ខេត្តកំពង់ឆ្នាំង៖ លោក លឹម វ៉ាន់ដារ៉ា អាយុ៦០ឆ្នាំ ជាអតីតៈកងទ័ព( ឈ្មោះ សែម ប៊ុនហេង ) ជាគ្រួសារក្រីក្រ និងភរិយាឈ្មោះ នូ សុភាព អាយុ៤២ឆ្នាំ មានកូនប្រុសម្នាក់អាយុ១១ឆ្នាំ រស់នៅក្នុងភូមិចំការឃ្លៃ ឃុំស្វាយជ្រុំ ស្រុករលាប្អៀរ បានរងការរិះគន់ថា លោកបាននិយាយប្រាប់អ្នកកាសែតនូវរឿងមិនពិត ដោយថាកាលពីថ្ងៃ០៤ ខែមករា ឆ្នាំ២០១៦ លោកបានទៅសុំពិនិត្យសុខភាពនៅមន្ទីរពេទ្យបង្អែកខេត្តកំពង់ឆ្នាំង គ្មានប្រាក់បង់សេវាអោយមន្ទីរពេទ្យខេត្តចំនួន១ម៉ឺនរៀល និងមិនត្រូវបានគ្រូពេទ្យខេត្តពិនិត្យសុខភាព និងព្យាបាលជម្ងឺអោយឡើយ ហើយគាត់ក៏បាននិយាយរឿងនេះអោយអ្នកកាសែតដឹង និងបានចុះផ្សាយធ្វើអោយមានប្រតិកម្មពេញស្ថាប័នមន្ទីរពេទ្យខេត្ត និងថ្នាក់លើ។
ដើម្បីបញ្ជាក់រឿងនេះ នៅព្រឹកថ្ងៃទី០៦ ខែមករា ឆ្នាំ២០១៦នេះ អ្នកយកព័ត៌មានយើងបានជួបលោក លឹម វ៉ាន់ដារ៉ា អតីតៈយុទ្ធជន នៅក្នុងលំនៅដោយផ្ទាល់ ហើយលោកបាននិយាយអោយដឹងថា៖ លោកមានស្រុកកំណើតក្នុងស្រុកស្អាង ខេត្តកណ្តាល បានចូលបំរើកងទ័ពក្នុងឆ្នាំ១៩៨៥ នៅក្នុងអង្គភាពយោធាខេត្តបាត់ដំបង ដែលកាលណោះលោកមានឈ្មោះ សែម ប៊ុនហេង បន្ទាប់មកបានផ្លាស់មកនៅអង្គភាពវរះ៦ យោធាខេត្តកំពង់ឆ្នាំងការពារស្ពានស្រះអង្កាម ហើយបានផ្លាស់មកនៅកងពលលេខ៧០ កាលណោះមានលោក អ៊ិន ស៊ីដារ៉េ ជាមេកងពល។ នៅឆ្នាំ១៩៩៦ លោកបានរងរបួសខ្នងនៅក្នុងសមរភូមិភ្នំព្រឹកខេត្តបាត់ដំបង ដោយសារមិត្តភ័ក្រនៅក្បែរគាត់ជាន់ម៉ីន ក្នុងពេលប្រយុទ្ធ ពេលនោះគាត់ និងមិត្តភ័ក្រម្នាក់ទៀតបានរងរបួស និង២នាក់ទៀតបានពលីជិវិត។
នៅក្នុងឆ្នាំ១៩៩៧គាត់មានឋានះអនុសេនីយទោ ជំនួយការចាត់តាំងកងពលលេខ៧០ និងបានសុំឈប់ពីកងទ័ពព្រោះតែមានរបួសធ្វើការធ្ងន់មិនកើត ហើយក៏បានយកប្រពន្ធរស់នៅជាមួយគ្នាដល់សព្វថ្ងៃ។ រូបគាត់និងប្រពន្ធបច្ចុប្បន្នគ្មានឪពុកម្តាយឬបងប្អូនទេ ដីស្រែបានលក់មើលជម្ងឺម្តាយអស់ហើយមុនពេលគាត់ស្លាប់ ចំណែកមុខរបរប្តីប្រពន្ធសព្វថ្ងៃជាកម្មករកាប់គាស់ដី ឬបោកគក់លាងចានឆ្នាំងអោយគេ ហើយសព្វថ្ងៃមានដីទំហំ៩ម៉ែត្រគុណនិង១៣ម៉ែត្រ បានសង់កូនខ្ទមស្លឹកតូចមួយរស់នៅ ពេលមានជម្ងឺជីវ ភាពខ្វះខាតមុខខ្វះក្រោយ។
លោក លឹម វ៉ាន់ដារ៉ា បានរៀបរាប់អោយដឹងទៀតថា៖ នៅក្នុងខែ១១ ឆ្នាំ២០១៥ ដោយលោកមានជម្ងឺថ្លើមរាំរ៉ៃ ជម្ងឺឈាមសស៊ីឈាមក្រហម ចេះតែឈឺចុកចាប់ស្នាមរបួសលើឆ្អឹងខ្នង និងចេះតែធ្លាក់ឈាមតាមច្រមុះ លោកក៏បានកាន់បណ្ណ័សមធម៌ជនក្រីក្រប្រភេទ១ ទៅសុំពិនិត្យសុខភាពនិងព្យាលបាលជម្ងឺនៅមន្ទីរពេទ្យខេត្ត។នៅពេលចុះឈ្មោះសុំពិនិត្យសុខភាព គ្រូពេទ្យខេត្តតម្រូវអោយបង់សេវា១ម៉ឺនរៀល តែលោកមានប្រាក់តែ៥ពាន់រៀល គ្រូពេទ្យថាមិនអាចពិនិត្យសុខភាពបានទេ លោកក៏បានត្រឡប់មកផ្ទះវិញ។
