កំពង់ធំៈ ប្រជាកសិករបានសម្តែងការព្រួយបារម្ភណ៍យ៉ាងខ្លាំងពីការរំពឹងទុកនៅពេលឆាប់ៗខាងមុខ ចំពោះបញ្ហាទឹកស្ទឹងស្រកលឿនជាងឆ្នាំមុន ដោយសារតែពួកគាត់ មានមុខរបរជាកសិករចិញ្ចឹមជីវិតដោយសារការធ្វើស្រែ និងដាំដំណាំ ចិញ្ចឹមសត្វ ខណៈពេលដែលទើតែដាច់ខែមករា ទឹកស្ទឹងស្រកខុសពីឆ្នាំមុនៗ ។
ប្រជាពលរដ្ឋរស់នៅក្នុងឃុំកំពង់គោ ស្រុកកំពង់ស្វាយ ខេត្តកំពង់ធំ មានមុខរបរស្នូល ប្រមាញ៨០ភាគរយ ក្នុងការធ្វើ ស្រែប្រាំង ឬស្រែប្រដេញទឹក ប្រជាពលរដ្ឋមួយចំនួនដែលនៅប៉ែកខាងលើ ដែលបានធ្វើស្រែប្រាំង បានច្រូតកាត់ជា បណ្តើរៗ ចំណែកប្រជាពលរដ្ឋ ដែលបានធ្វើស្រែប្រាំងនៅប៉ែកខាងទន្លេសាបកំពុងតែធ្វើការសាបព្រោះជាបណ្តើរៗ ដើម្បីឲ្យទាន់រដូវទឹកស្រក ។
លោក ផុន ភាព ជាប្រជាកសិករមានមុខរបរជា អ្នកធ្វើស្រែប្រាំងបានឲ្យដឹងថា ឆ្នាំនេះមានការព្រួយបារម្ភណ៍ យ៉ាងខ្លាំងខ្លាចតែ មិនទឹកគ្រប់គ្រាន់ក្នុងការបូមដាក់ស្រែប្រាំងទេ ដោយសារតែទឹកស្ទឹងសែនបានស្រកលឿន ខុសពីឆ្នាំមុន ក្នុងនោះក៏មានអ្នកធ្វើស្រែរាប់រយនាក់ នាំគ្នាបូមមួយថ្ងៃៗរាប់ម៉ឺនម៉ែត្រគូប ក្រៅពីបញ្ហាខ្វះទឹក គឺបញ្ហាដែលប្រឈម គឺស្រូវកើតរោក ដោយសារតែខ្វះទឹក និងសត្វកណ្តុរជាច្រើន ដែលជាសត្រូវលេខ១របស់អ្នកធ្វើស្រែ។
លោក យោ ឡា ប្រធានមន្ទីរធនធានទឹក ខេត្តកំពង់ធំ បានឲ្យដឹងតាមទូរស័ព្ទថាស្ទឹងសែនវាខុសពីស្ទឹងដ៏ខេត្តដ៏ទៃ ដោយសារតែនៅតាមខេត្តផ្សេងៗ គេមានទំនុបសម្រាប់ទប់ទឹកពន្យាការហូរទឹកចូលទន្លេសាប តែសម្រាប់ស្ទឹងនៅក្នុងខេត្តកំពង់ធំ គឺពុំមានការទប់ទឹកទាល់តែសោះ ដូច្នេះការចរចណ៍ទឹកហូរចូលបឹងទន្លេសាបលឿនណាស់បង្ករឲ្យមានការខ្វះខាតទឹក ដូចជាឆ្នាំនេះទឹកតូចជាងឆ្នាំមុន ឆ្នាំមុនទឹកទន្លេធំជាងឆ្នាំនេះ នៅក្នុងឃុំកំពង់គោទឹកស្រក អាចដើរឆ្លងកាត់បាន លោកបានបញ្ជាក់ថា ដោយទទួលបានព្យាករណ៍ក្រសួង ធនធានទឹកឧតុនិយម ឲ្យយើងមានការប្រុងប្រយ័ត្នចំពោះការខ្វះខាតទឹក សូម្បីតែការធ្វើស្រែប្រាំងលើកទី មួយទឹកស្ទើរតែពុំគ្រប់គ្រាន់ទៅហើយនៅចុងរដូវហ្នឹង អញ្ចឹងយោងតាមសារាចរណ៍ណែនាំរបស់រាជរដ្ឋាភិបាល គឺហាមឃាត់ដាច់ខាត ចំពោះអ្នកដែលធ្វើស្រែប្រាំងលើកទី២ដែលបង្ករឲ្យមានការខ្វះខាតទឹកជាមិនខាន ចំណែកទឹកដែលនៅសល់បន្តិចបន្តួចគ្រាន់តែជាសម្រាប់ប្រើប្រាស់ក្នុងជីវភាគ គោ ក្របី ជូក មាន់ ទាប្រចាំថ្ងៃ តែប៉ុណ្ណោះ។ដោយ ប៊ុន រដ្ឋា
