ពុជាមានការងារធ្វើច្រើន ប៉ុន្ដែរដ្ឋាភិបាលរៀបចំគោលនយោបាយ មិនត្រូវនឹងជំនាញពលរដ្ឋ ។ លោកថា បើសិនចង់ឲ្យពលករចំណាកស្រុកវិលត្រឡប់មកធ្វើការនៅប្រទេសខ្លួនវិញ លុះត្រារដ្ឋាភិបាលរៀបចំគោលនយោបាយ ប្រាក់ខែអប្បរមា ចាប់ពី១៥០ដុល្លា ដល់ពី២រយដុល្លាឡើងទៅ និងរៀបចំច្បាប់ការងារ និងច្បាប់ ជំរុញឲ្យមានការងារធ្វើ ជាដើម។ លោកដាក់ពាក្យស្លោកមួយថា ថ្ងៃនេះអត់ការងារធ្វើ ថ្ងៃស្អែកក្រីក្រ៕
