ឧត្តរមានជ័យ៖ កាលពីវេលាម៉ោង១៦និង៣០នាទី ថ្ងៃទី១៦ ខែមករា ឆ្នាំ២០១៦ អធិការដ្ឋាននគរបាលស្រុកបន្ទាយអំពិល បានសហការណ៍ ជាមួយកម្លាំងជំនាញនគរបាលព្រហ្មទណ្ឌខេត្តដឹកនាំដោយលោកវរសេនីយ៍ទោ លឹម គី នាយរងការិយាល័យកណ្តាលព្រហ្មទណ្ឌ បានបង្ក្រាបករណីល្បែងឆ្នោតនិងកន្ទុយលេខខុសច្បាប់ មួយកន្លែងនៅចំណុចភូមិអំពិលថ្មី ឃុំអំពិល ស្រុកបន្ទាយអំពិល ខេត្តឧត្តរមានជ័យ បានឃាត់ខ្លួនជនសង្ស័យជាមេឆ្នោតនិងកន្ទុយលេខចំនួន៤នាក់។លោកវរសេនីយ៍ទោ លឹម គី នាយរងការិយាល័យ កណ្តាលព្រហ្មទណ្ឌខេត្ត បានឲ្យដឹងថា ជនសង្ស័យប្រុសស្រីចំនួន៤នាក់នោះ ទី១ឈ្មោះសាក់ សារៀម ហៅ វិន ភេទ ប្រុសអាយុ៤៨ឆ្នាំ មេឆ្នោត(ប្តី)រស់នៅភូមិអំពិលថ្មី ឃុំអំពិល ស្រុកបន្ទាយអំពិល ខេត្តឧត្តរមានជ័យ.២ឈ្មោះផុន សុខេន ភេទស្រីអាយុ៤៥ឆ្នាំ មេឆ្នោត(ប្រពន្ធ)រសនៅជាមួយគ្នា.៣ឈ្មោះ ផល ច្រិប ភេទស្រីអាយុ៣៥ឆ្នាំ ជាអ្នកលក់ឆ្នោត រស់នៅភូមិយ៉ក ឃុំអំពិល ស្រុកបន្ទាយអំពិល.៤ឈ្មោះឡាប់ មម ភេទស្រីអាយុ៣១ឆ្នាំ ជាអ្នកចាក់ រស់នៅភូមិអំពិលថ្មី ឃុំអំពិល ស្រុកបន្ទាយអំពិល ខេត្តឧត្តរមានជ័យ។លោកវរសេនីយ៍ទោ លឹម គី នាយរងការិយាល័យកណ្តាលព្រហ្មទណ្ឌ បានបន្តឲ្យដឹងទៀតថា វត្ថុតាងរួមមាន សៀវភៅកត់ឆ្នោតចំនួន១៥ក្បាល កន្ទុយលេខចំនួន៣០សន្លឹក ប្រាក់ថៃចំនួន១៦.៦០០បាត.ប្រាក់ខ្មែរចំនួន១.១៦០.៦០០រៀល.បច្ចុប្បន្ន ជនសង្ស័យព្រមទាំវត្ថុតាងខាងលើ កម្លាំងជំនាញបានរៀបចំសំណុំរឿងបញ្ជូនទៅស្នងការដ្ឋាននគរបាលខេត្តឧត្តរមានជ័យ ចាត់ការទៅតាមនិតិវិធីច្បាប់។លោកវរសេនីយ៍ទោលឹម គី នាយការិយាល័យកណ្តាលព្រហ្មទណ្ឌ បានបញ្ជាក់ឲ្យដឹងថា រូបលោកនិងលោកវរសេនីយ៍ទោ ហម ភិរម្យ អធិការនគរបាលស្រុក តែងតែហៅមកធ្វើការអប់រំនិងធ្វើកិច្ចសន្យាជាច្រើនលើកមកហើយ ក៏ប៉ុន្តែក្រុមមេឆ្នោតនិងកន្ទុយលេខ មិនព្រមស្តាប់ ទើបលើកនេះឈានទៅចាប់ឃាត់ខ្លួនតែម្តងទៅ៕
