កំពត៖ នៅព្រឹកថ្ងៃទី៥ ខែមករា ឆ្នាំ ២០១៦ កំលាំងការិយាលយ័កណ្តាលនគរបាលព្រហ្មទណ្ឌ័នៃស្នងការដ្ឋានខេត្តកំពត បានចុះធ្វើសកម្មភាពអនុវត្តតាមដីការរបស់តុលាការនាំខ្លួនបុរសម្នាក់់ជាប់ចោទពីរបទ ប៉ុនប៉ងឃាតកម្ម ស្រុកឈូក ខេត្តកំពត ។
ជនដែលត្រូវឃាត់ខ្លួនតាមដីការរបស់តុលាការមានម្នាក់ឈ្មោះ ផុន ចំរើន ភេទប្រុស អាយុ ២០ឆ្នាំ មុខរបរជាកម្មករសំណង់មានទីលំនៅភូមិត្រពាំងបឹង ឃុំត្រមែង ស្រុកឈូក ។
លោកវរសេនីយ៏ត្រី លក ញ៉ាវ នាយរងការិយាលយ័នគរបាលព្រហ្មទណ្ឌ័កំរិតធ្ងន់នៃស្នងការដ្ឋាននគរបាលខេត្តបានឲ្យដឹងថាៈ កំលាំងការិយាល័យនគរបាល ព្រហ្មទណ្ឌ័កំរិតធ្ងន់នៃស្នងការដ្ឋានខេត្តបានឃាត់ខ្លួនបុរសតាមអំណាចដីការបស់ លោក លាង ឈន ចៅក្រមស៊ើបសួរនៃសាលាដំបូងខេត្ត និង យោងតាមសំណុំរឿងព្រហ្មទណ្ឌលេខ ២៩៨ ចុះថ្ងៃទី ០២ ខែ វិច្ឆិកា ឆ្នាំ២០១៥ និង សំណុំរឿងស៊ើបសួរលេខ ៣៣៤ចុះថ្ងៃទី ១២ ខែ វិច្ឆិកា ឆ្នាំ ២០១៥ ជនដែលត្រូវចោទ ខាងលើ នេះត្រូវតុលាការដាក់ឲ្យស្ថិតនៅក្រោមការពិនិត្យពីបទប៉ុនប៉ងឃាតកម្ម តាមមាត្រា២១, ១៩៩ នៃច្បាប់ក្រមព្រហ្មទណ្ឌ ។
បច្ចុប្បន្នបុរសជាប់ចោទត្រូវបានដីកាសម្រេចអោយឃុំខ្លួនបណ្តោះអាសន្នលេខ ២១ ព្រទ ចុះ ថ្ងៃទី៥ខែ មករា ឆ្នាំ ២០១៦ បង្គាប់ឲ្យភ្នាក់ងារមានសមត្ថកិច្ចនៃកងកំលាំងសាធារណៈធ្វើការនាំខ្លួនជនត្រូវចោទមានឈ្មោះ ផុន ចំរើន ទៅដាក់ ពន្ឋនាគារ ឬ មណ្ឌលឃុំខ្លួនខេត្តកំពតដោយអនុវត្តឲ្យបានត្រឹមត្រូវតាមច្បាប់ ៕