ខេត្តសៀមរាបនៅព្រឹកថ្ងៃទី១៨ខែកុម្ភះឆ្នាំ២០១៦លោកបណ្ឌិតឃឹម ប៊ុនសុងអភិបាលនៃគណៈអភិបាលខេត្តសៀមរាបបានអនុញ្ញាតឲ្យWilliamA.Heidt ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជានិងសហការីចូលជួបសម្តែងការគួសម នៅការិយាល័យផ្ទាល់របស់ឯកឧត្តមបណ្ឌិត នៅរដ្ឋបាលសាលាខេត្តសៀមរាប ។
ក្នុងកិច្ចស្វាគមន៍នោះលោកបណ្ឌិត ឃឹម ប៊ុនសុង ក៏បានជម្រាបដល់ឯកអគ្គរដ្ឋទូត អំពីស្ថានភាពភូមិសាស្ត្រ សន្តិសុខ សុវត្ថិភាព សេដ្ឋកិច្ច និង ជីវភាពរស់នៅរបស់ប្រជាជនខេត្តសៀមរាប ដោយបានពឹងផ្អែកលើវិស័យកសិកម្មនិងទេសចរណ៍។លោកបណ្ឌិតក៏បានលើកផងដែរ អំពីសក្តានុពលរបស់ខេត្តនិងបញ្ជាក់ពីហេដ្ឋរចនាសម្ព័ន្ធលើវិស័យទេសចរណ៍ការអភិវឌ្ឍន៍និង កែលម្អរសោភណ្ឌភាពក្រុងទៀតផង។លោកបណ្ឌិតអភិបាលខេត្តក៏បានលើកផងដែរ អំពីកំណើនភ្ញៀវទេសចរណ៍ពីមួយឆ្នាំទៅមួយឆ្នាំ និង ជនជាតិបរទេសដែលបានចូលមក វិនិយោគ ធ្វើ អាជីវកម្ម នៅក្នុងខេត្តសៀមរាប មានចំនួន៤៦សញ្ជាតិ ដែលមានចំនួន១ពាន់២១៤នាក់ ក្នុងនោះជនជាតិអាមេរិក មានចំនួន ៦៥នាក់ ដែលបានកំពុងប្រកបរបរអាជីវកម្ម ហើយបានធ្វើការចុះបញ្ជីការងារ នៅមន្ទីរការងារ និង បណ្តុះ បណ្តាវិជ្ជាជីវៈខេត្ត បាន០៧នាក់ ស្រី០៤នាក់ ។
លោកបណ្ឌិត ឃឹម ប៊ុនសុង ក៏បានលើកឡើងពី ការងារកិច្ចសហប្រតិបត្តិការរវាងខេត្តសៀមរាប និង ទីក្រុងអូស្ទីន រដ្ឋតិចសាសន៍ នៃសហរដ្ឋអាមេរិក ដែលបានធ្វើការចុះហត្ថលេខា លើលិខិតផ្តួចផ្តើម បង្កើតចំណងមិត្តភាពជាមួយគ្នា នៅឆ្នាំ២០១២ ដោយផ្តោសំខាន់លើ វិស័យទេសចរណ៍, វប្បធម៌ កសិកម្ម , ពាណិជ្ជកម្ម , វិនិយោគ , សង្គមកិច្ច , អប់រំ និង សុខាភិបាល ដោយនៅមិនទាន់បានចុះហត្ថលេខាលើអនុស្សរណៈនៃការយោគយល់រវាងគ្នានៅឡើយ ។ ក្នុងនោះឯកឧត្តមបណ្ឌិតក៏សុំឲ្យឯកអគ្គរដ្ឋទូតជួយជម្រុញនិង សម្របសម្រួលនៃកិច្ចសហប្រតិបត្តិការរវាងទីក្រុង អូស្ទីន រដ្ឋតិចសាសន៍ និង ខេត្តសៀមរាប ដើម្បីឲ្យមានកិច្ចដំណើរ ការឡើង ។ 
