ខេត្តកំពង់ធំៈ ដំណាំស្វាយកែវល្មៀតដែលប្រជាពលរដ្ឋបានដាំ កំពុងតែត្រូវប៉ានក្នុងទីផ្សារ ក្នុងស្រុកនិងក្រៅស្រុក ធ្វើឲ្យប្រជាពលរដ្ឋដែលប្រកបមុខរបរដាំដំណាំស្វាយ មានទឹកមាត់លេប ក្រោយពីផ្លែស្វាយ ត្រូវប៉ានតាមទីផ្សារ ភោជនីយ៍ដ្ឋាន និងអាហារដ្ឋាន រួមទាំងការនាំចេញទៅទីផ្សាតអន្តរជាតិ ដែលប្រជាពលរដ្ឋ រស់នៅក្នុងភូមិសូយោង ឃុំ សូយោង ស្រុកបារាយណ៍ ខេត្តកំពង់ធំ បានចាប់អាជីពដាំដំណាំជាការងារស្នូល។
នៃរូបភាពអតីតកាល ប្រជាពលរដ្ឋខែ្មរ ដែលរស់នៅតាមបណ្តាខេត្តជាប់ព្រំប្រទល់ ប្រទេសថៃ ក៏ដូចជាទីក្រុងភ្នំពេញ ត្រូវបានពឹងផ្អែកស្ទើតែទាំងស្រុង នូវបន្លែ ផ្លែឈើ ពីប្រទេសថៃ និងប្រទេសវៀតណាម តែមកដល់ឆ្នាំ២០១៦ ប្រជាពលរដ្ឋជាច្រើន បាននាំនូវផលិតផល ដំណាំផ្លែឈើ ត្រឡប់ទៅ ប្រទេសជិតខាងវិញម្តង ដោយសារតែភាពឆ្លៀសវៃ របស់ប្រជាកសិករ បានជ្រើសរើសមុខរបរ ធ្វើចំការជាអាជីព ដោយមានខាងមន្ទីរកសិកម្ម និងស្ថាប័នជំនាញណែនាំ នូវបច្ចេកទេស ដល់ប្រជាកសិករ ក្នុងការបង្ករបង្កើនផល ធ្វើឲ្យមានលទ្ធភាពក្នុងការផលិត ទំនិញផ្សេងៗនាំចេញទៅ ក្រៅប្រទេស។
លោក អេប ប៊ុនសៀង និងអ្នកស្រី ឈុន លីហួរ រស់នៅក្នុងភូមិ សូយោង ឃុំ សូយោង ស្រុកបារាយណ៍ ខេត្តកំពង់ធំ បានឲ្យដឹងថា គាត់បានចាប់អាជីពដាំដំណាំស្វាយ មកជាច្រើនឆ្នាំមកហើយ ដោយយល់ថា ក្នុងនាំលោកជាកសិករ គ្មានការងារអ្វីដែលល្អជាងការដាំដំណាំនោះទេ សម្រាប់ការផ្គត់ផ្គងសេដ្ឋកិច្ចគ្រួសារ តែត្រូវបានសិក្សាពីវិធីក្នុងការដាំ និងការថែរក្សា ដាក់ជីឲ្យបានត្រឹមត្រូវតាមបច្ចេកទេស ទើបអាចប្រមូលផលដំណាំ ស្វាយ ក្នុងមួយឆ្នាំបីលើក ហើយ សម្រាប់ផ្លែស្វាយគឺមានឈ្មួញមកកាម៉ង់ដល់ចំការ ដើម្បីដឹកនាំចេញទៅប្រទេសថៃវិញ រាប់សិបតោន ។
លោក ពូ ម្នាក់ដែលជាតៃកុងរថយន្តបានប្រាប់ឲ្យដឹងថា ផ្លែស្វាយទាំងនេះ ត្រូវបានថៅកែកាម៉ង់ ពីម្ចាស់ចំការ រាប់សិបតោនហើយត្រូវបានដឹកចេញពីខេត្តកំពង់ធំ ឆ្លង់កាត់ខេត្តបាត់ដំបង រហូតដល់ព្រំប្រទល់ថៃ ចូលតាមច្រកឡែម ក្នុងខេត្តបន្ទាយមានជ័យ នាំចូលទៅប្រទេសថៃ លោកបានបន្តថា បច្ចុប្បន្នប្រជាជនថៃ បានកាម៉ង់ផ្លែឈើ និងបន្លែ ពីប្រទេសខ្មែរវិញមួយចំនួនផងដែរ រីឯប្រជាពលរដ្ឋខ្មែរមួយចំនួន ក៏ចូលទៅទិញផ្លែស្វាយពីផ្សាថៃមកវិញ ដោយគាត់ មិនដឹងថា ការពិតផ្លែស្វាយនេះ ត្រូវបាននាំចេញពីប្រទេសខ្មែរនោះទេ ។
ដោយ ប៊ុន រដ្ឋា