ខេត្តបៃលិន៖ នៅព្រឹកថ្ងៃទី៨ ខែមករា ឆ្នាំ២០១៦ លោកឧត្តមសេនីយ៍ត្រី ជា ចាន់ឌិន ស្នងការដ្ឋាននគរបាលខេត្តប៉ៃលិន បានធ្វើសន្និសិទកាសែត ពាកព័ន្ធរឿង ក្រុមចោរប្លន់ប្រដាប់អាវុធ ផ្ទះវិង យីហោ ហេង រចនា ស្ថិតក្នុងភូមិប៉ាងរលឹម សង្កាត់អូរតាវ៉ៅ ក្រុងប៉ៃលិន ខេត្តប៉ៃលិនកាលពីថ្ងៃ២១ ខែមករា ឆ្នាំ២០១៦ កន្លងទៅ លោកបានបញ្ជាក់ថា៖ ក្នុងការរុករកស្រាវជ្រាវតាមចាប់ ក្រុមចោរប្លន់ប្រដាប់អាវុធ ដោយប្រើរយៈពេលអស់ចំនួន ១៥ យប់ និង១៦ ថ្ងៃ ទើបធ្វើការបោសសំអាតបានទាំងស្រុង។ លោកបន្តថា សកម្មភាពនេះបានសម្រេចដោយជោគជ័យកាលពីថ្ងៃទី០២ ខែកុម្ភៈ ឆ្នាំ២០១៦ វេលាម៉ោង ០៩:២០ នាទីព្រឹក ដោយមានកិច្ចសហប្រតិបត្តិការពីកម្លាំងនគរបាលនាយកដ្ឋានព្រហ្មទណ្ឌរបស់ក្រសួងមហាផ្ទៃ ឈានទៅរកចាប់ខ្លួនជនសង្ស័យចំនួនបាន ០២នាក់ នៅចំណុចច្រមុះជ្រូកការ៉ាសសាំងសូគីមិចក្បាលថ្នល់ ទីមួយឈ្មោះ ហ៊ត វិសិទ្ធ ហៅ ចិន រឺអូន ភេទប្រុស អាយុ ២៧ឆ្នាំ មុខរបរមិនពិតប្រាកដ (ដៃដល់កាន់ពូថៅ) និងទីពីរឈ្មោះ ហង់ ហំ ហៅ សេង ដា ភេទប្រុស អាយុ ៣៥ឆ្នាំ មុខរបរមិនពិតប្រាកដ (មេក្លោង) រួចនាំខ្លួនមកកាន់នាយកដ្ឋានព្រហ្មទណ្ឌក្រសួងមហាផ្ទៃ ដើម្បីសាកសួរបឋម។ លោកបន្តទៀតថា៖ លុះមកដល់ថ្ងៃទី០៣ ខែកុម្ភៈ ឆ្នាំ២០១៦ នគរបាលខេត្តប៉ៃលិន បាននាំខ្លួនជនសង្ស័យមកកាន់ស្នងការដ្ឋាននគរបាលខេត្ត ដើម្បីសាកសួរបំភ្លឺពីរឿងហេតុដែលកើតឡើងក្រោយមកជនសង្ស័យទាំងពីរនាក់ខាងលើបានសារភាពពីសកម្មភាពប្លន់ពិតប្រាកដមែន និងចង្អុលបង្ហាញដល់បក្សពួកម្នាក់ទៀត ដែលមានឈ្មោះ ហុង ប៊ុនហេង ហៅ ប៊ូកគី ភេទប្រុស អាយុ ៣៦ឆ្នាំ មុខរបរមិនពិតប្រាកដ (ដៃដល់កាន់អាវុធ) បានរត់គេចខ្លួនទៅរស់នៅក្នុងស្រុកបាទី ខេត្តតាកែវ។ភ្លាមៗនោះសមត្ថកិច្ចជំនាញខេត្តប៉ៃលិនបានរាយការណ៍ជូនលោកស្នងការនគរបាលខេត្តប៉ៃលិន និងសុំដីការបញ្ជាអោយចូលខ្លួនពីលោកព្រះរាជអាជ្ញាខេត្តប៉ៃលិនក្រោយមកសមត្ថកិច្ចជំនាញបានរាយការណ៍ជូនទៅនាយកដ្ឋានព្រហ្មទណ្ឌរបស់ក្រសួងមហាផ្ទៃ និងស្នងការនគរបាលខេត្តតាកែវ ដើម្បីសុំកិច្ចសហប្រតិបត្តិការទៅនាំខ្លួនជនសង្ស័យម្នាក់ទៀត ឈ្មោះ ហុង ប៊ុន ហេង ហៅ ប៊ូកគី កាលពីថ្ងៃទី០៥ ខែកុម្ភៈ ឆ្នាំ២០១៦ នាំខ្លួនមកកាន់ស្នងការដ្ឋាននគរបាលខេត្តប៉ៃលិនដើម្បីសាកសួរបំភ្លឺបន្ថែម។ លុះមកដល់ថ្ងៃទី០៧ ខែកុម្ភៈ ឆ្នាំ២០១៦ កម្លាំងជំនាញនៃស្នងការដ្ឋាននគរបាលខេត្តប៉ៃលិនបានសហការជាមួយកម្លាំងនគរបាលនាយកដ្ឋានព្រហ្មទណ្ឌរបស់ក្រសួងមហាផ្ទៃម្តងទៀត ដើម្បីធ្វើការឃាត់ខ្លួនជនសង្ស័យម្នាក់ទៀត ឈ្មោះ សន លីដនធីតា ភេទស្រី អាយុ ២៦ឆ្នាំ ជាប្រពន្ធរបស់ជនដៃដល់ឈ្មោះ ហ៊ត វិសិទ្ធ ហៅអូន រឺចិន ដើម្បីតាមរុករកនិងដកហូតបានអាវុធ AK កាត់ស្វ័យនិងកាត់កាណុងចំនួន ០១ដើម។ បច្ចុប្បន្នសមត្ថកិច្ចជំនាញកំពុងក៏សាងសុំណុំរឿងនិងបញ្ជូនជនសង្ស័យទាំង 04នាក់ខាងលើទៅតុលាការដើម្បីចាត់ការបន្តតាមនិតិវិធីច្បាប់។ជាលទ្ធផលកម្លាំងជំនាញបានដកហូតវត្ថុតាងរួមមានៈ- អាវុធ AK កាត់ស្វ័យនិងកាត់កាណុងចំនួន០១ដើម
– រថយន្ត Lexus RX300 ពណ៍ខ្មៅ ពាក់ស្លាកលេខ ភ្នំពេញ 2L-6481 ចំនួន ០១គ្រឿង
– ម៉ូតូម៉ាក់ Wave S ពណ៍ក្រហមខ្មៅ ពាក់ស្លាកលេខ បាត់ដំបង 1K-3640 ចំនួន ០១គ្រឿង
– ពូថៅដៃចំនួន ០១ ៕
