ខេត្តព្រះវិហារៈ កំលាំងសមត្ថកិច្ចចម្រុះរួមមានមន្ដ្រីរដ្ឋបាលព្រៃឈើជាបុគ្គលិកអង្គការការពារព្រៃឈើនិងជីវចម្រុះហៅកាត់WCSសហការជាមួយនគរបាលប្រចាំទីស្នាក់ការអភិរក្សនៅចំណុចរខិតភូមិរបុញឃុំមរកតស្រុកជាំក្សាន្តបានចុះល្បាតឃ្លាំមើលបទល្មើសកាប់បំផ្លាញព្រៃឈើនិងបរបាញ់សត្វព្រៃកាលពីថ្ងៃទី២៣ដល់២៤មករា២០១៦។ទីស្នាក់ការរដ្ឋបាលរបស់អង្គការWCSមានមូលដ្ឋានក្នុងសង្កាត់កំពង់ប្រណាកក្រុងខេត្តព្រះវិហារ។
គួររំលឹកថាតំបន់ខាងលើនេះមានភូមិសាស្ដ្រស្មុគស្មាញលាតសន្ធឹងជាប់៣ស្រុកគឺស្រុកត្បែងមានជ័យស្រុកឆែបនិងស្រុកជាំក្សាន្តត្រូវបានរដ្ឋបាលព្រៃឈើដាក់ឈ្មោះថាព្រៃការពារព្រះវិហារដែលមានទំហំប្រមាណ១ម៉ឺនហិកតាបួនជ្រុង។រីឯសកម្មភាពជនល្មើសកាប់បំផ្លាញព្រៃឈើក្នុងព្រៃជ្រៅៗមានជារៀងរាល់ថ្ងៃហើយការចុះបង្ក្រាបរបស់កំលាំងសមត្ថកិច្ចទៅលើក្រុមជនល្មើសក៍មិនងាយស្រួលទ្បើយ។
សេចក្តីរាយការណ៍បានអោយដឹងថាជារៀងរាល់ថ្ងៃស្ថានភាពក្នុងព្រៃអភិរក្សទាំងមូលមិនសូវមានសន្តិសុខល្អប៉ុន្មានទេសំរាប់ក្រុមសមត្ថកិច្ចខាងលើចុះល្បាតព្រោះក្រុមជនខិលខូចកាប់បំផ្លាញព្រៃឈើនិងបរបាញ់សត្វព្រៃសុទ្ធតែមានកាំភ្លើងកែច្នៃប្រភេទការាប៊ីន។កាលពីចុងឆ្នាំ២០១៥ខ្មាន់កាំភ្លើងអាការ៤៧បានលបបាញ់សម្លាប់ចោលមន្ដ្រីរដ្ឋបាលព្រៃឈើម្នាក់នគរបាលស្រុកឆែបម្នាក់និងម្នាក់ទៀតរងរបួសធ្ងន់ជានគរបាលការពារព្រំដែនគោកនៅអូរជុញហើយមកដល់ពេលនេះអាជ្ញាធរមិនទាន់ចាប់បានជនដៃដល់នៅទ្បើយទេ។
ទោះបីយ៉ាងណាកំលាំងសមត្ថកិច្ចរួមមានមន្ដ្រីរដ្ឋបាលព្រៃឈើនិងនគរបាលដែលមានទីស្នាក់ការអភិរក្សស្ថិតនៅចំណុចរខិតភូមិរបុញមិនបានរាថយនិងខ្លាចញញើតនឹងក្រុមជនល្មើសទេគឺនៅតែចុះល្បាតការពារធនធានធម្មជាតិព្រៃឈើនិងសត្វព្រៃជានិច្ចនៅតាមតំបន់ព្រៃការពារព្រះរកា។សមត្ថកិច្ចបានរាយការណ៍អោយដឹងថាការចុះល្បាតមានរយះពេល២ថ្ងៃចាប់ពីថ្ងៃទី២៣ដល់២៤មករា២០១៦ជាលទ្ធផលដោះខ្សែអន្ទាក់ចាប់សត្វព្រៃខុសច្បាប់បានចំនួន៩៧អន្ទាក់ត្រូវបានរឹបអូស។
ប្រភពព័ត៌មានដដែលបញ្ជាក់ថាក្នុងការដើរល្បាតនោះក្រុមសមត្ថកិច្ចមិនបានជួបប្រទះសកម្មភាពបំផ្លាញព្រៃឈើនិងជនខិលខូចនោះទេ។សមត្ថកិច្ចនគរបាលអះអាងថាអន្ទាក់ចាប់សត្វព្រៃដែលរឹបអូសបានគឺជនល្មើសទើបដាក់ថ្មីៗហើយអាចរត់គេចខ្លួននៅពេលដឹងថាកំលាំងសមត្ថកិច្ចបានចុះទៅដល់៕