កំពង់ធំៈ នៅទីបញ្ជាការតំបន់ប្រតិបត្តិការសឹករងកំពង់ធំ បានប្រារព្វពិធី ប្រគល់អដិ្ឋធាតុកងទ័ព ស្ម័គ្រចិត្ត វៀតណាម ដែលបានពលីជីវិត្តក្នុងសម័យសង្គ្រាម ត្រូវបាន កម្លាំងរុករកអដិ្ឋធាតុរបស់កងកម្លាំងK72 នៅក្នុងភូមិ សាស្ត្រខេត្តកំពង់ធំ ដោយបានសហការជាមួយ និងកម្លាំងរបស់តំបន់ប្រតិបត្តិកាសឹករងកំពង់ធំ ជំហ៊ានទី ១ ដំណាក់កាលទី១៥ និងបានធ្វើឡើងនៅព្រឹកថ្ងៃទី ២២ ខែ មករា ឆ្នាំ ២០១៦។
ពិធីប្រគល់អដិ្ឋធាតុកងទ័ពស្ម័គ្រចិត្តវៀតណាម ត្រូវបានធ្វើឡើង១៥លើកមកហើយ ដោយមានការចូលរួម ពីសំណាក់ឯកឧត្តម គង់ វិមាន អភិបាលរងខេត្តកំពង់ធំ និងឯកឧត្តម មាស សុំ មេបញ្ជាការង យោធភូមិភាគទី៤ ឯកឧត្តម សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ ព្រមទាំងមេបញ្ជាការយោធារខេត្តបិញភឿក ចូលរួមផងដែរ ការប្រគល់នៅពេលនេះ មានចំនួន ៦១ អដិ្ឋធាតុ ចំនួនសរុបទាំង១៥ដំណាក់កាលមាន១០១៤អដិ្ឋធាតុ ដែលជីករកបានពីស្រុក បារាយណ៍. ស្រុកសន្ទុក ,ក្រុងស្ទឹងសែន ,ស្រុកកំពង់ស្វាយ, ស្រុកស្ទោង ,ស្រុកប្រាសាទបាល្ល័ង្គ, ស្រុកប្រាសាទសំបូរ ស្រុកសណ្តាន់ ។
ឯកឧត្តម សោម ស៊ុន បានកោតសរសើរចំពោះកម្លាំងក្រុម កា៧០ និងកា ៧២ ដែលមានការអត់ធ្មត់ ទោះបី ដីរ៉ឹងកន្លែងលំបាក មានភ្លៀងមានខ្យល់ និងកន្លែងមួយចំនួនពិបាកក្នុងការរុករកអដិ្ឋធាតុ ក៏នៅតែមានការខិតខំប្រឹងប្រែង ចំណែកផលលំបាកដែលនៅសេសសល់ គឺទី១ ប្រជាពលរដ្ឋមួយចំនួនគាត់ពុំទាន់យល់ដឹងច្បាស់លាស់ អំពីការងារមនុស្សធម៌ ដោយកន្លែងខ្លះគាត់ចង់បានតែកំរៃនិងផលប្រយោជន៍ផ្សេងៗ តែគាត់ពុំបានផ្តល់ព័ត៌មានពិតប្រាកដ ដែលចំនុចពិបាកដែលកំពុងតែជួបប្រទះក្នុងការងាររយករកអដិ្ឋធាតុ ចំនុចទី២ គឺបញ្ហាភូមិសាស្ត្រ មានការប្រែប្រួល ពីមុនមកមានព្រៃ មានដើមឈើធំៗ ធ្វើឲ្យពិបាកក្នុងការចំណាំកន្លែងកប់សាកសព ដោយសារតែការអភិវឌ្ឍន៍របស់ប្រទេស ទើបមានការឈូសឆាយ ធ្វើជាចំការ សាលារៀន និងផ្ទះសំបែង វត្តអារាម ធ្វើអោយបាត់ទីតាំងសម្គាល់កប់សាកសព ចំនុចទី៣ គឺប្រជាពលរដ្ឋដែលគាត់ស្គាល់ទី តាំងកប់សាកសព គាត់មានអាយុចាស់ ហើយវង្វេង និងមួយចំនួនទៀតគាត់បានស្លាប់ តែទោះជាយ៉ាង ក៏កម្លាំងសហការព្យាយាមរុករកអដិ្ឋធាតុ ដើម្បីឲ្យបងប្អូនធ្វើមាតុភូមិនិវត្តន៍ឲ្យបងប្អូនបានយកទៅធ្វើបុណ្យតាម ប្រពៃណី ។
ឯកឧត្តម គង់ វិមាន បានប្រសាសន៍ថា ក្នុងនាមជាអាជ្ញាធរ ក៏ដូចជាថ្នាក់ដឹកនាំខេត្តកំពង់ធំ មានសេចក្តីរីករាយជាមួយនឹងគណៈប្រតិភូកងទ័ពស្ម័គ្រចិត្តវៀតណាម និងមានការសោកស្តាយក្រៀមក្រំជាមួយនឹងបងប្អូន សាច់ញាតិដែលបានបាត់បង់សមាជិក ហើយថ្ងៃនេះបានធ្វើពិធីបញ្ជូនដំណើរ អដិ្ឋធាតុកងទ័ពស្ម័គ្រចិត្តវៀត ណាម ដែលបានពលីសម័យសង្គ្រាម ហើយក៏សូមអគុណនូវកិច្ចសហការល្អ ពីអាជ្ញាធរវៀតណាម និង អាជ្ញាធរកម្ពុជា ក្នុងនាមរដ្ឋបាលសាលាខេត្តកំពង់ធំ ក៏ដូចជាប្រជាពលរដ្ឋ និងខិតខំសហការជាមួយគណៈកម្មការ ខេត្តបិញភឿកដើម្បីរុករកអដិ្ឋធាតុបន្តទៀត ។
ដោយ ប៊ុន រដ្ឋា