មណ្ឌលគិរី៖ នៅព្រឹកថ្ងៃទី៥ខែមិនា ឆ្នាំ២០១៦នេះ នៅអនុវិទ្យាល័យទួលព្រីង ស្ថិតនៅក្នុងភូមិម៉េប៉ៃ ឃុំពូជ្រៃ ស្រុកពេជ្រាដា ខេត្តមណ្ឌលគិរី បានរៀបចំពិធីប្រកួតកីឡាបាលទាត់មហាជនរវាងក្រុមកីឡាករឃុំប៊ូស្រានឹងក្រុមកីឡាករឃុំពូជ្រៃ។ ពិធីនេះប្រព្រឹត្តទៅក្រោមអធិបភាព ឯកឧត្តម មែន ង៉ុយ ប្រធានក្រុមប្រឹក្សាខេត្ត ឯកឧត្តម ស្វាយ សំអ៊ាង អភិបាល នៃគណៈអភិបាលខេត្តមណ្ឌលគិរី និងមានការអញ្ជើញចូលរូមពីមន្ទីរអង្គភាពជុំវិញខេត្ត អាជ្ញាធរស្រុកពេជ្រាដាគ្រប់លំដាប់ថ្នាក់ ក្រុមកីឡាករ និងប្រជាពលរដ្ឋចំនួន២០០នាក់។
ក្នុងឱកាសនោះដែរ ឯកឧត្តម ស្វាយ សំអ៊ាង អភិបាល នៃគណៈអភិបាលខេត្ត បានមានប្រសាសន៍ថា ការលេងកីឡាគឺនាំមកនូវសុខភាពល្អ បង្កើននូវចំណងមិត្តភាព ព្រមទាំងឲ្យក្មួយៗជៀសផុតពីការប្រើប្រាស់នឹងសេពគ្រឿងញៀន។
ឯកឧត្តមបានមានប្រសាសន៍ទៀតថា ប្រមុខរាជរដ្ឋាភិបាល ក្រោមការដឹកនាំរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បាននឹងកំពុងយកចិត្តទុកដាក់ខ្ពស់ទៅលើវស័យកីឡានេះ ដូចនេះក្មួយៗត្រូវតែបន្តខិតខំយកចិត្តទុកដាក់នឹងស្វែងយល់ទៅលើបច្ចេកទេសកីឡាបាលទាត់កីឡាបាលទះឲ្យបានកាន់តែល្អប្រសើរបន្ថែមទៀត។
បន្ទាប់មកឯកឧត្តម អភិបាលខេត្តបានមានប្រសាសន៍ផ្តាំផ្ញើរដល់ក្មួយៗក្រុមកីឡាករ និងប្រជាពលរដ្ឋដែលចូលរួមនៅក្នុងពិធីនោះ ត្រូវចូលរួមគោរពច្បាប់ចរាចរ បើកបរម៉ូតូត្រូវពាក់មួកសុវត្ថិភាព ពេលក្រេបគ្រឿងស្រវឹងសូមកុំបើកបរនឹងនាំគ្នាទៅធ្វើអត្តសញ្ញាណប័ណ្ណសញ្ជាតិខ្មែឲ្យបានគ្រប់ៗគ្នានៅក្នុងឆ្នាំ២០១៦នេះ។
នៅក្នុងពិធីនោះដែរ ឯកឧត្តម មែន ង៉ុយ ប្រធានក្រុមប្រឹក្សាខេត្ត ឯកឧត្តម ស្វាយ សំអ៊ាង អភិបាល នៃគណះអភិបាលខេត្ត បានប្រគល់សំលៀកបំពាក់កីឡាចំនួន៤០កំប្លេរ បាលទាត់ចំនួន២ បាលទះចំនួន១ នឹងថវិកាចំនួន១.៤១៥ដុល្លាអាមេរិចដល់ក្រុមកីឡាករផងដែរ។ ដោយប៊ូស្រា