ក្នុងនោះដែរលោកបណ្ឌិត ឃឹម ប៊ុនសុងក៏បានបញ្ជាក់ផងដែរអំពីកត្តាសន្តិសុខសណ្តាប់ធ្នាប់សុវត្ថិ-ភាពនិងអនាម័យ បរិស្ថានរបស់ខេត្តសៀមរាប ត្រូវបានខេត្តយកចិត្តទុកដាក់ខ្ពស់ចំពោះសន្តិសុខសុវត្ថិភាពចំពោះភ្ញៀវទេសចរណ៍និង គណៈប្រតិភូជាន់ខ្ពស់ជាតិអន្តរជាតិផងដែរ។លោកបណ្ឌិតបានបញ្ជាក់ថាបច្ចុប្បន្ននេះ យើងបានបើកទូលាយដល់ភ្ញៀវទេសចរណ៍ឲ្យមានប្រាស្រ័យទាក់ទង ស្និតស្នាលផ្សាភ្ជាប់ជាមួយប្រជាពលរដ្ឋនៅតាមមូលដ្ឋាននិងបរិស្ថានធម្មជាតិទៀតផង។ ម្យ៉ាងទៀតការអភិវឌ្ឍន៍របស់ខេត្តក្នុងការបម្រើសេវាកម្មទេសចរ នោះគឺនៅពុំទាន់បានឆ្លើយតបទៅនឹងតម្រូវការរបស់ភ្ញៀវនៅឡើយនៅក្នុងក្រុងសៀមរាបហើយក្រសួងទេសចរណ៍ក៏បានធ្វើការពង្រីកនូវតំបន់អេកូទេសចរផ្សេងៗទៀត ។ក្នុងនោះដែរឯកឧត្តមបណ្ឌិតក៏បានគាំទ្រនូវដំណើរទស្សនៈ កិច្ចសិក្សាស្វែងយល់របស់គណៈប្រតិភូ ក្នុងការផ្លាស់ប្តូរនូវបទពិសោធន៍រវាងខេត្តនិងក្រុងទាំងពីរព្រមទាំងសូម ឲ្យឯកអគ្គរដ្ឋទូតជួយធ្វើការសម្របសម្រួលក្នុងកិច្ចទំនាក់ទំនងសហប្រតិបត្តិការរវាងខេត្តសៀមរាបនិងទីក្រុង អូស្ទីនរដ្ឋតិចសាសន៍ ដើម្បីឲ្យកិច្ចសហប្រតិបត្តិការនេះបានដំណើរការដោយរលូន។ម្យ៉ាងទៀតតំបន់ប្រវត្តិសាស្ត្រខេត្តសៀមរាប មិនអាចប្រែក្លាយទៅបម្រើវិស័យផ្សេងៗបានឡើយដោយជាតំបន់ទេសចរណ៍វប្បធម៌ធម្មជាតិប្រវត្តិ សាស្ត្រដែលត្រូវធ្វើការអភិរក្សក្រុងដ៏ចំណាស់មួយនេះ ជាតំបន់ទេសចរណ៍វប្បធម៌ធម្មជាតិប្រកបដោយពណ៌បៃតង
ក្នុងនោះដែរឯ.ឧWilliamA.Heidtឯកអគ្គរដ្ឋទូតសហរដ្ឋអាមេរិក ក៏បានបញ្ជាក់ពីគោលបំណងរបស់ប្រតិភូក្នុងការចូលជួបសម្តែងការគួរសមជាមួយឯកឧត្តមអភិបាលខេត្ត ព្រមទាំងបានធ្វើការកោតសរសើរផងដែរពីភាពរីកចម្រើនរបស់ខេត្តសៀមរាបដែលជាក្រុងទី២ នៃព្រះរាជាណាចក្រកម្ពុជា។ឯកអគ្គរដ្ឋទូតបានលើកផងដែរថាចាប់ពីឆ្នាំ១៩៩០មកដល់បច្ចុប្បន្ននេះខេត្តសៀមរាបមានការអភិវឌ្ឍន៍យ៉ាងឆាប់រហ័សដែលធ្វើឲ្យមានការភ្ញាក់ផ្អើល យ៉ាងខ្លាំងពីការខិតខំប្រឹងប្រែងរបស់រាជរដ្ឋាភិបាលកម្ពុជា សំខាន់អាជ្ញាធរខេត្តសៀមរាបក្នុងការអភិវឌ្ឍន៍ និង គ្រប់គ្រងការអភិវឌ្ឍន៍ដែលធ្វើឲ្យសោភណ្ឌភាពក្រុងមានភាពស្រស់បំព្រោង ។
