ខេត្តកំពង់ឆ្នាំង៖ សមត្ថកិច្ចនគរបាលការិយាល័យ ព្រហ្មទ័ណ្ឌកំរិតស្រាល នៃស្នងការដ្ឋានគរបាលខេត្ត បាន កសាងសំណុំរឿងបញ្ជូនចោរម្នាក់ និងវត្ថុតាងម៉ូតូ៤គ្រឿង ទៅកាន់តុលាការខេត្តនៅ រសៀលថ្ងៃទី០៥ ខែមករា ឆ្នាំ២០១៦ បន្ទាប់បានសាកសួរពេញមួយថ្ងៃ ក្នុងរឿងលួចម៉ូតូប្រជាពលរដ្ឋនៅពេលទាបភ្លឺថ្ងៃទី០៤ ខែមករា ឆ្នាំ២០១៦ នៅភូមិកំពង់ត្រឡាចក្រោម ឃុំកំពង់ត្រឡាច ស្រុកកំពង់ត្រឡាច ។
លោក ពេជ្រ រ៉ី នាយការិយាល័យនគរបាលនគរបាលព្រហ្មទ័ណ្ឌកំរិតស្រាលខេត្ត បានអោយដឹងថា៖ ជនសង្ស័យខាងលើនេះមានឈ្មោះ ឈិត ស៊ីនឿន អាយុ៣៥ឆ្នាំ មានទីលំនៅភូមិតាំងក្រសាំង ស ង្កាត់ក្រាំងធ្នុង ខណ្ឌ័ពោធិសែនជ័យ រាជធានីភ្នំពេញ ។
មុនពេលចាប់ឃាត់ខ្លួនជនសង្ស័យខាងលើ សមត្ថកិច្ចនគរបាលស្រុកកំពង់ត្រឡាច បានទទួលព័ត៌មានថា នៅពេលទាបភ្លឺ ថ្ងៃទី០៤ ខែមករា ឆ្នាំ២០១៦ ឈ្មោះ ម៉ាត់ លាស់ អាយុ៣៥ឆ្នាំ និងឈ្មោះ សេន អាលី អាយុ៣២ឆ្នាំ សញ្ជាត្តិខ្មែរឥស្លាម មានទីលំនៅ ភូមិកំពង់ត្រឡាចក្រោម បានបាត់ម៉ូតូម្នាក់មួយគ្រឿង ។ ពេលនោះសមត្ថកិច្ចបានបញ្ចេញកម្លាំងពួនស្ទាក់ គ្រប់ច្រកសំខាន់ៗ ហើយក៏បានប្រទះឃើញម៉ូតូមួយគ្រឿង ម៉ាកអេសអិល ដែលត្រូវជនសង្ស័យផ្តួលចោលនៅចុងភូមិដកស្និត ឃុំជ្រេស ហើយគេចខ្លួនបាត់ ។បន្ទាប់មក ក៏បានប្រទះឃើញម៉ូតូ ៣គ្រឿងទៀតជាបន្តបន្ទាប់ នៅក្នុងភូមិកំពង់ក្តារ ក្នុងនោះមានម៉ូតូម៉ាយ៉ាម៉ាហាស៊ីរ៉ុស១គ្រឿង ម៉ូតូម៉ាកហុងដាអ៊ែប្លេក១គ្រឿង និង ម៉ូតូម៉ាកសង់កូរ៉េ១គ្រឿង រនិងវិទ្យុទាក់ទងមួយគ្រឿងផងដែរ ដែលបក្ខពួកជនសង្ស័យទុកចោលចោល។ លុះដល់ម៉ោង១១ថ្ងៃត្រង់ សមត្ថកិច្ចឃាត់ខ្លួនជនសង្ស័យខាងលើ ដែលមានរបួសជើងដោយសារផ្តួលម៉ូតូចោល កំពុងដើរឡើងមករកផ្លូវដើម្បីគេចខ្លួន ។
ចំពោះមុខសមត្ថកិច្ចនគរបាលជនសង្ស័យខាងលើ មិនឆ្លើយសារភាពនោះទេ ដោយគេភូតភរ
សមត្ថកិច្ចថា៖ រូបគេបានដើរមកពីរកអណ្តើក ប៉ុន្តែសមត្ថកិច្ចនគរបាលសន្និដ្ឋានថា ជនសង្ស័យ គឺជាបក្ខពួកក្រុមចោរ ដែលបានធ្វើសកម្មភាពលួចម៉ូតូកាលពីយប់ ហើយបានកសាងសំណុំរឿងតាមនិតិវិធី បញ្ជូ នខ្លួន និងវត្ថុតាងទៅកាន់តុលាការ ខេត្តចាត់ការបន្ត៕
