សៀមរាបៈ អំពើហិង្សាក្នុងគ្រួសារកើតឡើងភាគច្រើនបណ្តាលមកពីសែបសុរា និងភាពក្រក្រី។ ជាក់ស្តែងកាលពីល្ងាចថ្ងៃអាទិត្យ ទី២៤ ខែមករា ឆ្នាំ២០១៦ វេលាម៉ោង៤.០០។ មានអំពើហិង្សាក្នុងគ្រួសារមួយកើតឡើង ប្តីវាយប្រពន្ធ សន្លប់ជាងពីរម៉ោង។ ករណីនេះកើតឡើងនៅចំណុចចងសេះ ឃុំអន្លង់សំណរ ស្រុកជីក្រែង។ ជនសង្ស័យជាប្តីឈ្មោះ ភន់ សុផល អាយុ៣៣ឆ្នាំ មានស្រុកកំណើតនៅ ភូមិគរ ឃុំជីក្រែង ស្រុកជីក្រែង រីឯនារីជាប្រពន្ធរងគ្រោះឈ្មោះ អឿន ឆៃវ៉ាន អាយុ៣១ឆ្នាំ ស្រុកកំណើតនៅ ភូមិសំរោងធំ ឃុំអន្លង់សំណរ ស្រុកជីក្រែង តាមសម្តីលោក អ៊ុត ណន ជាឪពុកបង្កើតនារីរងគ្រោះនិយាយថាក្រុមគ្រួសារកូនរបស់គាត់មួយនេះមានជីវភាពក្រក្រីណាស់ ពុំទាន់មានផ្ទះសំបែងដីធ្លីនៅឡើយទេពួកគេប្រកបមុខរបរនេសាទនៅឯទន្លេដែលមានកន្លែងស្នាក់នៅចំណុចចងសេះ ហើយពួកគេមានកូនស្រីចំនួន២នាក់។ ម្យ៉ាងវិញទៀត ក្រុមគ្រួសាររបស់ពួកគេ តែងតែមានជម្លោះវាយតប់គ្នាជាច្រើនលើកច្រើនសារ។ ជម្លោះមុនៗមានមេភូមិ ហៅមកអប់រំ ហើយពេលខ្លះកូនប្រសាររបស់គាត់បានធ្វើកិច្ចសន្យាជាមួយអង្គការសិទ្ធនារីថាឈប់ប្រើអំពើហិង្សាជាមួយប្រពន្ធកូនហើយ។ អ្នកជិតខាងម្នាក់ដែលដឹកជនរងគ្រោះនិយាយថា លោក
ភន់ សុផល មិនដឹងជាស្រវឹងស្រាមកពីណាទេមកដល់ស្នាក់វិញស្រាប់តែឮជជែកជាមួយប្រពន្ធពីរបីម៉ាត់ក៏ទាញបន្ទះដែកមកវាយខ្នងប្រពន្ធជាច្រើនបន្ទះ រួចហើយទាញថ្មសំលៀងកាំបិត មកសំពោងក្បាល ធ្វើអោយនារីរងគ្រោះសន្លប់ជាងពីរម៉ោង ហើយអ្នកជិតខាងបានបើកកាណូតនាំនារីរងគ្រោះមកមណ្ឌលសុខភាពឃុំជីក្រែង ឃើញស្ថានភាពអ្នកជំងឺធ្ងន់ធ្ងរ ក្អួតធ្លាក់ឈាម ចេញពីមាត់ ទើបគ្រូពេទ្យប្រចាំមណ្ឌលសុខភាពឃុំជីក្រែងធ្វើលិខិតបញ្ជូនទៅមន្ទីរពេទ្យបង្អែកសូទ្រនិគមន៍។ លោក អ៊ុត ណន ជាឪពុកជនរងគ្រោះនិយាយថា គាត់មិនទាន់បានដាក់ពាក្យបណ្តឹងទៅសមត្ថកិច្ចនៅឡើយទេ ព្រោះគាត់កំពុងតែព្រួយបារម្ភពីជីវិតកូនរបស់គាត់។