ខេត្តសៀមរាប នាថ្ងៃទី២១ ខែ ឧសភា ឆ្នាំ២០១៤ឯ.ឧឃឹម ប៊ុនសុងអភិបាលនៃគណៈអភិបាល ខេត្តសៀមរាប ព្រមទាំងអគ្គនាយករងអាជ្ញាធរអប្សរា ថ្នាក់ដឹកនាំមន្ទីរពាក់ព័ន្ធអាជ្ញាធរក្រុងសៀមរាប បានជួប ប្រជុំពិភាក្សាការងារ ជាមួយគណៈប្រតិភូសម្ព័ន្ធមេត្រីភាពក្រុងស៊ូវ៉ុននៃសាធារណរដ្ឋកូរ៉េ ដឹកនាំដោយលោកShin Yoon-Bum ប្រធានមជ្ឈមណ្ឌលសហប្រតិបត្តិការអន្តរជាតិរបស់ក្រុងស៊ូវ៉ុននិងសហការី។ ក្នុងកិច្ចជួបពិភាក្សាការងារ ស្តីពីការពាក់ព័ន្ឋនឹងគម្រោងអភិវឌ្ឍន៍ភូមិមិត្តភាពសៀមរាប-ស៊ូវ៉ុន ដែលមានទីតាំងស្ថិតនៅភូមិមិត្តភាពភ្នំក្រោម សង្កាត់ ក្រុង-ខេត្តសៀមរាប។
មានប្រសាសន៍កិច្ចពិភាក្សានោះឯ.ឧឃឹម ប៊ុនសុងបាន គូសបញ្ជាក់ក្រោយពីខេត្ត-ក្រុងទាំងពីរបានធ្វើការចុះហត្ថលេខាលើអនុស្សណៈ នៃការយោគយល់គ្នា ស្តីពីខេត្ត និងក្រុងសម្ព័ន្ឋមេត្រីភាព ព្រមទាំងបានធ្វើការវាយតម្លៃខ្ពស់ ចំពោះលទ្ឋផលនៃបេសកកម្មរបស់រដ្ឋបាលក្រុងស៊ូវ៉ុន ក្នុងទំនាក់ទំនងដ៏ល្អប្រសើរជាមួយខេត្តសៀមរាប បានធ្វើការបញ្ចប់គម្រោងអភិវឌ្ឍន៍
ជំហានទី១(ឆ្នាំ២០០៧-២០១២) ដោយទទួលបានលទ្ឋផលជោគជ័យ គួឲ្យ កត់សម្គាល់ និងគម្រោងអភិវឌ្ឍន៍ជំហានទី២(ឆ្នាំ២០១៣-២០១៥) នឹងបន្តទៀតសំដៅស្តារ និង អភិវឌ្ឍភូមិមិត្តភាពនេះឲ្យក្លាយ ជាភូមិគំរូមួយក្នុងខេត្តសៀមរាបតាមរយៈការអភិវឌ្ឍហេដ្ឋារចនាសម្ព័ន្ឋរូបវ័ន្ត និង ហេដ្ឋារចនាសម្ព័ន្ឋអរូបវ័ន្ត ក្នុងគោលបំណងលើកកម្ពស់គុណភាព និងសមត្ថភាពរបស់ប្រជាជន ក្នុងភូមិមិត្តភាពសៀមរាប-ស៊ូវ៉ុន ដោយផ្តល់នូវកាលានុវត្តភាព ក្នុងការទទួលបាននូវ ចំណេះដឹង
បទពិសោធន៍ ជំនាញវិជ្ជាជីវៈដើម្បីប្រកបមុខរបរប្រចាំថ្ងៃ លើកកម្ពស់កម្រិតជីវភាពរស់នៅរបស់ប្រជាពលរដ្ឋឱ្យកាន់តែល្អប្រសើរនិងរស់នៅក្នុងសេចក្តីថ្លៃថ្នូ ។ ឯ.ឧឃឹម ប៊ុនសុងបានលើកពីសកម្ម ភាពមនុស្សធម៌របស់ ប្រជាពលរដ្ឋកូរ៉េ សម្ខាន់ប្រជាពលរដ្ឋទីក្រុងស៊ូវ៉ុន បានរួមចំណែកយ៉ាងសកម្មជាមួយរាជរដ្ឋាភិបាលកម្ពុជា និងរដ្ឋបាលខេត្តសៀមរាបក្នុងការលើកកម្ពស់ ជីវភាពរស់នៅរបស់ប្រជាជនខេត្តសៀមរាប តាមរយៈការផ្តល់នូវ សម្ភារៈសិក្សា សម្ភារៈសំណង់លំនៅដ្ឋាន ទូក
កាណូត ពូជសត្វ ស្បៀងអាហារ ថ្នាំសង្កូវ ទុនវិនិយោគខ្នាតតូចផងដែរ។ មានប្រសាសន៍នោះដែរលោកShin Yoon-Bum ក៏បានបញ្ជាក់ពីគោលបំណងដ៏ចាំបាច់ចំពោះមុខ ក្នុងអញ្ជើញ ប្រតិភូ សិល្បះបុរាណខ្មែរ ទៅធ្វើការសម្តែងនៅទីក្រុងស៊ូវុននិង គម្រោងរៀបចំប្រគុំតន្ត្រីខ្នាតតូចនៅភូមិភ្នំក្រោមហើយកត្តាដ៏សម្ខាន់នោះការរកទីតាំងសម្រាប់ការសាងសង់អគារសិក្សាមួយខ្នងសម្រាប់អនុវិទ្យាល័យភ្នំក្រោម ស៊ូវ៉ុន នៅភូមិមិត្តភាពសៀមរាប ស៊ូវ៉ុន ដើម្បី បំពេញនូវតម្រូវការបស់កូនចៅប្រជាពលរដ្ឋក្នុងភូមិមិត្តភាព ក៏ដូចប្រជាពលរដ្ឋសង្កាត់ចុងឃ្នៀសដែលជាប្រធានបទក្នុងកិច្ច ពិភាក្សានាពេលនេះ ។
