ខេត្តកំពង់ឆ្នាំង៖ ឯកឧត្តម ឈួរ ច័ន្ទឌឿន « សំណូមពរដល់ប្រជាពលរដ្ឋក្នុងក្រុង និងខេត្តកំពង់ឆ្នាំង ចូលរួមសហការជួយថែររក្សាអនាម័យ សណ្តាប់ធ្នាប់ របៀបរៀបរយនៅលើចិញ្ចើម សួនច្បារសាធារណៈ ភ្លើងបំភ្លឺផ្លូវ និងសូមជួយថែរក្សានូវសមិទ្ធិផលផ្សេងៗទៀតដែលរាជរដ្ឋាភិបាល និងអាជ្ញាធរខេត្តបានកសាង និងកំពុងអភិវឌ្ឍន៍ » ។ ឯកឧត្តម បានសំណូមពរបែបនេះ ទៅកាន់ប្រជាពលរដ្ឋ និងមន្ត្រីរាជការ នៅក្នុងពិធីក្រុងពាលីដើម្បីសុំបើកការដ្ឋានជួសជុលវិមានឯករាជ្យខេត្តកំពង់ឆ្នាំង និងសុំសេចក្តីសុខសាន្តជូនប្រជាពលរដ្ឋក្នុងខេត្ត នៅព្រឹកថ្ងៃទី២១ ខែមករា ឆ្នាំ២០១៦ នៅក្នុងសួនច្បារវិមានឯករាជ្យខេត្តកំពង់ឆ្នាំង។
ឯកឧត្តម ឈួរ ច័ន្ទឌឿន អភិបាលខេត្តកំពង់ឆ្នាំងបានមានប្រសាសន៍ទៀតថា៖ ក្រោមការដឹកនាំរបស់សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជារយៈពេល៣៧ឆ្នាំកន្លងមកនេះ សមិទ្ធិផលនានាត្រូវបានកសាង និងអភិវឌ្ឍនៅគ្រប់ទីកន្លែង។ ដោយឡែកខេត្តកំពង់ឆ្នាំងក៍បានទទួលនូវការអភិវឌ្ឍន៍បានជាច្រើនផងដែរ ជាពិសេសអភិវឌ្ឍន៍ ទៅលើប្រព័ន្ធធារាសាស្ត្រស្រោចស្រព ហេដ្ឋារចនាសម្ព័ន្ធផ្លូវថ្នល់ អាគារ សាលារៀន មណ្ឌលសុខភាព វត្តអារាម ។ល។ ថ្មីៗនេះ ដោយមានជំនួយពីប្រទេសវៀតណាម ក្នុងការជួសជុលវិមានឯករាជ្យខេត្តកំពង់ឆ្នាំង អាជ្ញាធរខេត្តបានចាប់ផ្តើមធ្វើពិធីបើកការដ្ឋានជួសជុលលាបថ្នាំ និងកែលំអរអោយវិមានឯករាជ្យខេត្តកំពង់ឆ្នាំងមានសោភ័ណភាពល្អឡើងវិញ។
ឯកឧត្តមអភិបាលខេត្តបានបញ្ជាក់ថា៖ នៅក្នុការជួសជុលនេះ គឺត្រូវពិនិត្យជួសជុលទៅលើក្បាលនាគទាំង១០០ ព្រោះថាក្បាលនាគមួយចំនួនបានបាក់បែក មួយចំនួនពុកផុយ និងមានវៀចមួយចំនួនផងដែរ។ ដោយឡែកចម្លាក់បិតភ្ជាប់នឹងជញ្ជាំងដំបូលខាងលើក៍ត្រូវរុះរើដាក់ថ្មី ប្រព័ន្ធលូជុំវិញវិមានក៍ត្រូវជួសជុល ហើយនៅលើជណ្តើរឡើងវិមានឯករាជ្យត្រូវកែរប្រែដាក់ថ្មម៉ាបជំនួសវិញ ក្រោយពីជួសជុល និងកែរលំអររួច អាជ្ញាធរខេត្តនឹងរៀបចំដាក់ភ្លើងបំភ្លឺនៅលើវិមានឯករាជ្យកំពង់ឆ្នាំងបន្ថែមទៀត គឺធ្វើយ៉ាងណាអោយតួវិមានឯករាជ្យមានភាពស្រស់ស្អាតទាំងថ្ងៃទាំងយប់ ដែលជាភាពទាក់ទាញភ្ញៀវទេសចរណ៍ផងដែរ។ ចំពោះផ្លូវមួយចំនួននៅក្នុងក្រុងកំពង់ឆ្នាំងវិញ អាជ្ញាធរេខត្តនឹងត្រូវរៀបចំដាក់បង្គោលភ្លើងបំភ្លឺគ្រប់ផ្លូវទាំងអស់ តែត្រូវធ្វើបន្តិចម្តងទៅតាមទឹកប្រាក់ដែលអាជ្ញាធរខេត្តមាន៕
