ដើម្បីអូសយកផែលក់ត្រី លក់កសិផល និងលក់ស្លឹកឈើពីងពុងនៅទីនោះ
ខេត្តកំពង់ឆ្នាំង៖ គម្រោងកសាងផ្លូវលំស្របតាមមាត់ទន្លេប្រវែង៥០០ម៉ែត្រនៅចំណុចអក្សរតេចុងភូមិចុងកោះ សង្កាត់ផ្សារឆ្នាំង ក្រុងកំពង់ឆ្នាំង ត្រូវបានមន្ទីរសាធារណៈការ និងដឹកជញ្ជូនខេត្ត បើកការកសាងនៅព្រឹកថ្ងៃទី២៥ ខែមករា ឆ្នាំ២០១៦ ដោយមានការចូលរួមពីឯកឧត្តម ស៊ុន សុវណ្ណរិទ្ធ អភិបាលរងខេត្តនិងអាជ្ញាធរក្រុង និងសង្កាត់កំពង់ឆ្នាំង ដើម្បីរៀបចំយកផែលក់ត្រី ទីតាំងលក់កសិផល និងលក់ស្លឹកឈើពីងពុង អោយមកលក់ដូរនៅទីនោះ។
លោក ឆាយ លាភា អនុប្រធានមន្ទីរសាធារណៈការ និងដឹកជញ្ជូនខេត្តបានអោយដឹងថា៖ គម្រោងកសាងផ្លូវលំគ្រួសក្រហមស្របតាមមាត់ទន្លេនៅចំណុចខាងលើនេះមានប្រវែង៥០០ម៉ែត្រ មានកំពស់ជា
មធ្យម២,៨០ម៉ែត្រ និងខ្នងផ្លូវខាងលើមានទទឹង៦ម៉ែត្រ ដើម្បីសម្រួលចរាចរណ៍ជូនប្រជាពលរដ្ឋ ក្នុងការដឹកជញ្ជូនផលនេសាទ និងកសិផលផ្សេងៗ នៅពេលអាជ្ញាធរខេត្ត ផ្លាស់ប្តូរផែលក់ត្រី និងទីតាំងលក់ឈើពីងពុងស្លឹក ពីថ្នល់ដាច់ក្នុងភូមិចុងកោះ យកមកអោយលក់ដូរ នៅចំណុចនេះនៅក្នុងខែមិនា ក្រោយពេ លកសាងផ្លូវនេះរួច ដោយគម្រោងកសាងផ្លូវ១ខ្សែនេះនិងធ្វើអោយហើយនៅបំណាច់ខែកុម្ភះនេះ។
ឯកឧត្តម ស៊ុន សុវណ្ណរិទ្ធ អភិបាលរងខេត្តកំពង់ឆ្នាំង និងជាប្រធានគណៈកម្មការចំរុះខេត្តរៀបចំតំ
បន់ទេសចរណ៍តាមមាត់ទន្លេផ្សារក្រោមរបស់ខេត្ត បានអោយអ្នកយកព័ត៌មានយើងដឹងថា៖ គម្រោងអភិ
វឌ្ឍន៍តំបន់ទេសចរណ៍ផ្សារក្រោមរបស់ខេត្តមានរយះពេល៥ឆ្នាំ គឺពីឆ្នាំ២០១៥ ដល់២០១៩ ដោយចែកចេញជា៧ជំហាន ហើយការកសាងផ្លូវលំស្របមាត់ទន្លេក្នុងពេលនេះគឺជាការអនុវត្តជំហានទី៣ហើយ។ឯកឧត្តមបានបញ្ជាក់អោយដឹងទៀតថា៖ នៅក្នុងជំហានទី៣នេះ អាជ្ញាធរខេត្ត ក្រុង និងសង្កាត់ក៏បានធ្វើសម្រង់ស្ថិតិផ្ទះប្រជាពលរដ្ឋដែលសាងសង់ស្របមាត់ទន្លេប៉ែកខាងកើត ដែលមានផលប៉ះពាល់ក្នុ
ងគម្រោងអភិវឌ្ឍន៍ចំនួន២១០គ្រួសារ ហើយក្រុមការងារក៍បានធ្វើការប្រជុំសម្របសម្រួលគ្នាជាមួយប្រជាពលរដ្ឋជាម្ចាស់ផ្ទះ ដោយមានការឯកភាពប្តិតមេដៃថានឹងទទួលយកប្រាក់គោលនយោបាយពីរដ្ឋ ចំនួន២០៩គ្រួសារ នៅពេលពួកគាត់រុះរើផ្ទះទៅនៅលើទីតាំងថ្មី និងនៅពេលក្រុមហ៊ុនវិនិយោទន់ចាក់ដីរួចក្នុងតំបន់អភិវឌ្ឍន៍ ក្នុងនោះគឺ ផ្ទះតូចព្រមទទួលយក៥០០ដុល្លា ផ្ទះមធ្យម៧០០ដុល្លា និងផ្ទះធំ៩០០ដុល្លា។
ដោយឡែកនៅពេលប្រជាពលរដ្ឋទាំង២១០គ្រួសារ រុះរើផ្ទះនៅស្របមាត់ទន្លេអស់ ទៅនៅលើទីតាំងថ្មី អាជ្ញាធរខេត្តនិងកសាងផ្លូវស្របតាមមាត់ទន្លេនេះទាំងអស់ចាប់ពីថ្នល់ដាច់ដើមភូមិ មកចុងភូមិចុងកោះដែលមានប្រវែងជិត៣គីឡូម៉ែត្រជាផ្លូវកៅស៊ូ អោយខ្ពស់ផុតទឹកទន្លេខែវស្សា ដើម្បីរៀបចំសួនច្បារតាមមាត់ទន្លេជាតំបន់ទេសចរណ៍ ហើយនៅជាប់មាត់ទន្លេនេះដែរក៏រាជរដ្ឋាភិបាលបានអនុញ្ញាតអោយអាជ្ញាធរខេត្តរៀបចំផ្សាររាត្រីមួយកន្លែងផងដែរ ដើម្បីលក់ដូរវត្ថុអនុស្សាវរីយ៍ និងផលិតផលរបស់ប្រជាពលរដ្ឋជូនភ្ញៀវទេសចរណ៍ដែលមកលេងកំសាន្តក្នុងខេត្តកំពង់ឆ្នាំង៕
