បន្ទាយមានជ័យ ៖ បន្ទាប់ពីការលេចលឺក្នុងការដោះដូរ រហូតដល់មានសេចក្តីសម្រេចរបស់ ទីស្តីការគណៈរដ្ឋមន្ត្រីក្រសួងមហាផ្ទៃក្នុងការដោះដូរចំណតរថយន្តក្រុងសិរីសោភ័ណ ដែលស្ថិតនៅចំកណ្តាលក្រុងសិរីសោភ័ណ ក្នុងភូមិ៣ សង្កាត់ព្រះពន្លា ក្រុងសិរីសោភ័ណ ខេត្តបន្ទាយ
មានជ័យ ដើម្បីដាក់លើទីតាំងថ្មីស្ថិតនៅជាយស្រុកមង្គលបូរីលើផ្ទៃដី២ម៉ឺនម៉ែត្រការ៉េ នៅព្រឹកថ្ងៃទី១៦ កុម្ភះ ២០១៦ នេះអាជ្ញាធរខេត្តបន្ទាយមានជ័យ ដែលមានលោក លី សារី ជាអភិបាលរងខេត្ត ព្រមទាំងមានតំណាងរបស់ក្រសួងមហាផ្ទៃចំនួន២នាក់ និងក្រសួងសេដ្ឋកិច្ចហិរញ្ញវត្ថុផងនោះ ត្រូវបានធ្វើការប្រជុំវាយតំលៃចំពោះការដោះដូរទីតាំងចំណតរថយន្តនេះ ។
ការប្រជុំ និងវាយតំលៃនេះធ្វើឡើងទៅតាមការគ្រោងទុករបស់អាជ្ញាធរខេត្តបន្ទាយមានជ័យ ដែលបានចេញលិខិតអញ្ចើញទៅដល់តំណាងក្រសួងមហាផ្ទៃ ក្រសួងសេដ្ឋកិច្ចហិរញ្ញវត្ថុ និងតំណាងក្រុមហ៊ុន មនោរតនៈ ដែលជាក្រុមហ៊ុនក្នុងការវិនិយោគចំណតរថយន្តក្រុងសិរីសោភ័ណនេះ និងអាជ្ញាធរសមត្ថកិច្ចពាក់ព័ន្ធនៃខេត្តបន្ទាយមានជ័យ ផងដែរ ។
សូមបញ្ចាក់ថា ចំណតរថយន្តក្រុងសិរីសោភ័ណដែលមានផ្ទៃដីចំនួណ៧២០០ម៉ែត្រការ៉េ ស្ថិតនៅចំកណ្តាលក្រុងសិរីសោភ័ណ ដែលបច្ចុប្បន្នចំណតរថយន្តនេះពោពេញទៅដោយរថយន្តចតត្រៀបត្រា និងមានសោភ័ណភាព និងមានតម្លៃដីខ្ពស់ក្នុងមួយល្វែង៤x២០ម៉ែត្រតម្លៃប្រមាណជាជាង១០ម៉ឺនដុល្លា ។
បន្ទាប់ពីមានលេចលឺ ក៏ដូចជាមានការសម្រេចនេះ ប្រជាពលរដ្ឋដែលរស់ជុំវិញចំណតរថយន្តរាប់ពាន់គ្រួសារបានធ្វើការផ្តិតមេដៃតវ៉ា សុំអោយអាជ្ញាធរបញ្ឈប់ការដោះដូរដើម្បីជាប្រយោជន៍ដល់ពួកគាត់រស់ប្រកបរបរកស៊ី និងដើម្បីរក្សាមរតកដែលបន្សល់ពីសម័យសង្គមរាស្ត្រនិយមក្នុងខេត្តបន្ទាយមានជ័យ ។
ជាមួយការតវ៉ាជាបន្តបន្ទាប់នោះក៏មានលោកឧកញ៉ា ហង្ស ស៊ីផា ដែលរងការចោទប្រកាន់ពីប្រជាពលរដ្ឋថា ក្រុមហ៊ុនរបស់លោក ជាអ្នកឃុបឃឹតជាមួយអាជ្ញាធរក្នុងការដោះដូរចំណតរថយន្ត បានចេញមុចធ្វើការបកស្រាយនៅនឹងចំណតរថយន្តថា រូបលោកពុំមានពាក់ព័ន្ធ ជាមួយនិងអាជ្ញធរខេត្តក្នុងការដោះដូរចំណតរថយន្តនោះទេ គឺឈ្មោះក្រុមហ៊ុននោះ និងឈ្មោះក្រុមហ៊ុនកូនរបស់គាត់ស្រដៀងគ្នា ហើយការពិតអ្វីៗទាំងអស់គឺលោកពុំដឹងទេ ហើយការរៀបចំនេះជាការរៀបចំរបស់អាជ្ញាធរខេត្តទៅថ្នាក់លើ ។ ការចេញមុខបកស្រាយលោកក៏បានធ្វើការបដិសេធហើយនិងធ្វើការចូលរួមជាមួយនិងប្រជាពលរដ្ឋក្នុងការតវ៉ាមិនអោយមានការដោះដូរនេះផងដែរ ព្រោះថាលំនៅដ្ឋានរបស់លោកក៏នៅជាប់និចំណតរថយន្តក្រុងនេះដែរ ។
ពលរដ្ឋបានធ្វើការរិះគន់ទៅលើការដឡដូរនេះដោយសារតែ ដើយសារតែបើមានការដោះដូរពិតមែននោះ គឺទីតាំងថ្មីស្ថិតនៅលើវាលស្រែមិនមែនទីប្រជុំ និងមានចម្ងាយឆ្ងាយពីទីរួមក្រុង និងត្រូវចំណាយថវិការច្រើនក្នុងការធ្វើដំណើរទៅចំណតរថយន្ត និងស្ថិតក្នុងភាពអសន្តិសុខដោយសារទីតាំងនោះស្ងាត់ជ្រងំ ។
ជាមួយគ្នានេះលោក លី សារី អភិបាលរងខេត្តបន្ទាយមានជ័យ បានអោយអ្នកសារព័ត៍មានដឹងថា កិច្ចប្រជុំនេះមិនមែនជាកិច្ចប្រជុំវាយតម្លៃអ្វីនោះទេ គ្រាន់តែជាការប្រជុំនិយាយគ្នាអោយយល់ពីការងារដោះដូរចំណតរថយន្តចាស់ទៅទីតាំងថ្មី ហើយចំពោះឯកសារដោះដូរទាំងនេះ គឺជាឯកសារផ្លូវការហើយ តែយើងត្រូវរៀបចំសមាសភាពដែលមានការពាក់ព័ន្ធ ធ្វើការទៅតាមនីតិវិធី និងគោលការណ៍របស់រដ្ឋ ហើយការដោះដូរនេះយើងធ្វើនឹងបន្តធ្វើយ៉ាងណាអោយបានជោគជ័យ ៕
