ខេត្តកំពង់ឆ្នាំង៖ លោកជំទាវ កែ ច័ន្ទមុនី អនុប្រធានកិត្តិយសគណៈកម្មាធិការសាខាកាកបាទក្រហមខេត្តកំពង់ឆ្នាំងបានមានប្រសាសន៍ថា៖ សូមសំដែងនូវការកោតសរសើរចំពោះការចូលរួមពីបងប្អូនស្ត្រីទាំងអស់បានបំពេញកាតព្វកិច្ចជាម្តាយចិញ្ចឹមកូន និងបានសំរាលកូន នៅក្នុងមណ្ឌលសុខភាពដោយមានការយល់ដឹងច្រើនជាងមុន។លោកជំទាវបានមានប្រសាសន៍បែបនេះ នៅក្នុងពិធីប្រារពទិវាជាតិពិភពលោកសុខភាពមាតាទារកនិងកុមារ នៅព្រឹកថៃ្ងទី១៨ ខែកុម្ភះ ឆ្នាំ២០១៦ នៅឃុំប្រឡាយមាស ស្រុកកំពង់លែង ដោយមានការចូលរួមពី ឯកឧត្តម អ៊ុន សំអុល ប្រធានគណៈកម្មាធិការសាខាកាកបាទក្រហមខេត្ត ឯកឧត្តម លោកជំទាវសមាជិកសាខា អាជ្ញាធរដែនដី និងស្ត្រីទើបឆ្លងទន្លេ និងស្ត្រីមានកូនតូចសរុបចំនួន៤៥នាក់។
លោកជំទាវ កែ ច័ន្ទមុនី បានមានប្រសាសន៍ពាំនាំប្រសាសន៍ផ្តាំផ្ញើសាកសួរសុខទុក្ខពី សំណាក់សម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ប្រធានកាកបាទក្រហមកម្ពុជា ដែលសម្តេចតែងតែនឹករលឹកដល់ប្រជាពលរដ្ឋទាំងអស់ ដោយមិនប្រកាន់ពូជសាសន៍និងនិន្នាការនយោបាយឡើយ។ លោកជំទាវបានផ្តាំផ្ញើដល់ស្ត្រីដែលមានផ្ទៃពោះទាំងអស់ ត្រូវមកពិនិត្យផ្ទៃពោះអោយបានទៀងទាត់យ៉ាងតិចចំនួន៤ដងនៅក្នុងមណ្ឌលសុខភាព សូមប្រើសេវាពន្យាកំណើតចំពោះស្ត្រីដែលមានកូនច្រើន ចំណែកអ្នកដែលមានកូនតូចត្រូវនាំកូនមកចាក់ថ្នាំបង្ការអោយបានទៀងទាន់តាមការកំណត់របស់លោកគ្រូពេទ្យ និងសូមមាតាទាំងអស់បំប៉ៅកូនដោយទឹកដោះម្តាយ ធ្វើយ៉ាងណាអោយបាន៦ខែ ហើយផុតពី៦ខែទៅត្រូវបំប៉នអាហារអោយបានគ្រប់គ្រាន់ទើបកុមារមានការធំធាត់ និងវៃឆ្លាតបានល្អ។
ឯកឧត្តម អ៊ុន សំអុល ប្រធានគណៈកម្មាធិការសាខាកាកបាទក្រហមខេត្តកំពង់ឆ្នាំងក៏បានមានប្រ សាសន៍លើកឡើង នូវស្នាដៃជាច្រើនដែលសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ប្រធានកាកបាទក្រ ហមកម្ពុជាទទួលបាននូវគោរម្យងារ ជាឥស្សរជនឆ្នើមថ្នាក់ជាតិនៃផែនការសកម្មភាពរួមរបស់ អគ្គលេខាធិការអង្គការសហប្រជាជាតិ ដើម្បីសុខភាពស្ត្រីនិងកុមារ និងជាឥស្សរជនឆ្នើមថ្នាក់ជាតិនៃវេទិកាភាពជាអ្នកដឹកនាំប្រចាំតំបន់អាស៊ីប៉ាស៊ីហ្វិក ចំពោះការឆ្លើយតបមេរោគអេជស៍និងជំងឺអេជស៍នៅកម្ពុជា ក្រៅពីគោរម្យងារសម្តេចនូវបានបំពេញតួនាទីយ៉ាងសំខាន់ ជួយសំរាលទុក្ខលំបាករបស់ប្រជាពលរដ្ឋរងគ្រោះនៅគ្រប់ទីកន្លែង នៅទូទាំងប្រទេសថែមទៀតផង។
លោក ប្រាក់ សោភណ្ឌ នាយកប្រតិបត្តិសាខាកាកបាទក្រហមខេត្តកំពង់ឆ្នាំងបានអោយដឹងថា៖ នៅក្នុងទិវាជាតិពិភពលោកសុខភាព មាតាទារក និងកុមារ នៅក្នុងថៃ្ងនេះសាខាកាកបាទក្រហមខេត្តកំពង់ឆ្នាំង
បានផ្តល់អំណោយជូនស្ត្រីទើបឆ្លងទន្លេ និងស្ត្រីមានកូនតូចចំនួន៥៤នាក់ ដែលក្នុងម្នាក់ៗទទួលបានទឹកដោះគោឆៅ៦កំប៉ុង ,ស្ករស០,៥គីឡូក្រាម ,សារុង១ ,ក្រម៉ា១ ,កន្សែងពោះគោ១ ,ស្រោមជើងនិងស្រោមដៃ២សម្រាប់ ,សាប៊ូទឹកសម្រាប់សំអាតខ្លួនក្មេង១ដប និងថវិកា១ម៉ឺនរៀលផងដែរ៕