ដោយឡែកនៅថ្ងៃទី០៤ ខែមករា ឆ្នាំ២០១៦ នេះលោកបានទៅមន្ទីរពេទ្យខេត្តម្តងទៀត តែពេលចូលដល់ក្លោងទ្វា រមន្ទីរពេទ្យខេត្ត បានជួបនារីម្នាក់យល់ថាជាគ្រូពេទ្យ បានសួរថា ខ្ញុំមានបណ្ណ័ក្រីក្រសុំពិនិត្យសុខភាពគ្រូពេទ្យយកលុយឬ អត់ នារីនោះឆ្លើយថាពេទ្យយកណាពូតែតិតតួចមិនច្រើនទេ ពេលនោះលោកអត់លុយក៏ត្រឡប់មកវិញចូលទៅមន្ទីរព័ត៌មានខេត្ត បំណងសុំអំណោយគេ ក៏បានជួបជាមួយអ្នកកាសែត និងបានប្រាប់ដំណើររឿងពីមុនមកទៅ តែការផ្សាយមិនផ្សាយគឺជាសេរីភាពរបស់អ្នកកាសែត។
ទាក់ទងនិងរឿងខាងលើនេះនៅព្រឹកថ្ងៃទី០៦ ខែមករា ឆ្នាំ២០១៦នេះ លោក សូរិន្ទី រ៉ាវុឌ្ឍី ប្រធានមន្ទីរពេទ្យបង្អែកខេត្តកំពង់ឆ្នាំងបានបញ្ជាក់ថា៖ ការពិនិត្យនិងព្យាលជម្ងឺចំពោះជនក្រីក្រមានបណ្ណ័សមធម៌ មន្ទីរពេទ្យខេត្តមិនយកប្រាក់មួយរៀលឡើយ គឺអង្គការរ៉ាក់ដែលជាអ្នកចេញបណ្ណ័សមធម៌អោយ ជាអ្នកចេញប្រាក់អោយមន្ទីរពេទ្យខេត្តជំនួសជនក្រីក្រ។
តាមការស្រាវជ្រាវឯកសារក្នុងខែ១១ ឆ្នាំ២០១៥ លោក លឹម វ៉ាន់ដារ៉ា ពិតជាបានមកសុំពិនិត្យសុខភាពមែន តែពេលគ្រូពេទ្យទាមទារអោយបង់ប្រាក់ថ្លៃសេវា១ម៉ឺនរៀល គាត់អត់ប្រាក់បង់គ្រប់ គ្រូពេទ្យអោយគាត់ទៅជួបមន្ត្រីអង្គការរ៉ាក់ នៅក្នុងមន្ទីរពេទ្យខេត្តអោយគាត់បង្ហាញបណ្ណ័សមធម៌ ដើម្បីអង្គការរ៉ាក់ចេញបណ្ណ័បង់ប្រាក់ជំនួស តែគាត់មិនទៅជួបគេទេបែរជាត្រឡប់ទៅផ្ទះវិញ ហើយដើរនិយាយថា គ្មានលុយ១ម៉ឺនរៀ លគ្រូពេទ្យខេត្តមិនពិនិត្យសុខភាពអោយទេ ដែលជារឿងខុសពីការពិតធ្វើអោយថ្នាក់លើមានប្រតិកម្មជាមួយមន្ទីរពេទ្យខេត្ត។
លោក ម៉ម ឈឿម ប្រធានមន្ទីរព័ត៌មានខេត្ត និងជាអ្នកនាំពាក្យខេត្ត បានអោយដឹងថា នៅព្រឹកថ្ងៃទី០៥ ខែមករាឆ្នាំ២០១៦ លោកបានហៅលោក លឹម វ៉ាន់ដារ៉ា មកសាកសួរនៅក្នុងមន្ទីរព័ត៌មានខេត្ត លោកដារ៉ា បានឆ្លើយថាបានចូលពេទ្យខេត្ត តែលោកដារ៉ា បានឆ្លើយប្រាប់ក្រុមការងារមន្ទីរសុខាភិបាលខេត្តថា មិនបានចូលពិនិត្យសុខភាពក្នុងពេទ្យខេត្តនោះទេ។ ដែលគេយល់ថាលោកដារ៉ា ដូចជាមានការចងចាំមិនសូវល្អពិបាកនឹងជឿដែរ តែក្រុមគ្រួសារលោកដារ៉ាពិតជាក្រីក្រពិតមែននិងកន្លងមក ក្រុមការងារក្នុងខេត្តក៏ធ្លាប់បានផ្តល់អំណោយ២ទៅ៣ដងហើយដែរ។ លោក ម៉ម ឈឿម សំណូមពរដល់សង្គមហ្វេស្បុក និងអ្នកកាសែតសូមស្រាវជ្រាវព័ត៌អោយបានច្បាស់លាស់ និងមានតុល្យភាពមុននិងធ្វើការចេញផ្សាយ ជៀសវាងការទម្លាក់កំហុសដល់ស្ថាប័នណាមួយដោយយើងមិនបានសាកសួរព័ត៌មាននោះអោយបានច្បាស់លាស់តាមវិជ្ជាជីវនោះ៕
