បន្ទាយមានជ័យ ៖ ក្មេងទំនើង២នាក់ត្រូវបានប៉ូលីសឃាត់ខ្លួនសង្ស័យកាប់គ្នា បន្ទាប់ពីបើកម៉ូតូដួលចេញដាវស៊ាំរ៉ៃ កាលពីព្រលប់ម៉ោង៧ ថ្ងៃទី០៨ ត្រង់ចំនុចគោលដៅប្រចាំបញ្ជារបស់នគរបាលនៃផ្លូវចូលផ្សារាត្រី ស្ថិតក្នុងភូមិ៣ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ ។
លោក ឃួន វណ្ណា នាយការិយាល័យប្រឆាំងភេវកម្ម នៃស្នងការនគរបាលខេត្តបន្ទាយមានជ័យដែលទទួលប្រចាំបញ្ជាការពារគោលដៅ មុខផ្លូវចូលផ្សារាត្រីធីអឹម ទៅតាមផែនការរបស់លោកឧត្តសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ ដើម្បីបង្កា បង្ក្រាប ការពារសន្តិសុខជូនប្រជាពលរដ្ឋ បានអោយដឹងថា ក្រោយពីទទួលបានព័ត៍មានថា មានក្មេងទំនើងដួលម៉ូតូចេញដាវស៊ាំរ៉ៃ សង្ស័យថា រត់ចេញពីជម្លោះកាប់ចាក់គ្នា ទើបកម្លាំងរបស់លោកបានឃាត់ខ្លួន ក្មេងជំទង់២នាក់ក្នុងចំណោម៣នាក់ ដែលជិះ ម៉ូតូគេចខ្លួនបាត់ មានរបួសដៃជើងនិងខ្លួន ជាមួយនិងដាវស៊ាំរ៉ៃមួយដើម ។ ក្រោយឃាត់ខ្លួនក៏បានប្រគល់អោយទៅប៉ុស្តិ៍នគរបាលរដ្ឋបាលព្រះពន្លាធ្វើការទៅតាមនីតិវិធីបន្ត ។
លោក សុខ ថៃ នាយប៉ុស្តិ៍នគរបាលរដ្ឋបាលព្រះពន្លាបានអោយដឹងដែរថា យុវជនទាំង២នាក់មានឈ្មោះ ចន រាជ្យ ភេទប្រុស អាយុ១៦ឆ្នាំ និងឈ្មោះ សាធ ធិឡាង ភេទប្រុស អាយុ១៦ឆ្នាំ ក្មេងទាំងនាក់មានទីលំនៅភូមិ-សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ បានរៀបរាប់នៅចំពោះមុខសមត្ថកិច្ចថា ពួកខ្លួនមិនបានដេញកាប់គ្នានោះទេ មូលហេតុដែលខ្លួនមានរបួសនេះដោយសារតែភ័យក្លាច នឹងក្រុមក្មេងមួយក្រុមទៀតជិះម៉ូតូច្រើនគ្រឿង ដេញពួកខ្លួន ទើបពួកខ្លួនបើកម៉ូតូរត់គេចតែក៏ត្រូវដួលតែម្តង ។ ចំណែកដាវគឺពួកខ្លួនទុកសម្រាប់ការពារខ្លួនប៉ុណ្ណោះ ។
លោកបន្តទៀតថា ក្មេងទាំងនាក់នេះនឹងធ្វើការអប់រំ និងកោះហៅអាណាព្យាបាលមកធានាយកទៅផ្ទះវិញ ព្រោះពួកគេថ្វីត្បិតតែមានដាវមែនតែមិនទាន់បានបង្ករបញ្ហាអ្វីឡើយ ៕