ក្នុងនាមជាមន្ត្រីផ្នែកសេដ្ឋកិច្ចរបស់ស្ថានទូតរបស់សហរដ្ឋអាមេរិកសូមធ្វើការគាំទ្រនូវរាល់មតិរបស់លោក អភិបាលខេត្តលើកឡើងផងដែរ។ម្យ៉ាងទៀតដោយឯកឧត្តមបានមើលឃើញ ពីការអភិវឌ្ឍន៍ដ៏ច្រើនរបស់ខេត្តសៀមរាបហើយបានកំពុងក្លាយជាគោលដៅរបស់ ភ្ញៀវទេសចរណ៍លើពិភពលោកចូលមកទស្សនាកម្សាន្ត។លោកWilliamA.Heidt ក៏បានបញ្ជាក់ផងដែរពីទស្សនៈវិស័យរបស់សហរដ្ឋអាមេរិក ដោយបានផ្តោតការយកចិត្តទុកដាក់ខ្ពស់ដល់ខេត្តសៀមរាបដែលជាក្រុងសេដ្ឋកិច្ចទី២ នៃប្រទេសកម្ពុជាហើយការចំណាប់អារម្មណ៍ ជាអាទិភាពនោះដោយមានប្រជាជនអាមេរិកជាច្រើន រស់នៅប្រកបកិច្ចការរកស៊ីនៅខេត្តសៀមរាបបន្ទាប់ពីរាជធានីភ្នំពេញ។ ឯកអគ្គរដ្ឋទូតក៏បានថ្លែងអំណរគុណផងដែរដល់អាជ្ញាធរខេត្តក្នុងការយកចិត្តទុកដាក់ខ្ពស់ នៃដំណើរទស្សនកិច្ចរបស់ភរិយាប្រធានាធិបតីសហរដ្ឋអាមេរិកអូបាម៉ាដែលធ្វើ ឲ្យប្រជាជនអាមេរិកទទួលសាទរ ដែលបានឃើញរូបភាពលោកជំទាវ នៅលើទឹកដីអង្គរ ។ ក្នុងនោះដែរឯកឧត្តម ក៏បានសម្តែងនូវការរីករាយ លើលិខិតផ្តួចផ្តើមមួយ ត្រូវបានបង្កើតឡើងរវាងខេត្តសៀមរាប និងទីក្រុងអូស្ទីន រដ្ឋតិច សាសន៍ នៃសហរដ្ឋអាមេរិកយើងនឹងបន្តធ្វើកិច្ចសហការគ្នាដើម្បីអនុវត្តទៅលើខ្លឹមសារនៃលិខិតផ្តួចផ្តើមដោយ ស្ថានទូតនិងជួយធ្វើការសម្របសម្រួលកិច្ចការនេះ។ម្យ៉ាងទៀតដោយទីក្រុងអូស្ទីនរដ្ឋតិចសាសន៍នេះ ជាតំបន់ ទេសចរណ៍ ដែលជាក្រុងល្អស្អាត ក្នុងការទាក់ទាញភ្ញៀវទេសចរណ៍ដូចនឹងខេត្តសៀមរាប លើផ្នែកវប្បធម៌ ។ ក្នុងនោះដែរប្រតិភូក៏បានគូសបញ្ជាក់ថាក្រៅពីផ្នែកទេសចរណ៍និងវប្បធម៌ រដ្ឋតិចសាសន៍មានការអភិវឌ្ឍឆាប់រហ័សទាក់ទងនិងបច្ចេកវិទ្យានិងវិស័យសេវាផ្សេងៗ ។ដូច្នេះកិច្ចសហប្រតិបត្តិការនេះក្រៅពីវិស័យទេសចរណ៍ត្រូវការធ្វើការស្វែងរកនូវបទពិសោធន៍ល្អៗ ពីរដ្ឋតិចសាសន៍ដើម្បីចាប់ដៃគ្នាអភិវឌ្ឍន៍ខេត្តសៀមរាប ។ក្នុងនោះដែរ លោក William A.Heidt ក៏បានបញ្ជាក់ពីសកម្មភាពមួយចំនួនក្នុងការអនុវត្តនៅខេត្តសៀមរាបដើម្បីសុំកិច្ចសហការជាមួយ អាជ្ញាធរខេត្តក្នុងការអនុវត្តគម្រោងរបស់ខ្លួន ក្នុងការជួយដល់ប្រជាកសិករនៅខេត្តសៀមរាបឲ្យមានជំនាញដាំបន្លែរ និង ជួកធ្វើការពង្រីកក្រុងទៀតផង។ ម្យ៉ាងទៀតខេត្តក្រុងទាំងពីរគឺត្រូវធ្វើការផ្លាស់ប្តូរនូវប្រតិភូដើម្បីធ្វើទស្សនៈ កិច្ចសិក្សាស្វែងយល់ពីគ្នាក្នុងគោលដៅអភិវឌ្ឍន៍ខេត្ត ក្រុងទាំងពីរ ក្នុងគោលដៅផលប្រយោជន៍នៃប្រជាជន ទៅ ពេលអនាគត៕
