ស្ទឹងត្រែង៖សមណសិស្សនៅខេត្តស្ទឹងត្រែងចំនួន ១២៤ អង្គនាក់បានចូលប្រឡងយកវិញ្ញាបនបត្រធម៌វិន័យថ្នាក់ត្រី ទោ ឯកសំរាប់ឆ្នាំសិក្សា២០១៦ នៅសាលាពុទ្ធិកសិក្សាវត្តស្រះកែវមនីវណ្ណ សង្កាត់ស្រះឬស្សីក្រុងខេត្តស្ទឹងត្រែង ក្រោមកិច្ចសហការពីអគ្គាធិការដ្ឋានពុទ្ធិកសិក្សា ការិយាល័យធម្មវិន័យរួមនិងមន្ទីរធម្មការ និងសាសនាខេត្ត នៅថ្ងៃទី០៦ មករា ឆ្នាំ២០១៦។លោក មៀច អ៊ាង ប្រធានមន្ទីរធម្មការ និងសាសនាខេត្ត បានអានបទបញ្ញាត្តិសម្រាប់ការប្រឡងយកវិញ្ញាបនបត្រធម៌វិន័យថ្នាក់ត្រី ទោ ឯក នេះគឺធ្វើឡើងទូទាំងប្រទេស ដើម្បីពង្រឹងគុណភាពការសិក្សាផ្នែកអក្សរសាស្ត្រភាសាបាលីផងនិងអក្សរសាស្ត្រខ្មែរយើងផង។ លោកប្រធានមន្ទីរធម្មការនិងសាសនាខេត្តបានបន្តទៀតថា៖វិញ្ញាសាប្រឡងមាន ៤វិញ្ញាសា រូមមានទី១ព្រះវិន័យធ៌មទី២ពុទ្ធប្បវត្តិ ទី៣ប្រជុំកងធ៌ម និងទី៤សាសនសុភាសិត ហើយការប្រឡងនេះមានរយៈពេលមួយថ្ងៃ។
ព្រះតេជ គុណនូ ចាន់ថាព្រះមេគុណខេត្តស្ទឹងត្រែង ព្រះអង្គមានសង្ឃដីកា ចាត់ទុកថាការប្រឡងនេះគឺជាការលើកតម្កើននូវវប្បធម៌ អរិយធម៌របស់ជាតិសាសនាជាពិសេសយើងរក្សានូវព្រះពុទ្ធសាសនារបស់យើងឲ្យមានកិត្តិនាមខ្ពង់ខ្ពស់ ទាំងពុទ្ឋចក្រ និងអាណាចក្ររចនាសម្ពន្ធ័ទាំងពីឲ្យដើរទន្ទឹមគ្នាដើម្បីចូលរួមចំណែកធ្វើឲ្យសាសនាជាតិយើងមានការរីកចំរើន ក្រោមដំបូលសន្តិភាពដែលមាន សម្ដេចអគ្គមហាសេនាបតីតេជោ ហ៊ុន សែន ជាប្រមុខដឹកនាំ។
ព្រះគ្រូមេគុណនូ ចាន់ថា មានសង្ឃដីកាបញ្ញាក់ថា៖សមណសិស្សប្រឡងយកវិញ្ញាបនបត្របឋមសិក្សាធម្មវិន័យថ្នាក់ត្រី ទោ ឯក ត្រូវតែប្រតិបត្តិតាមអគ្គាធិការដ្ឋានពុទ្ធិកសិក្សាជាតិនេះឲ្យបានត្រឹមត្រូវដើម្បីពង្រឹងនូវចំណេះដឹង ប្រកបដោយសេចក្ដីថ្លៃថ្នូរ ជួយពង្រឹងដល់ផ្នែកព្រះពុទ្ធសាសនាឲ្យមានភាពរឹងមាំ។
ព្រះគ្រូមេគណបានផ្ដាំផ្ញើឲ្យ សមណសិស្សទាំងអស់ត្រូវខិតខំតាំងចិត្តឲ្យហ្នឹងបំពេញកាតព្វកិច្ចប្រឡងនេះយកឲ្យបាននូវវិញ្ញាបនបត្រ័ គ្រប់ៗព្រះអង្គ ដើម្បីបន្ដដឹកនាំព្រះពុទ្ធសាសនា ដែលជាសាសនារបស់រដ្ឋយើង ឲ្យថ្កុំថ្កើងរុងរឿងទៅថ្ងៃអនាគត ។ដោយឡែកនៅខេត្តស្ទឹងត្រែង មានចំនួន ១២៤អង្គនាក់ និងចំនួន៥ ថ្នាក់ដែលមាន ថ្នាក់ទោ ២៣អង្គ ថ្នាក់ត្រី ៣ ថ្នាក់ ថ្នាក់ឯក ១ថ្នាក់៕
