ស្ទឹងត្រែង៖ជនសង្ស័យចំនួន២នាក់ ខ្មែរម្នាក់ឡាវម្នាក់ពាក់ព័ន្ធនិងករណីចែកចាយជួញដូរគ្រឿងញៀនដោយខុសច្បាប់ ត្រូវបានកម្លាំងអាវុធហត្ថខេត្ត ធ្វើការឃាត់ខ្លួន ជាមួយគ្រឿងញៀនប្រភេទមេតំហ្វេតាមីនម្សៅក្រាមពណិ៍ថ្លាស(ICE)ចំនួន៨៧,៣ក្រាម។
ប្រតិបត្តិការករណីបង្ក្រាបគ្រឿងញៀនខាងលើនេះ បានធ្វើឡើងកាលពីវេលាម៉ោង ១៣និង៣០នាទីថ្ងៃទី២៦ខែមករាឆ្នាំ២០១៦នៅចំនុច ភូមិណាអូង ឃុំស្រែសំបូរ ស្រុកសៀមប៉ាង ខេត្តស្ទឹងត្រែង។
លោកវរៈសេនីយ៍ទោឌួង វិចិត្រប្រធានមន្ទីរព័ត៍មាននិងសន្តិសុខអាវុធហត្ថខេត្តបានអោយដឹងថាជនសង្ស័យ២នាក់ដែលសមត្ថកិច្ចឃាត់ខ្លួនមាន១ឈ្មោះខាំ ហ្វាន់ ភេទប្រុស អាយុ៣០ឆ្នាំ(ជនជាតិឡាវ)មានមុខរបរជាជាងយន្តហោះ អោយរដ្ឋាភិបាលប្រទេសឡាវ មានទីលំនៅភូមិសូត្រ ស្រុកមឿងខូង ខេត្តចំប៉ាសាក់ប្រទេសឡាវ ២ឈ្មោះសៅ សៀន ភេទប្រុស អាយុ៣៣ឆ្នាំ(ខ្មែរ)មុរបរកសិករ កើតនៅភូមិពងគ្រៀល ឃុំព្រែកមាស ស្រុកសៀមប៉ាង ខេត្តស្ទឹងត្រែង។
លោកវរៈសេនីទោបន្តទៀតថាករណីឃាត់ខ្លួនជនសង្ស័យជនជាតិឡាវម្នាក់ខ្មែរម្នាក់ខាងលើកំលាំងជំនាញ បានការស៊ើបអង្កេតអស់រយៈពេលជាច្រើនខែមកហើយ ដែលក្រុមឧក្រិដ្ឋជន តែងតែលបលួចធ្វើសកម្មភាពឆ្លងកាត់ តាមព្រំដែនចូលមកទឹកដីកម្ពុជា។ក្រោយការឃាត់ខ្លួនជនសង្ស័យត្រូវបានបញ្ជូនមកទីបញ្ជាការកដរាជអាវុធហត្ថខេត្តធ្វើការសាកសួរ។
គ្រឿងញៀនត្រូវបានធ្វើតេស្តបឋមរកសាធាតុញៀនចំពោះមុខជនសង្ស័យនឹងមានការចូលរួមពីលោកស្រីស៊ុន យ៉ឹតព្រះរាជអាជ្ញារងផងដែរ។ជនសង្ស័យបានឆ្លើយសារភាពចំពោះមុខសមត្ថកិច្ចថាវត្ថុតាងថ្នាំញៀន ដែលសមត្ថកិច្ចចាប់បានពិតជារបស់ខ្លួន ពិតប្រាកដមែន។
បច្ចុប្បន្នជនសង្ស័យជនជាតិឡាវម្នាក់ខ្មែរម្នាក់រួមនឹងងវត្ថុតាំងថ្នាំញៀនប្រភេទមេតំហ្វេតាមីន(ICE)ចំនួន៧៨,៣ក្រាម ត្រូវបានសមត្ថកិច្ចរៀបចំសំណុំរឿង នាំខ្លួនទៅកាន់តុលាការនៅព្រឹកថ្ងៃ២៨ខែមករាស្អែកនេះ ដើម្បីចាត់ការតាមផ្លូវច្បាប់៕