ខេត្តព្រះវិហារ ក្រុមជនសង្ស័យក្នុងអំពើឃាតកម្មបាញ់សម្លាប់កសិករម្នាក់យ៉ាងឃោរឃៅដែលបានរៀបចំគម្រោងសម្លាប់នាពេលនោះត្រូវបានកំលាំងនគរបបាលព្រហ្មទណ្ឌកំរិតធ្ងន់នៃស្នងការនគរបាលខេត្តព្រះវិហារចាប់ឃាត់ខ្លួនបាន៥នាក់ ដែល កើតចេញពីគុំនុំរឿងដីធ្លី ។ ជនសង្ស័យទាំង៥នាក់ រួមមានឈ្មោះទី១ ឃឹម ទូច ទី២ ឃឹម ម៉ាង ទី៣ លី ហ៊ីម ទី៤ អ៊ុំ ខប និង ទី៥ ឃុត ឌៀប ជាជនដៃដល់ ។
សមត្ថកិច្ចនគរបាលជំនាញបានអោយដឹងថារឿងហេតុដែលបានកើតឡើងរវាង ឈ្មោះឃឹម ទូច និងឃឹមម៉ាងជាមួយឈ្មោះឃឹមនីនត្រូវជាបងបង្កើត។សមត្ថកិច្ចបន្តថាជំលោះរឿងដីធ្លីប្អូនទាំង២របស់ឃឹមនីនបានរៀបគម្រោងសម្លាប់ឃឹមនីនជាបងចោលមុនថ្ងៃកើតហេតុប្អូនទាំ២ បានទៅជួប ជាមួយ ជនដៃដល់ឈ្មោះឃុតឌៀបដើម្បីពិភាក្សារឿងសម្លាប់ឈ្មោះឃឹមនីនដោយបានជួលឈ្មោះឃុតឌៀបឲ្យបាញ់សម្លាប់បងខ្លួនឯងក្នុងតម្លៃ៥០០០ដុល្លារអាមេរិចក្រោយមកបានចុះតំលៃនៅត្រឹម៣០០០ដុល្លារនេះបើតាមចម្លើយសារភាពរបស់ជនដៃដល់។ ជនដៃដល់បានរៀបរាប់នៅមុខសមត្ថកិច្ចថានៅយប់កើតហេតុថ្ងៃទី១៣ ខែកុម្ភៈឆ្នាំ២០១៦កន្លងទៅនោះឈ្មោះឃឹមនីននិងឈ្មោះគីគីមបានអង្គុយស្លៀកក្រម៉ាផឹកទឹកត្នោតជូរជាមួយគ្នានៅនឹង ផ្ទះ ឃឹម នីន នាវេលាម៉ោង៨:០០យប់។ឈ្មោះ ឃុត ឌៀប បានប្រើឈ្មោះ លី ហ៊ីម និងឈ្មោះ អ៊ុំ ខប ឲ្យទៅមើលពេលផឹកទឹកត្នោតជូរចប់ ជនរងគ្រោះ ឈ្មោះគីគីមភេទប្រុសអាយុ២៩ឆ្នាំមុខរបរកសិករភូមិបរិបូរណ៍ឃុំត្បែង២ស្រុកគូលែនខេត្តព្រះវិហារក៍បានដើរត្រទ្បប់មកផ្ទះគ្រានោះជនដៃដល់ឈ្មោះឃុតដៀបបានធ្វើការបាញ់ប្រហារចំនួន៦គ្រាប់បណ្តាលឲ្យជនរងគ្រោះស្លាប់នៅនឹងកន្លែងក្នុងថ្លុកឈាមភ្លាមៗមួយរំពេចយ៉ាងអាណោចអាធម៌។ក្រោយពេលបាញ់ស្លាប់ហើយទើបដឹងថាបាញ់ច្រឡំមនុស្សបងប្អូនបង្កើតទាំង២នាក់បានឲ្យលុយជនដៃដល់ចំនួន២លានរៀលប៉ុណ្ណោះ។សមត្ថកិច្ចបានបញ្ចូនខ្លួនជនសង្ស័យទាំង៥នាក់ទៅកាន់តុលាការខេត្តកាលពីរសៀលថ្ងៃទី១៩កុម្ភះ២០១៦នេះដើម្បីវិនិច្ឆ័យទោសទៅតាមផ្លូវច្បាប់៕
