បន្ទាយមានជ័យ ៖ ប្រជាពលរដ្ឋមួយគ្រួសារ ដែលរងគ្រោះដោយសារភ្លើងព្រៃរាលដាលឆេះផ្ទះមួយកាលពីថ្ងៃទី៧ កុម្ភះ ២០១៦ នៅភូមសន្តិភាព ឃុំទួលពង្រ ស្រុកម៉ាឡៃ ខេត្តបន្ទាយមានជ័យ ទទួលបានអំណោយពីលោកឧបនាយរដ្ឋមន្ត្រី កែ គឹមយ៉ាន តាមរយៈលោក អាត់ ខែម ស្នងការនគរបាលខេត្តនៅសំភារៈឧបភោគ និងសង់ផ្ទះថ្មីជូន ។
លោក អៀម រីម អធិការនគរបាលស្រុកម៉ាឡៃ បានអោយដឹងថា អំណោយដែលលោកស្នងការនាំយកប្រគលអោយធ្វើឡើងកាលពីម្សិលមិញ រួមមាន អង្ករ តង់ កន្ទេល ចានឆ្នាំ ទឹកស៊ីអ៊ីវ ទឹកសុទ្ធ និងថវិការមួយចំនួន និងអ្វីដែលសំខាន់នោះ លោក ឧបនាយករដ្ឋមន្ត្រី កែ គឹមយ៉ាន ប្រធានក្រុមការងារថ្នាក់ជាតិចុះជួយខេត្តបន្ទាយមានជ័យ បានសន្យាសាងសង់ផ្ទះទំហំទទឹង៤ម៉ែត្រ បណ្តោយ៥ម៉ែត្រ ធ្វើអំពីឈើប្រក់ស័ង្កសី នៅពេលដែលពួកគាត់រកទីតាំងជាក់លាក់ដើម្បីសាងសង់ ។
លោកបន្តទៀតថា ផ្ទះដែលត្រូវភ្លើងឆេះ និងទទួលបានអំណោយ ជារបស់ឈ្មោះ ហ៊ុន សុផាន់ អាយុ៦៨ឆ្នាំ មានកូន៣នាក់ ត្រូវបានអគ្គីភ័យដែលរាលដាលពីភ្លើងព្រៃឆាបឆេះអស់ទាំងស្រុង រួមមាន ថវិការជាប្រាក់បាតជាង២ពាន់បាត សៀវភៅគ្រួសារមួយច្បាប់ អត្រានុគោរដ្ឋាន៣ច្បាប់ និងសំភារៈផ្ទះបាយជាច្រើន ។
ឆ្លើយតប និងការជួយគ្រោះយ៉ាងយកចិត្តទុកដាក់ពីសំណាក់ថ្នាក់ដឹកនាំរហូតដល់ស្នងការ មេវរៈ និងអធិការនេះដែរ លោកតា ហ៊ុន សុផាន់ មានចិត្តរំភើបរីករាយនូវទង្វើរដ៏ល្អប្រពៃពីសំណាក់មន្ត្រីរាជការ មកលើប្រជាពលរដ្ឋដូចជារូបលោក ។
គួរបញ្ចាក់ជាបន្តបន្ទាប់ លោក អាត់ ខែម ស្នងការនគរបាលខេត្តបន្ទាយមានជ័យ តែងនាំយកអំណោយពីសំណាក់លោកឧបនាយករដ្ឋមន្ត្រី កែ គឹមយ៉ាន ចុះចែកជូនដោយផ្ទាល់ដល់ប្រជាពលរដ្ឋទីទល់ក្រ និងបានឆ្លើយតបទៅតាមសំណូមពររបស់ប្រជាពលរដ្ឋ នូវអ្វីដែលពួកគាត់ចងបាន ពីលើកិច្ចការងារស្នូលរបស់លោកដឹកនាំនគរបាលទូទាំងខេត្ត ការពារនូវសន្តិសុខសណ្តាប់ធ្នាប់ និងការជឿទុកចិត្តពីសំណាក់ប្រជាពលរដ្ឋ ៕
