សមាគមយុវជន កំណែទំរង់រដ្ឋ បានចេញសេចក្តីថ្លែងការណ៏ ស្តីពីស្ថានការណ៍នយោបាយនៅកម្ពុជា ខណៈដែលក្រុមបក្សប្រឆាំងគំរាមធ្វើបាតុកម្ម នៅអាមេរិក ក្នុងគ្រាសម្តេចតេជោ ហ៊ុន សែន ទៅចូលរួមប្រជំុកំពូលអាស៊ានអាមេរិក
ដោយមានការព្រួយបារម្ភពីសំណាក់ប្រជាពលរដ្ឋចំពោះស្ថានការណ៍នយោបាយកម្ពុជា ដែលអាចនឹងឡើង កំដៅវឹកវរសារជាថ្មី ដោយសារតែការព្រមានធ្វើបាតុកម្មប្រឆាំងវត្តមានសម្តេចនាយករដ្ឋមន្ត្រី ហ៊ុន សែន ក្នុងកិច្ចប្រជុំកំពូល អាមេរិក-អាស៊ាន នៅសហរដ្ឋអាមេរិកនាខែកុម្ភៈខាងមុខ ពីក្រុមអ្នកគាំទ្រគណបក្សសង្គ្រោះជាតិ និងបន្ទាប់ពីបានឃើញការឆ្លើយតបនឹងការព្រមានរបស់សម្តេចនាយករដ្ឋមន្ត្រី ហ៊ុន សែន បានបញ្ជាក់ច្បាស់ៗថានឹងមានបាតុកម្មប្រឆាំងថ្នាក់ដឹកនាំគណបក្សសង្គ្រោះជាតិ នៅទូទាំងប្រទេស ពីសំណាក់អ្នកគាំទ្រគណបក្សប្រជាជនកម្ពុជាវិញ។
សមាគមយុវជនកំណែទម្រង់រដ្ឋ ក៏បានឃើញសេចក្តីប្រកាសព័ត៌មាន របស់គណបក្សសង្គ្រោះជាតិផងដែរដែលបានបង្ហាញពីការដកថយ ដោយបានអះអាងថាគណបក្សគ្មានគោលនយោបាយឱ្យសកម្មជនរបស់ខ្លួនធ្វើបាតុកម្មនោះឡើយ។ ការបញ្ជាក់នូវគោលជំហរបែបនេះ គឺជាសញ្ញាវិជ្ជមានសម្រាប់ពលរដ្ឋខ្មែរ ដែលស្រលាញ់សន្តិភាព និងសង្ឃឹមថាបញ្ជៀសបាននូវការប្រឈមមុខដាក់គ្នា និងបែកបាក់សាមគ្គីជាតិ។
ក្នុងស្មារតីបង្រួបបង្រួមជាតិ ស្រលាញ់សន្តិភាព ស្ថេរភាពនយោបាយ សមាគមយុវជនកំណែទម្រង់រដ្ឋ យល់ឃើញថា គណបក្សប្រជាជនកម្ពុជា និងគណបក្សសង្គ្រោះជាតិ គួរបន្តស្វែងរកដំណោះស្រាយដោយឈរលើកិច្ចព្រមព្រៀងស្តីពីដំណោះស្រាយនយោបាយរវាងគណបក្សទាំងពីរ ថ្ងៃទី២២ ខែកក្កដា ឆ្នាំ២០១៤ និងសេចក្តីថ្លែងការណ៍រួមនៅថ្ងៃទី៨ ខែឧសភា ឆ្នាំ២០១៥ ក្នុងគោលបំណងប្តេជ្ញាអនុវត្តវប្បធម៌សន្ទនាឱ្យមានប្រសិទ្ធភាព ដោយស្មោះត្រង់ជាមួយគ្នា និងសន្តិវិធី គោរព និងឱ្យតម្លៃគ្នាទៅវិញទៅមក ចៀសវាងឱ្យបានជាដាច់ខាតនូវការញុះញង់ ការជេរប្រមាថ ការលាបពណ៌ និងលុបបំបាត់ឱ្យបាននូវវប្បធម៌សងសឹក នយោបាយប្រកាន់ពូជសាសន៍ និងនយោបាយជ្រុលនិយមជាដើម។
តាងនាមប្រជាពលរដ្ឋខ្មែរ សមាគមយុវជនកំណែទម្រង់រដ្ឋ សង្ឃឹមយ៉ាងមុតមាំថា ថ្នាក់ដឹកនាំគណបក្សនយោបាយទាំងពីរ នឹងណែនាំសកម្មជនរបស់ខ្លួនគោរពឱ្យបាននូវឆន្ទៈរបស់ថ្នាក់ដឹកនាំដោយយកវប្បធម៌សន្ទនាជាមូលដ្ឋាន។
សូមឱ្យដំណើរទស្សនៈកិច្ចរបស់លោកនាយករដ្ឋមន្ត្រី ហ៊ុន សែន ទៅកាន់សហរដ្ឋអាមេរិកដែលតំណាងឱ្យប្រជាជាតិខ្មែរនៅពេលខាងមុខនេះ ទទួលបានផលប្រយោជន៍ជូនជាតិមាតុភូមិ និងពុំមានការរំខាន ពីសំណាក់ក្រុមណាមួយឡើយ ៕
សូមអានសេចក្តីថ្លែងការណ៍ ខាងក្រោមនេះ