ភ្នំពេញ ៖រនាំងដែកពុះចែកទ្រូងផ្លូវចំនួន១០ផ្ទាំងបានបាក់រងការខូចខាត ខណៈដែលរថយន្តលុចស៊ីសមួយគ្រឿង បើកវ៉ារថយន្តមួយគ្រឿងទៀតនៅពីមុខហើយក៏បានរេចង្កូតបុករះរនាំងដែក រួចរថយន្តមិនទាន់អស់ល្បឿនក៏បោកផ្ទប់ និងរថយន្តCRVមួយគ្រឿងដែលធ្វើដំណើរច្រាស់ទិសគ្នារងការខូចខាតយ៉ាងដំណំ។ ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង ១២ និង៤៥នាទីរំលងអាធ្រាត្រឈានចូលថ្ងៃទី១៤ខែកុម្ភៈឆ្នាំ២០១៤ស្ថិតតាមបណ្ដោយមហាវិថីសហព័ន្ធរុស្ស៊ី ក្នុងភូមិប៉ប្រក់ខាងត្បូង សង្កាត់កាកាប ខណ្ឌពោធិ៍សែនជ័យ។
ប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុគេបានឃើញរថយន្តមួយគ្រឿង ម៉ាកលុចស៊ីស៤៧០មួយគ្រឿង ពណ៌ខ្មៅ ពាក់ស្លាកលេខ ភ្នំពេញ 2T-5132រួមដំណើរដោយបុរស២នាក់ និងស្ត្រីម្នាក់ធ្វើដំណើរតាមបណ្ដោយមហាវិថីសហព័ន្ធរុស្ស៊ីក្នុងទិសដៅពីកើតទៅលិច ក្នុងល្បឿនលឿនដូចហោះ លុះមកដល់ចំណុចកើតហេតុមុខហាងលក់ទូរស័ព្ទណូគាបេះដូងខ្មែរ រថយន្តលុចស៊ីសបាន
ព្យាយាម បើកវ៉ារថយន្តមួយគ្រឿងដែលនៅពីមុខ ក៏បានរេចង្កូតបុករះរនាំងដែកពុះចែកទ្រូងផ្លូវបាក់អស់ចំនួន៧ផ្ទាំង រៀបដល់ដីនិងវៀចចំនួន៣ផ្ទាំង ហើយរថយន្តលុចស៊ីសមិនទាន់អស់ល្បឿនក៏បានជ្រុលទៅបុកនិងរថយន្តមួយគ្រឿង ទៀតម៉ាកCRV ពណ៌ខ្មៅ ពាក់ស្លាកលេខ ភ្នំពេញ 2J-1197 បើកបរដោយបុរសម្នាក់ក្នុងទិសដៅច្រាស់គ្នា បណ្ដាអោយរថយន្តទាំង២គ្រឿងបុកគ្នាចំពីមុខពេញទំហឹង។ បន្ទាប់ពីកើតហេតុម្ចាស់
រថយន្តលុចស៊ីសនិងអ្នករួមដំណើរបានចុះពីរថយន្តគេចខ្លួនបាត់ម្តងចំណែករថយន្តរងការខូចខាតខ្ទេចមួយចំហៀងផ្ទែកខាងស្តាំ រីឯរថយន្តCRV ខ្ទេចមួយកំណាត់ផ្នែកខាងមុខ និងផ្ទុះពោងសុវត្តិភាពទាំង២ ហើយក្នុងគ្រោះថ្នាក់ចរាចរនេះពុំបណ្ដាលអោយមាននរណារងរបួសដល់អាយុជីវិតឡើយ។
ក្រោយពេលកើតហេតុសមត្ថកិច្ចមូលដ្ឋានបានទំនាក់ទំនងទៅសមត្ថកិច្ចជំនាញដើម្បីមកធ្វើការវាស់វែងនិងរថយន្ត ស្ទូចរថយន្តទាំង២គ្រឿងយកទៅរក្សាទុកនៅការិយាល័យចរាចរជើងរាជធានីរង់ចាំធ្វើការដោះស្រាយតាមផ្លូវច្បាប់៕ 