ក្នុងនោះដែរលោកShin Yoon-Bum ក៏បានលើកយ៉ាងទទូច ដល់អាជ្ញាធរខេត្ត នៃតម្រូវការទីតាំងដីសម្រាប់សាងសង់អគារសិក្សាជាបន្ទាន់ និង ការសាងសង់លំនៅដ្ឋានដល់គ្រួសារក្រីក្រផងដែរ ។ក្នុងនោះដែរលោកក៏បានសំណូមពរ សូម ឲ្យប្រជាពលរដ្ឋក្នុងភូមិភ្នំក្រោមចូលរួម និង ទទួលយកនូវបទពិសោធន៍ មុខជំនាញ បច្ចេកទេស ដើម្បីជាមុខរបររបស់ពួកគាត់ សម្រាប់ទៅថ្ងៃអនាគតផងដែរ។
ក្នុងកិច្ចពិភាក្សានេះឯកឧត្តមអភិបាលខេត្ត ក៏បានជម្រាបដល់ ភាគីក្រុងសម្ព័ន្ធមេត្រីភាពអំពីការរកនូវទីតាំងដីសម្រាប់សាង សង់អគារសិក្សា ដោយបានដាក់នូវផែនការមួយចំនួនដល់ មន្ទីររៀបចំដែនដីនគរូបនីយកម្មសំណង់និងយុរិយោដីខេត្ត សហការជា មួយអាជ្ញាធរក្រុង និង អាជ្ញាធរអប្សរាក្នុងការអនុវត្តនូវផែនការឆ្នាំ២០១៣.២០១៥ក្នុងជំហានទី២ របស់ទីក្រុងស៊ូវ៉ុន ឲ្យទទួលបាន ជោគជ័យ។
ក្នុងកិច្ចពិភាក្សានោះ អគ្គនាយករងអាជ្ញាធរអប្សរា ក៏បានគូសបញ្ជាក់ថាក្នុងតំបន់ភូមិភ្នំក្រោម គឺស្ថិតនៅក្នុងតំបន់ អាជ្ញាធរអប្សរាគ្រប់គ្រងការពារដោយនៅខ្នងភ្នំមានប្រាសាទ ដែលត្រូវធ្វើការអភិរក្សថែរក្សាហើយការសាងសង់លំនៅដ្ឋានជូន ប្រជាជនក្រីក្រ ត្រូវសាងសង់តាមបទដ្ឋានបែបផ្ទះប្រពៃណីខ្មែរ។
មានប្រសាសន៍បិទកិច្ចពិភាក្សានោះ ឯ.ឧឃឹម ប៊ុនសុងក៏សុំឲ្យក្រុមការងាររបស់ទីក្រុងស៊ូវ៉ុន មន្ទីរពាក់ព័ន្ធនិង អាជ្ញាធរ ក្រុងសៀមរាប រួមសហការជាមួយអាជ្ញាធរអប្សរា ចុះធ្វើការសិក្សាស្វែងយល់ និងកំណត់ទីតាំងសម្រាប់សាងសង់អគារសិក្សា អនុវិទ្យាល័យ ស្របតាមអនុសាសន៍របស់សម្តេចតេជោ ហ៊ុនសែន នាយករដ្ឋមន្ត្រី ឲ្យមានសាលាបឋមសិក្សាគ្រប់ភូមិ អនុវិទ្យា ល័យ គ្រប់ឃុំ សង្កាត់និង វិទ្យាល័យគ្រប់ ក្រុង ស្រុក ខេត្ត ក្នុងការបង្ខិតថ្នាលបណ្តុះបណ្តាលធនធានមនុស្សឲ្យនៅជិត
ប្រជាជន ក្នុងនោះឯកឧត្តម ក៏បានគាំទ្រយ៉ាងពេញទំហឹងចំពោះបេសកកម្មប្រកបដោយអត្ថន័យជាប្រវត្តិសាស្ត្រ របស់ក្រុងស៊ូវ៉ុន ដែលកាយវិការនេះ គឺជាកាលានុវត្តភាពក្នុងការរឹតចំណងសាមគ្គីភាព និងពង្រីកទំនាក់ទំនង កិច្ចសហប្រត្តិការរវាងខេត្ត-ក្រុង និង ប្រជាជនយើងទាំងពីរសៀមរាប-ស៊ូវ៉ុន ឲ្យកាន់តែរឹងមាំទ្វេឡើងថែមទៀត ហើយធ្វើឲ្យវប្បធម៌ដ៏ប្រពៃនេះ បន្ត
កើតមានក្នុងការទំនាក់ទំនងចំណងមិត្តភាពរវាង ខេត្ត-ក្រុងសម្ព័ន្ឋមេត្រីភាពសៀមរាប-ស៊ូវ៉ុន កាន់ល្អប្រសើរ និង ធ្វើការជួយជ្រោមជ្រែង និងបង្កលក្ខណៈងាយស្រួលគ្រប់បែបយ៉ាងដល់រដ្ឋបាលទីក្រុងស៊ូវ៉ុន ក្នុងការអនុវត្តគម្រោងអភិវឌ្ឍន៍ជំហានទី២(ឆ្នាំ២០១៣-២០១៥) ឲ្យទទួលជោគជ័យតាមផែនការគ្រោងទុក៕
