ខេត្តកណ្តាល : យោងតាមការអោយដឹងពីមន្ត្រី តុលាការ ខេត្ត កណ្ដាល សុំ មិន បញ្ចេញ ឈ្មោះ បាន ប្រាប់ថា ៈ តុលាការនឹង ធ្វើ ការ ប្រកាស សាលក្រម សំណុំរឿង លោក អាំង មាលតី អតីត ប្រធាន សាលា ដំបូង រាជធានី ភ្នំពេញ នៅ រសៀល ម៉ោង ១៥ ថ្ងៃទី ១២ ខែ កុម្ភៈ ឆ្នាំ ២០១៦ ។ កាល ពី ពេល កន្លង ទៅ ពោលគឺព្រេកថ្ងៃទី២៨ ខែ មករា ឆ្នាំ ២០១៦ ក្នុងសវនាការ លោក អាំង មាលតី បាន និយាយ ថា លោកទទួលស្គាល់ថា លោក ពិត ជា បាន ប្រព្រឹត្ត ដូច ការ ចោទប្រកាន់ មែន ដែល កំហុស ទាំង នេះ កើត ចេញ ពី ការ ធ្វេសប្រហែស របស់ លោក រីឯរថយន្តម៉ាកអូឌីនោះ លោកមិនបានយកមកប្រើប្រាស់ផ្ទាល់ខ្លួននោះទេ គឺប្រើប្រាស់សំរាប់អង្គភាពទាំងមូល ហើយលោក អាំង មាលតី ក៏បាន ស្នើ រឲ្យ តុលាការ ប្តូរ បទ ចោទ ប្រកាន់ និង បន្ធូរបន្ថយ ទោសផងដែរ ពោល គឺប្ដូរពីបទ ឧក្រិដ្ឋ មាត្រាទី ៦០១ មក បទមជ្ឈឹមវិញមាត្រា ៥៩៧ និងមាត្រា ៥៩៨ វិញ ។
គួររម្លឹកថា ៈ លោក អាំង មាលតី ជាប់ ចោទ ពី បទបទបំផ្លាញ ដោយ ចេតនា និង គៃបំបាត់ ដោយ ទុច្ចរិត ពាក់ព័ន្ធ ការ ដោះលែង មេខ្លោង ជួញដូរ គ្រឿងញៀន ឈ្មោះ ថាវ ថា វី ជា ថ្នូរ នឹង រថយន្ត ម៉ាក អូ ឌី មួយ គ្រឿង តម្លៃ ជិត ១០ ម៉ឺន ដុល្លារ ។ បទល្មើស នេះ កំណត់ ការ ផ្ដន្ទាទោស ពី ៥ ឆ្នាំទៅ ១០ ឆ្នាំ ។ លោក អាំង មាលតី ត្រូវបានអង្គភាពប្រឆាំងអំពើពុករលួយបញ្ជូនទៅកាន់តុលាការខេត្តកណ្តាលនៅម៉ោង ១៖៥០ នាទីរសៀលថ្ងៃទី១៦ ខែសីហា ឆ្នាំ២០១៥។ លោក អាំង មាលតី អតីតប្រធានសាលាដំបូងរាជធានីភ្នំពេញ ត្រូវបានអង្គភាពប្រឆាំងអំពើពុករលួយ ឃាត់ខ្លួន កាលពីថ្ងៃត្រង់ ថ្ងៃសុក្រ ទី១៤ ខែសីហា ឆ្នាំ២០១៥ ពាក់ព័ន្ធនឹងការប្រព្រឹត្តអំពើពុករលួយ ដោះលែងជនជាប់ ចោទក្នុងសំណុំរឿងគ្រឿងញៀន ឈ្មោះ ថៅ ថាវី នៅក្រៅឃុំបណ្តោះអាសន្ន ជាមួយថ្នូររថយន្ត Audi មួយគ្រឿង។ លោកទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយ ធ្លាប់បានឱ្យដឹងថា ក្រោយពីសាកសួរ អង្គភាពប្រឆាំងអំពើពុករលួយ បានរកឃើញថា លោក អាំង មាលតី មានភាពគ្រប់គ្រាន់សម្រាប់ឱ្យ ACU ចោទ ប្រកាន់ពីបទ វីតិក្រម ដែលជាបទល្មើសពុករលួយមួយដែរ។ 
លោក ឱម យ៉ិនទៀង បានថ្លែងយ៉ាងដូច្នេះថា «វីតិក្រមនេះ ពាក់ព័ន្ធជាមួយនឹងឡាន Audi មួយគ្រឿងរបស់ឈ្មោះ ថៅ ថាវី គឺថៅ ថាវី ហ្នឹងគេចោទថា រឿងគ្រឿងញៀន ប៉ុន្តែមិនមែនទេណា ហើយថ្ងៃ៨ ខែសីហាកន្លងមកតុលាការ បានកាត់ក្តីរឿង ថៅ ថាវី ហើយប្រគល់ឡានឱ្យវិញហើយ ដែលឡានមួយនេះ ត្រូវបានលោក អាំង មាលតី គាត់ យកពី ថៅ ថាវី ជាថ្នូនឹងការដោះលែងបណ្តោះអាសន្នដល់លោក ថៅ ថាវី» ។ សូមជំរាបថា លោក អាំង មាលតី អតីតប្រធានសាលាដំបូងរាជធានីភ្នំពេញ ត្រូវបានដកចេញពីតំណែង កាលពីខែ កុម្ភៈ ឆ្នាំ២០១៥ បន្ទាប់ពីមានសំណុំរឿង មិនប្រក្រតី ជាច្រើនបានកើតមានឡើង នៅក្នុងសាលាដំបូងរាជធានីភ្នំពេញ ក្រោមការគ្រប់គ្រងរបស់លោក៕
