ភ្នំពេញៈ ជនសង្ស័យម្នាក់កាត់សោរចូលក្នុងផ្ទះ បំណងលួចទ្រព្យសម្បត្តិ តែត្រូវម្ចាស់ដឹងទាន់ស្រែកឆោឡោ ដេញចាប់បានវាយម្នាក់មួយដៃមួយជើង រួចប្រគល់អោយសមត្ថកិច្ច ។ ដែលហេតុការណ៍នេះ បានកើតឡើងកាលពីវេលាម៉ោង ១នឹង៤០នាទីរំលងអាធ្រាតឈានចូលថ្ងៃទី២៣ ខែកុម្ភះ ឆ្នាំ២០១៦ នៅចំណុចមុខវត្តស្រះចក សង្កាត់ស្រះចក ខណ្ឌដូនពេញ ។
ប្រភពពត៌មានពីនារីជាម្ចាស់ផ្ទះ បានអោយដឹងថា នៅមុនពេលកើតហេតុ គឺនាងបានលឺសម្លេងកាត់សោរផ្ទះ រួចក៏ចុះមកមើល ស្រាប់តែឃើញជនសង្ស័យ ចូលដល់ក្នុងផ្ទះរបស់ខ្លួន បំណងលួចទ្រព្យសម្បត្តិ ក៏បានស្រែកឆោឡោឡើងថាចោរៗ ។ ពេលនោះជនសង្ស័យព្យាយាមរត់គេចខ្លួន តែត្រូវប្រជាពលរដ្ឋ នាំគ្នាដេញចាប់បានវាយ ម្នាក់មួយដៃមួយជើង ទើបប្រគល់អោយសមត្ថកិច្ច ហើយក៏ឆែកឆេរឃើញនូវវត្ថុ ធ្វើសកម្មភាពមួយចំនួនផងដែរ ។
ក្រោយមកសមត្ថកិច្ច បានយកជនសង្ស័យទៅបុស្តិ៍នគរបាល រដ្ឋបាលស្រះចក ដើម្បីធ្វើការសួរនាំ ចំណែកនារីរងគ្រោះ បានទៅដាក់ពាក្យបណ្តឹង ដើម្បីអោយសមត្ថកិច្ចចាត់ការតាមនីតិវិធី ៕
